ၵူၼ်းဝၢၼ်ႈၼႂ်းၸႄႈဝဵင်းၵေးသီးဢၼ်ပၢႆႈယၢၼ်ႁိူၼ်းယေးတီႈယူႇသေ သွၼ်ႈဝႆႉၸွမ်းၵျွင်းမုၼ်ၸဝ်ႈ ယင်းပႆႇ ၸၢင်ႈ ပွၵ်ႈၶိုၼ်း တိုၵ်ႉၵိုတ်း ႁူဝ်ၵူၼ်း မွၵ်ႈ 300 ပၢႆ ။
ၸိူဝ်းၶဝ်ယူႇသဝ်းဝႆႉတီႈဝတ်ႉၼွင်ဝူဝ်း မွၵ်ႈ 200 ၵေႃႉ၊ လွႆသႅင် မွၵ်ႈ 50 ပၢႆလႄႈ ဝတ်ႉ ဝၢၼ်ႈပၢင်ႇ 70 ပၢႆ ၸိူဝ်းၼႆႉ ယွၼ်ႉၼႂ်းပိုၼ်ႉတီႈ ပႆႇမီးလွင်ႈၼိမ်ယဵၼ်လႄႈ ပႆႇၸၢင်ႈပွၵ်ႈ ႁိူၼ်းယေးၵၼ် ၼႆယဝ်ႉ။
ၽူႈၸွႆႈထႅမ် ၵူၼ်းပၢႆႈၽေးသိုၵ်း တီႈၵေးသီး ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “တီႈဝတ်ႉၼွင်ဝူဝ်းတႄႉ သဵင်ၵွင်ႈ တႅၵ်ႇၼႂ်းပိုၼ်ႉတီႈ မိူဝ်ႈသိုၼ်းၼၼ်ႉသေ ၶိုၼ်းဢွၼ်ၵၼ် ပၢႆႈမႃးၶိုၼ်း တေမီးႁူဝ်ၵူၼ်း မွၵ်ႈ 200 ၼႆႉ။ တီႈဝတ်ႉလွႆသႅင် တႄႉ မွၵ်ႈ 50 ပၢႆ ၵမ်ႈၼမ် ပဵၼ်ၵူၼ်းထဝ်ႈလႄႈ လုၵ်ႈဢွၼ်ႇ။ တီႈဝတ်ႉဝၢၼ်ႈပၢင်ႇသမ်ႉ ပဵၼ်သင်ၶၸဝ်ႈ ဝၢၼ်ႈ ၽိူင်းတင်း ဝၢၼ်ႈဢိတ်းပၢႆႈမႃးယူႇဝႆႉ တေမီး 72 တူၼ် ”- ဝႃႈၼႆ။
ၼွၵ်ႈလိူဝ်ၼၼ်ႉ မိူၼ်ၼင်ႇ ဢၼ်ပၢႆႈမႃးသွၼ်ႈဝႆႉတီႈ ၼႂ်းဝဵင်းၵေးသီး ၸိူဝ်းၼၼ်ႉတႄႉ ဢမ်ႇၵိုတ်းယဝ်ႉ ဢွၼ်ၵၼ်ပွၵ်ႈ ႁိူၼ်းယေးၵၼ်မူတ်းယဝ်ႉ တီႈၼွင်သွမ်း ဢၼ်ပၢႆႈမႃးသွၼ်ႈၼမ်တီႈသုတ်းၼၼ်ႉၵေႃႈ ၶိုၼ်းဢွၼ်ၵၼ်ပွၵ်ႈမိူဝ်းၵၼ် မူတ်းယဝ်ႉ ဝႃႈၼႆ။
“တီႈၼွင်သွမ်းၼၼ်ႉ သိုၵ်းၶူဝ်းၶဵဝ်ၶဝ် ႁွင်ႉပွၵ်ႈမူတ်းယဝ်ႉ ႁူဝ်ၵူၼ်း 700 ။ တီႈဝတ်ႉၼွင်ဝူဝ်းၼၼ်ႉ ၵူၼ်းပၢႆႈၽေး ပေႃးပွၵ်ႈၵၼ်ယဝ်ႉ ယွၼ်ႉသဵင်ၵွင်ႈတႅၵ်ႇထႅင်ႈ မိူဝ်ႈသိုၼ်းၼၼ်ႉသေ လႆႈပၢႆႈမႃးၶိုၼ်း။ သဵင်ၵွင်ႈၼၼ်ႉတႄႉ တႅၵ်ႇၾၢႆႇလဵဝ် ၼႆၶႃႈ ၵူၼ်းဝၢၼ်ႈမႆႈၸႂ်ၵူဝ်သေ ငိူင်ႉပၢႆႈဢွၵ်ႇမႃးၶႃႈဢေႃႈ”- ၽူႈၸွႆႈထႅမ် ၵူၼ်းပၢႆႈၽေးသိုၵ်း သိုပ်ႇလၢတ်ႈၼႄ ၼင်ႇၼႆ ထႅင်ႈ။
ၵူၼ်းပၢႆႈၽေးသိုၵ်း ၼႂ်းၸႄႈဝဵင်းၵေးသီး ဢၼ်လႆႈပၢႆႈၽေးယွၼ်ႉသိုၵ်း RCSS တင်း SSPP ၼႆႉသမ်ႉ ပဵၼ်ၵူၼ်းဝၢၼ်ႈ ၼႂ်းဢိူင်ႇမိူင်းၵၢဝ် ၼွင်သွမ်းလႄႈ ႁူဝ်ပူင်ႇ ၸိူဝ်းၼႆႉ။
2 ၸုမ်းၼႆႉတႄႇပိုတ်းယိုဝ်းၵၼ် မိူဝ်ႈဝၼ်းတီႈ 1/6/2021 ယၢမ်းၵၢင်ၼႂ်၊ ႁၢၼ်ႉတေႃႇထိုင် ႁူဝ်လိူၼ်ၵျုႊလၢႆႊၼႆႉ မီးၶၢဝ်းတၢင်း လိူၼ်ပၢႆ ၊ ၵူၼ်း ပၢႆႈၽေးသိုၵ်း မီးၼပ်ႉႁူဝ်ႁဵင်။ ၸိူဝ်းပၢႆႈႁွတ်ႈၵႂႃႇၽႅဝ် တၢင်းမိူင်းၵိုင် လၢႆးၶႃႈ ၵေႃႈမီး ယင်းပႆႇၸၢင်ႈပွၵ်ႈၶိုၼ်းႁိူၼ်းယေးၽႂ်မၼ်း။
