SSPP တင်း RCSS ႁဵတ်းသိုၵ်း ႁဵတ်းသိူဝ်တေႃႇၵၼ်လႄႈ ၵူၼ်းမိူင်း ၼႂ်းၸႄႈဝဵင်းၵေးသီး ၸိူဝ်းပဵၼ်ၼၢင်းယိင်း၊ ၵူၼ်းထဝ်ႈ လႄႈ လုၵ်ႈဢွၼ်ႇ ႁူဝ်ၵူၼ်း 400 ပၢႆ ၼၼ်ႉ ပႆႇႁတ်း ပွၵ်ႈဝၢၼ်ႈ ပွၵ်ႈႁိူၼ်းၶိုၼ်း။
ၵူၼ်းပၢႆႈၽေးသိုၵ်း ဢၼ်တိုၵ်ႉၵိုတ်းဝႆႉ တီႈဝတ်ႉၼွင်ဝူဝ်း ႁူဝ်ၵူၼ်း မွၵ်ႈ 100 ၵေႃႉ ၊ ဝတ်ႉၵၢမ်ႇမထၢၼ်း မွၵ်ႈ 50 ပၢႆ၊ ၵျွင်းလူင် သွင်လၵ်း မွၵ်ႈ 100 ၵေႃႉ ၊ ဝတ်ႉမိူင်းယဵၼ် မွၵ်ႈ 60 ၵေႃႉလႄႈ ဝတ်ႉလွႆသႅင် 50 ၵေႃႉ ။ ၵမ်ႈၼမ် ပဵၼ် ၼၢင်းယိင်း ၵူၼ်းထဝ်ႈ လႄႈ လုၵ်ႈဢွၼ်ႇ ၵူဝ်သိုၵ်း SSPP တင်း RCSS ယိုဝ်းၵၼ်ၶိုၼ်းလႄႈ ယင်းပႆႇႁတ်းပွၵ်ႈဝၢၼ်ႈ ပွၵ်ႈႁိူၼ်းၶိုၼ်း။
ၽူႈၸွႆႈထႅမ် ၵူၼ်းပၢႆႈၽေးသိုၵ်း ၸႄႈဝဵင်းၵေးသီး ၵေႃႉၼိုင်ႈ လၢတ်ႈတီႈၽူႈ တွႆႇ ႁွၵ်ႈဝႃႈ – “ၵူၼ်းပၢႆႈၽေးသိုၵ်း တီႈၵေး သီးတႄႉ ဢွၼ်ၵၼ်ပွၵ်ႈမိူဝ်း မိူဝ်ႈဝႃးၼႆႉ ၼမ်ယဝ်ႉၶႃႈ။ ၸိူဝ်းၵိုတ်းဝႆႉယၢမ်းလဵဝ်ၼႆႉ ၵမ်ႈၼမ် ပဵၼ်ၵူၼ်းထဝ်ႈလႄႈ လုၵ်ႈ ဢွၼ်ႇၵူၺ်း။ ယွၼ်ႉသင်လႄႈ ပႆႇမိူဝ်းၼႆႉ သင်ဝႃႈ ပၢင်တိုၵ်းၼႆႉ ပဵၼ်မႃးၶိုၼ်းထႅင်ႈၼႆ မၼ်းတေပႆႇယၢပ်ႇလႄႈ ၵွပ်ႈၼႆ ပႆႇ မိူဝ်းမူတ်း တေပႂ်ႉတူၺ်းငဝ်းလၢႆး ထႅင်ႈဢိတ်းၼိုင်ႈၼႆၶႃႈ”- ဝႃႈၼႆ။
ၵူၼ်းပၢႆႈၽေးသိုၵ်း ၼႂ်းၸႄႈဝဵင်းၵေးသီးၼႆႉ ၵမ်ႈၼမ် ပဵၼ်ၵူၼ်းၼႂ်းဢိူင်ႇၼွင်သွမ်း၊ မိူင်းၵၢဝ်လႄႈ ႁူဝ်ပူင်ႇ ၸိူဝ်းၼႆႉ။
