ၼႂ်းၸႄႈဝဵင်းၵေးသီး ၸိုင်ႈတႆး ပွတ်းၸၢၼ်း သိုၵ်း RCSS တင်း SSPP ပဵၼ်ပၢင် တိုၵ်းၵၼ်မႃးႁၢဝ်ႈႁႅင်း မီးၶၢဝ်းတၢင်း လိူၼ်ပၢႆ ၵူၼ်းပၢႆႈၽေးသိုၵ်း မီးၼပ်ႉႁူဝ်ႁဵင်၊ ယၢမ်းလဵဝ် ဢွၼ်ၵၼ်ပွၵ်ႈၶိုၼ်းႁိူၼ်းၽွင်ႈယဝ်ႉသေတႃႉ ၵိုတ်းၵမ်ႈၽွင်ႈ မွၵ်ႈႁူဝ်ပၢၵ်ႇ ပႆႇၸၢင်ႈပွၵ်ႈ ။
မိူဝ်ႈဝႃး ဝၼ်းတီႈ 16/7/2021 ၵူၼ်းပၢႆႈၽေးသိုၵ်း ဢၼ်ပၢႆႈမႃးသွၼ်ႈဝႆႉ ၼႂ်းဝဵင်းၵေးသီး ၸိူဝ်းၼၼ်ႉတႄႉ ဢွၼ်ၵၼ်ပွၵ်ႈ ၶိုၼ်းႁိူၼ်းယေး ၽႂ်မၼ်းမူတ်း။ ယၢမ်းလဵဝ်တႄႉ တိုၵ်ႉၵိုတ်းဝႆႉ တီႈဝတ်ႉၼွင်ဝူဝ်း၊ ဝတ်ႉမိူင်းၼိမ်၊ ဝတ်ႉလွႆသႅင်၊ ဝတ်ႉ ဝၢၼ်ႈပၢင်ႇ။ ၵမ်ႈၼမ် ပဵၼ်ၵူၼ်းထဝ်ႈလႄႈ လုၵ်ႈဢွၼ်ႇ ၊ဢိၵ်ႇပႃးတင်း သင်ၶၸဝ်ႈ ၽွင်ႈ။
ၽူႈၸွႆႈထႅမ် ၵူၼ်းပၢႆႈၽေးသိုၵ်း တီႈၵေးသီး ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ယၢမ်းလဵဝ် တီႈၼႂ်းဝဵင်းၵေးသီးတႄႉ ဢွၼ်ၵၼ် ပွၵ်ႈမိူဝ်းမူတ်းယဝ်ႉ။ ဢၼ်ၵိုတ်းဝႆႉတႄႉ တီႈၼွင်ဝူဝ်း ႁူဝ်ၵူၼ်း မွၵ်ႈ 80 ။ ၵမ်ႈၼမ် ပဵၼ် လုၵ်ႈဢွၼ်ႇလႄႈ ၵူၼ်းထဝ်ႈ ၵူၼ်းၼုမ်ႇ ၵူၼ်းၶၢဝ်ႉတႄႉ ဢွၼ်ၵၼ်ပွၵ်ႈယဝ်ႉ။ တီႈလွႆသႅင် တင်း မိူင်းၼိမ် ၸိူဝ်းၼႆႉၵေႃႈ မိူဝ်ႈၼႆႉ ၵိုတ်းဝႆႉ ၵႃႈႁိုဝ်ၼႆ ပႆႇလႆႈသဵၼ်ႈမၢႆမၼ်းၶႃႈ”- ဝႃႈၼႆ။
ၼွၵ်ႈလိူဝ်ၼၼ် တီႈဝတ်ႉဝၢၼ်ႈပၢင်ႇ ၵေႃႈ ယၢမ်းလဵဝ် မီးဝႆႉ သင်ၶၸဝ်ႈ တင်းမူတ်း 70 ပၢႆ ပႆႇၸၢင်ႈပွၵ်ႈဝတ်ႉဝႃး။
“တီႈဝတ်ႉဝၢၼ်ႈပၢင်ႇတႄႉ မီးဝႆႉသင်ၶၸဝ်ႈ တင်းမူတ်း ႁူဝ်ၵူၼ်း 70 ပၢႆ ပဵၼ်သင်ၶၸဝ်ႈ တီႈဝၢၼ်ႈၽိူင်း တင်း ဝၢၼ်ႈ ဢိတ်း ပၢႆႈမႃးသွၼ်ႈဝႆႉၶႃႈဢေႃႈ။ တီႈၼၼ်ႈတႄႉ ပႆႇပွၵ်ႈၶႃႈ”- ၽူႈၸွႆႈထႅမ် ၵူၼ်းပၢႆႈၽေးသိုၵ်း သိုပ်ႇလၢတ်ႈ ၼႄၼင်ႇ ၼႆ။
ၵူၼ်းပၢႆႈၽေးသိုၵ်း ၼႂ်းၸႄႈဝဵင်းၵေးသီးၼႆႉ ၵမ်ႈၼမ် ပဵၼ်ၵူၼ်းၼႂ်းဢိူင်ႇမိူင်းၵၢဝ်၊ ၼွင်သွမ်းလႄႈ ႁူဝ်ပူင်း ၸိူဝ်းၼႆႉ။
RCSS တင်း SSPP ပဵၼ်ပၢင်တိုၵ်းၵၼ်မႃး တႄႇဢဝ်မိူဝ်ႈဝၼ်းတီႈ 1/6/2021 ၼၼ်ႉမႃး တေႃႇထိုင်ႁူဝ် လိူၼ်ၵျုႊလၢႆႊၼႆႉမီးၶၢဝ်းတၢင်း လိူၼ်ပၢႆ ၼႆယဝ်ႉ။
