ပၢင်တိုၵ်း ဢီႊရၼ်ႊလႄႈဢမေႊရိၵၼ်ႊ တီႈသၢႆၼမ်ႉႁေႃႊမူတ်ႉသ်ၼၼ်ႉ မၢၵ်ႇလူင်တူၵ်းသႂ်ႇ ႁိူဝ်းၵုၼ်ႇထႆး ၽွင်းႁၢင်လိူၼ်မၢတ်ႉၶျ် ၵူၼ်းၸွမ်းႁိူဝ်းထႆး 3 ၵေႃႉ လူႉတၢႆ။

ဝၼ်းတီႈ 8/4/2026 ၽွင်းလူင်ၾၢႆႇၼွၵ်ႈမိူင်း မိူင်းထႆး လၢတ်ႈတီႈပၢင်သပ်းၸႅင်ႈၶၢဝ်ႇဝႃႈ  ၸုမ်းၾၢႆႇ ၸွႆႈထႅမ် မိူင်းဢူဝ်ႊမၼ်ႊ တင်း ဢီႊရၼ်ႊ ႁူမ်ႈၵၼ်တင်း ၾၢႆႇၶွမ်ႊပၼီႊႁိူဝ်းသေ ၶတ်းၸႂ် သွၵ်ႈႁႃ တႃႇပၼ်တၢင်းၸွႆႈထႅမ်ယူႇသေတႃႉ ထူပ်းႁၼ်ၶၢပ်ႈတူဝ်တၢႆ ၽူႈႁၢပ်ႇၵၢၼ်ၼႂ်းႁိူဝ်း 3 ၵေႃႉ ၼၼ်ႉ ၵူၺ်း ဝႃႈၼႆ။

 3 ၵေႃႉဢၼ်တၢႆၵႂႃႇၼၼ်ႉ ပဵၼ်ၽူႈမီးပုၼ်ႈၽွၼ်းၾၢႆႇမႄးၾႆးၾႃႉ၊ ၶိူင်ႈၸၢၵ်ႈလႄႈ ၾၢႆႇမေႃမိုဝ်း လႆႈႁူႉၼင်ႇၼႆ။

ပေႃးထိုင်မႃး ၼႂ်းဝၼ်းတီႈ 15-16 လိူၼ်ၼႆႉ ၸွမ်းၼင်ႇၶေႃႈ ၽွင်းလူင်ၾၢႆႇၼွၵ်ႈမိူင်း ဢူဝ်ႊမၼ်ႊ မွၵ်ႇဝႆႉသေ ၽွင်းလူင်ၾၢႆႇၼွၵ်ႈမိူင်း မိူင်းထႆး တေဢွၵ်ႇၶၢဝ်းတၢင်းၵႂႃႇတီႈမိူင်းဢူဝ်ႊမၼ်ႊ၊ တေၵႂႃႇ မွၵ်ႇလၢတ်ႈ ၵႂၢမ်းၶွပ်ႈၸႂ်ပဵၼ်တၢင်းၵၢၼ်တီႈ မိူင်းဢူဝ်ႊမၼ်ႊ ၵဵဝ်ႇလူၺ်ႈလွင်ႈပၼ်တၢင်းၸွႆႈထႅမ်။

   လိူဝ်ၼၼ်ႉ တေဢုပ်ႇၵုမ်ပႃး တႃႇႁိူဝ်းတၢင်ႇၵုၼ်ႇမိူင်းထႆး 9 လမ်း ဢၼ်ၶမ်ဝႆႉယူႇ ၼႂ်းသၢႆၼမ်ႉ Hormuz တေၸၢင်ႈလတ်းၶၢမ်ႈမႃးလႆႈ လူၺ်ႈလွတ်ႈၽေးၸဵမ်ၸိူဝ်းၼႆႉ ဝႃႈၼႆ။

ႁိူဝ်းတၢင်ႇၵုၼ်ႇမိူင်းထႆး 9 လမ်းၼၼ်ႉ တႃႇ 5 လမ်း တၢင်ႇဝႆႉၽုၼ်ႇလိၼ် မျေႇဢေႃးၸႃႇ လမ်ႇလွင်ႈတႃႇ ၶၵ်ႉတွၼ်ႈ ၵၢၼ်ၽုၵ်ႇသွမ်ႈမိူင်းထႆး၊ ၶၢတ်ႈလၢမ်းဝႃႈ ၼႂ်းၶၢဝ်းတၢင်း 2 ဝူင်ႈၼႆႉ တေ ထိုင် မိူင်းထႆးယူႇဝႃႈၼႆ။

မိူၼ်ၼႆၼင်ႇၵဝ်ႇ ၼႂ်းဝၼ်းတီႈ 7 /4/2026 ၼႆႉၵေႃႈ ႁိူဝ်းတၢင်ႇၼမ်ႉမၼ်းမဵၼ်လမ်းၼိုင်ႈ တၢင်ႇၼမ်ႉမၼ်း မဵၼ် 7 သႅၼ်ပုင်း မႃးထိုင်တီႈမိူင်းထႆး။ ၽူႈမီးပုၼ်ႈၽွၼ်းၶဝ်လၢတ်ႈဝႃႈ ၼမ်ႉမၼ်းၸိူဝ်းၼႆႉ ၵုမ်ႇတႃႇၵူၼ်းၼႂ်းမိူင်းထႆး တႃႇၶၢဝ်းတၢင်း 2 လိူၼ်  ဝႃႈၼႆ။