မိူင်းတႆးပွတ်းၸၢၼ်း ၼႂ်းၸႄႈတွၼ်ႈလွႆလႅမ် ၼႂ်းၸႄႈဝဵင်းၵေးသီးၼၼ်ႉ SSPP တင်း RCSS ႁဵတ်းသိုၵ်း ႁဵတ်းသိူဝ်တေႃႇၵၼ်၊ ဝၼ်းတီႈ 1/6/2021 တႄႇယိုဝ်းၵၼ်တၢင်းသၼ်လွႆႁူၼ်း တေႃႇထိုင် ယၢမ်းလဵဝ် သဵင်ၵွင်ႈ တိုၵ်ႉတႅၵ်ႇယူႇ ၸွမ်းထုင်ႉတီလွႆ ပဵၼ်တီႈ။ ႁဵတ်းႁႂ်ႈၵူၼ်းမိူင်းၼႂ်းပိုၼ်ႉတီႈ လႆႈဢွၼ်ၵၼ်ပၢႆႈၽေး သိုၵ်း ၼပ်ႇႁူဝ်ႁဵင် ၼႆယဝ်ႉ။
“ပၢင်တိုၵ်းယဵၼ်ယဝ်ႉ ဝႃႈၼႆသေတႃႉ ၵူၺ်းၵႃႈ မိူဝ်ႈဝႃးၼႆႉ သဵင်ၵွင်ႈတိုၵ်ႉတႅၵ်ႇထႅင်ႈ ယူႇတၢင်းၵေးသီး ႁဝ်းၶႃႈၼႆႉ မွၵ်ႈ 7- 8 ၵမ်းၼႆႉ။ တေလႆႈဝႃႈယဵၼ်တႄႉယဝ်ႉႁႃႉ ဝႃႈၼၼ်ႉၵေႃႈ ပႆႇယဵၼ်တႄႉၶႃႈ။ ၵူၺ်းၵႃႈ တၢင်းၵေးသီးၼႆႉ ဢမ်ႇပဵၼ်ႁႅင်း ယဝ်ႉ ၼႆသေတႃႉ ၶဝ်သွင်ၸုမ်းၼႆႉသမ်ႉ ၵႂႃႇပဵၼ်ၵၼ်တၢင်း ဢိူင်ႇမိူင်းၶုၼ် မိူင်းၵိုင်ၼၼ်ႉ ၶႃႈဢေႃႈ ယၢမ်းလဵဝ်ၼႆႉ တီႈ ၼၼ်ႈၵေႃႈ မီးၵူၼ်းပၢႆႈၽေးသိုၵ်း ၼပ်ႉႁူဝ်ႁဵင်ထႅင်ႈ”- ၽူႈၸွႆႈထႅမ် ၵူၼ်းပၢႆႈၽေးသိုၵ်း တီႈၵေးသီး သိုပ်ႇလၢတ်ႈ ၼႄ ၼင်ႇၼႆထႅင်ႈ။
ၵူၼ်းဝၢၼ်ႈၵူၼ်းမိူင်း ၸိူဝ်းပၢႆႈၽေးသိုၵ်းၼႆႉ ၾၢႆႇၼိုင်ႈ လႆႈၵူဝ်သိုၵ်းၵူဝ်သိူဝ်၊ ၽၢႆႇၼိုင်ႈသမ်ႉ လႆႈၵူဝ်ၽေးၶူဝ်ႊဝိတ်ႉ 19 ဢၼ်ၽႄႈလၢမ်းယူႇႁၢဝ်ႈႁႅင်း။ ယွၼ်ႉၼႂ်းပၢင်သဝ်းၵူၼ်းပၢႆၽေး ဢမ်ႇမီး ၶိူင်ႈယူတ်းယႃ ၵႅတ်ႇၵင်ႈတၢင်းပဵၼ်ၶူဝ်ႊဝိတ်ႉ 19 ။
