ၵူၼ်းမိူင်းၵိုင်တင်း ၵေးသီး ပၢႆႈၽေးသိုၵ်း မႃးသွၼ်ႈဝႆႉတီႈၸႄႈဝဵင်းလၢႆးၶႃႈ ႁူဝ်ၵူၼ်းႁဵင်ပၢႆ ယၢမ်းလဵဝ်လူဝ်ႇတၢင်းၸွႆႈထႅမ် ၶဝ်ႈၼမ်ႉတၢင်းၵိၼ်လႄႈ လွင်ႈၼုင်ဝႆ ၼႆယဝ်ႉ။  

တႄႇဢဝ်ႁူဝ်လိူၼ်ၵျုႊလၢႆႊ 2021 ၼႆႉမႃး ၵူၼ်းမိူင်းၸႄႈဝဵင်းမိူင်းၵိုင် တင်း ၵေးသီး ပၢႆႈမႃးသွၼ်ႈဝႆႉတီႈ ၼႂ်းၸႄႈဝဵင်းလၢႆးၶႃႈ ၸႄႈတွၼ်ႈလွႆလႅမ် ၸိုင်ႈတႆးပွတ်းၸၢၼ်း တင်းမူတ်း ႁူဝ်ၵူၼ်း မွၵ်ႈ ႁဵင်ပၢႆ ။ မႃးသွၼ်ႈဝႆႉတီႈ ပွၵ်ႉ 4 ႁူဝ်ၵူၼ်း 20 ပၢႆ ၊ တီႈဝၢၼ်ႈထီႇမွၵ်ႈ 60 ၊ ဝၢၼ်ႈၸလၢႆးၶုမ်ႇ မွၵ်ႈ 40 ၊ ဝၢၼ်ႈၼမ်ႉလိူဝ်ႇ 450 ပၢႆ၊ ဝၢၼ်ႈတၢတ်ႇမွၵ်ႇတင်း ဝၢၼ်ႈႁူဝ် လူမ်းသမ်ႉ မွၵ်ႈ 400 ၼႆယဝ်ႉ။

ၸၢႆးလွၺ်ၶမ်းပၢင်ႇ ၵူၼ်းၼုမ်ႇၽူႈလူင်းပိုၼ်ႉတီႈၸွႆႈထႅမ်ၵူၼ်းပၢႆႈၽေးသိုၵ်း   လၢတ်ႈတီႈၽူႈ တွႆႇႁွၵ်ႈဝႃႈ – “ယၢမ်းလဵဝ် တီႈလၢႆး ၶႃႈ ၼႆႉ ႁူဝ်ၵူၼ်း တေမီးမွၵ်ႈႁဵင်ပၢႆၼႆႉၶႃႈ။ ၵမ်ႈၼမ် ဢၼ်ပၢႆႈမႃးၼႆႉ မိူင်းၵိုင်ၶႃႈဢေႃႈ ယဝ်ႉၵေႃႈ ၵူၼ်းၵေးသီး ၵမ်ႈၽွင်ႈၶႃႈ ။ ၼႂ်းၵေးသီးတႄႉ ၵမ်ႈၼမ် ပဵၼ်ၵူၼ်း ၼႂ်းဢိူင်ႇမိူင်းၵၢဝ် ၼွင်သွမ်း ၸိူဝ်းၼႆႉၶႃႈ။ ၵူၼ်းပၢႆႈၽေး ဢၼ်ပၢႆႈမႃး တီႈလၢႆးၶႃႈ ၼႆႉ တေမီးၶၢဝ်းတၢင်း ၽၢၵ်ႇလိူၼ်ၼႆႉယဝ်ႉ”- ဝႃႈၼႆ။

လိူဝ်ၼၼ်ႉ တွၼ်ႈတႃႇၵူၼ်းပၢႆႈၽေးသိုၵ်း တီႈဝဵင်းလၢႆးၶႃႈ ဢၼ်လူဝ်ႇတီႈသုတ်း ယၢမ်းလဵဝ်ၼႆႉသမ်ႉ ၶဝ်ႈၼမ်ႉ ၶွင်ၵိၼ် ယႅမ်ႉ၊ ၽႃႈႁူမ်ႇၶူဝ်းၼွၼ်းလႄႈ မေႃယႃ တူၺ်းလူပၼ် တၢင်းပဵၼ် ၸိူဝ်းၼႆႉ။

“ယၢမ်းလဵဝ်တီႈၵူၼ်းပၢႆႈၽေးသိုၵ်း လူဝ်ႇႁႅင်းတီႈသုတ်းတႄႉပဵၼ် ၶွင်ၵိၼ်ယႅမ်ႉ မိူၼ်ၼင်ႇ ၶဝ်ႈသၢၼ် ၼမ်ႉမၼ်း ၽၵ်းမီႇ ၽၵ်းၶဵဝ် ။ ယဝ်ႉၵေႃႈ ယွၼ်ႉပဵၼ်ၶၢဝ်းၽူၼ်လႄႈ ၽႃႈသိူဝ်ႇ၊ ၽႃႈၵင်ႈ၊ သုတ်း၊ ၽႃႈႁူမ်ႇၶူဝ်း ၼွၼ်း ၸိူဝ်းၼႆႉၵေႃႈလူဝ်ႇၼမ် မၢင်ၵေႃႈ ဢမ်ႇတၼ်းလႆႈ ၶူဝ်းသင်မႃး။ ၼွၵ်ႈလိူဝ်ၼၼ်ႉ ဢၼ်လူဝ်ႇႁႅင်းတီႈသုတ်းသမ်ႉ မေႃယႃၶဝ် တႃႇပႂ်ႉတူၺ်းလူလွမ် ယူတ်းယႃပၼ် ၵူၼ်းပၢႆႈၽေး ။ ဢၼ်လမ်ႇလွင်ႈတီႈ သုတ်းတႄႉ ပဵၼ် 3 ဢၼ်ၼႆႉၶႃႈ”- ၸၢႆးလွၺ်ၶမ်းပၢင်ႇ သိုပ်ႇလၢတ်ႈၼႄထႅင်ႈၼင်ႇၼႆ။

ယၢမ်းလဵဝ် ၵူၼ်းပၢႆႈၽေးသိုၵ်း ယွၼ်ႉပၢင်တိုၵ်း RCSS တင်း SSPP ၼႆႉ  တီႈမိူင်းၵိုင်   ႁူဝ်ၵူၼ်းမီးမွၵ်ႈႁဵင်ပၢႆ တီႈလၢႆးၶႃႈ  မီးႁဵင်ပၢႆ သွင်တီႈႁူမ်ႈၵၼ် တေမီးမွၵ်ႈ 2,500 ၼႆႉ ဝႃႈၼႆ။

သင်ဝႃႈၽူႈလႂ် ၽႂ်ၶႂ်ႈၵမ်ႉၸွႆႈထႅမ် တႃႇၵူၼ်းပၢႆႈၽေး ၼႂ်းၸိုင်ႈတႆး ပွတ်းၸၢၼ်းၼႆၸိုင် ၵပ်းသိုပ်ႇၸူး တီႈမၢႆၾူၼ်း 09-450-490-452 ၸၢႆးလွၺ်ၶမ်းပၢင်ႇ လႆႈယူႇ ဝႃႈၼႆ။