တၢင်းပဵၼ်ၶူဝ်ႊဝိတ်ႉ 19 ၽႄႈလၢမ်းၸပ်းထိုင်ဝဵင်းၵေးသီးယဝ်ႉသေတႃႉ ၵူၼ်းပၢႆႈၽေးသိုၵ်း   ႁဵင်ပၢႆ ပႆႇၸၢင်ႈပွၵ်ႈႁိူၼ်းယေး သဵင်ၵွင်ႈတိုၵ်ႉတႅၵ်ႇယူႇ ပႆႇယဵၼ် ဝႃႈၼႆ။

တင်ႈဢဝ် ဝၼ်းတီႈ 1/6/2021 မႃးတေႃႇထိုင် ဝၼ်းတီႈ 13/7/2021 ၼႆႉ မီးၶၢဝ်းတၢင်းလိူၼ်ပၢႆ ၵူၼ်းပၢႆႈၽေးသိုၵ်း တီႈၸႄႈ ဝဵင်းၵေးသီး ၸႄႈတွၼ်ႈလွႆလႅမ် ၸိုင်ႈတႆး ပွတ်းၸၢၼ်း ႁူဝ်ၵူၼ်း ႁဵင်ပၢႆ ပႆႇၸၢင်ႈပွၵ်ႈႁိူၼ်းယေး  ယွၼ်ႉၼႂ်းပိုၼ်ႉတီႈ ပႆႇမီး လွင်ႈၼိမ်ယဵၼ် သဵင်ၵွင်ႈတိုၵ်ႉတႅၵ်ႇထႅင်ႈယူႇ ၼႆယဝ်ႉ။

ၽူႈၸွႆႈထႅမ် ၵူၼ်းပၢႆႈၽေးသိုၵ်း တီႈၸႄႈဝဵင်းၵေးသီး ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “မိူဝ်ႈဝႃး ဝၼ်းတီႈ 12 ၼႆႉ သဵင်ၵွင်ႈတင်းသွင်ၾၢႆႇတိုၵ်ႉတႅၵ်ႇထႅင်ႈယူႇၶႃႈ။ တႄႇဢဝ် ယၢမ်းၵၢင်ၼႂ် 9 မူင်း ထိုင် 2 မူင်းဝၢႆးဝၼ်းၶႃႈဢေႃႈ။ ၵူၼ်းပၢႆႈၽေး တႄႉ ဢၼ်ပွၵ်ႈမိူဝ်းၵေႃႈ မိူဝ်းၽွင်ႈယဝ်ႉ။ ယွၼ်ႉၵူဝ်တၢင်းပဵၼ်ၵေႃႈပိူင်ၼိုင်ႈသေ ပွၵ်ႈမိူဝ်းၵၼ်ၶႃႈ။ ဢၼ် ၵိုတ်းဝႆႉတႄႉ မီးထႅင်ႈၼမ်ယူႇၶႃႈ ပႆႇမိူဝ်း ယွၼ်ႉသဵင်ၵွင်ႈ တိုၵ်ႉတႅၵ်ႇ ယူႇ ”- ဝႃႈၼႆ။

ၵူၼ်းပၢႆႈၽေးသိုၵ်း ဢၼ်တိုၵ်ႉၵိုတ်းဝႆႉတႄႉ တီႈဝတ်ႉၼွင်သွမ်း 760 ပၢႆ၊ ဝတ်ႉၼွင်ဝူဝ်း မွၵ်ႈ 460 ၵေႃႉ၊ ဝတ်ႉၵျွင်းလူင် မွၵ်ႈ 100 ၊ ဝတ်ႉၵၢမ်ႇမထၢၼ်း မွၵ်ႈ 60 လႄႈ ၵျွင်းဝဵင်းသမ်ႉ မွၵ်ႈ 30 ၵေႃႉ ၽူႈၸွႆႈထႅမ် ၵူၼ်းပၢႆႈၽေးသိုၵ်း သိုပ်ႇလၢတ်ႈ ၼႄ ၼင်ႇၼႆ။

ၾၢႆႇၼိုင်ႈတီႈဝဵင်းၵေးသီး မီးၵူၼ်တိတ်းၸပ်းတၢင်းပဵၼ်ၵႃႇလ ၶူဝ်ႊဝိတ်ႉ 19 ယဝ်ႉလႄႈ ၵူၼ်းပၢႆႈၽေးသိုၵ်း ၸိူဝ်းပၢႆႈ ဢွၵ်ႇမႃး သွၼ်ႈဝႆႉၸွမ်းဝတ်ႉဝႃးၽႃသိူဝ်ႇ ဢွၼ်ၵၼ်ၶႆႈပွၵ်ႈၶိုၼ်းႁိူၼ်းယေး။ ၾၢႆႇၼိုင်ႈၵေႃႈ ပဵၼ်ၶၢဝ်းလူဝ်ႇၽုၵ်ႇ သွမ်ႈ ယဝ်ႉလႄႈ ၵူဝ်ႁၢမ်းၵၢၼ် ၽုၵ်ႇသွမ်ႈႁႆႈၼႃး ၵွပ်ႈၼႆႇလႄႈ မုင်ႈမွင်း ႁႂ်ႈပၢင်တိုၵ်း   ၸဵဝ်းၵိုတ်းတိုၵ်းၵၼ်ဝႆးဝႆး   ဝႃႈၼႆ။

ၵူၼ်းပၢႆႈၽေးသိုၵ်း ၼႂ်းၸႄႈဝဵင်းၵေးသီးၼႆႉ ၵမ်ႈၼမ် ပဵၼ်ၵူၼ်းၼႂ်းဢိူင်ႇၼွင်သွမ်း၊ မိူင်းၵၢဝ်လႄႈ ႁူဝ်ပူင်ႇ ၸိူဝ်းၼႆႉ။

ၼွၵ်ႈလိူဝ်ၼၼ်ႉ တၢင်းၸႄႈဝဵင်းမိူင်းၵိုင်ၵေႃႈ ၼႂ်းလိူၼ်ၵျုႊလၢႆႊၼႆႉၵူၺ်း ၵူၼ်းဝၢၼ်ႈဢိူင်ႇမိူင်းၶုၼ် ႁူဝ်ၵူၼ်း 750 ပၢႆ ဢွၼ်ၵၼ်ပၢႆႈမႃးသွၼ်ႈဝႆႉတီႈ ဝတ်ႉဝၢၼ်ႈလႅင်၊ ဝတ်ႉဝၢၼ်ႈႁူၺ်ႈ၊ ဝတ်ႉၼွင်လီႈလႄႈ ႁူင်းႁဵၼ်း ၸိူဝ်းၼႆႉ ထိုင်ယၢမ်းလဵဝ် ပႆႇၸၢင်ႈပွၵ်ႈႁိူၼ်းယေးၵၼ် ၼႆယဝ်ႉ။

ယၢမ်းလဵဝ် ၵူၼ်းပၢႆႈၽေးသိုၵ်း ဢၼ်ၵိုတ်းဝႆႉတီႈၸႄႈဝဵင်းၵေးသီး ၸွမ်းဝတ်ႉဝႃးၽႃႇသိူဝ်ႇလႄႈ ႁိူၼ်းပီႈၼွင်ႉ ယဝ်ႉၵေႃႈ တီႈၸႄႈဝဵင်းမိူင်းၵိုင်ၼႆႉထႅင်ႈသေ တင်းမူတ်းႁူမ်ႈၵၼ် တေမီးယူႇ မွၵ်ႈသၢမ်ႁဵင် တေပႆႇၸၢင်ႈပွၵ်ႈႁိူၼ်းယေးၵၼ် ၼႆ ယဝ်ႉ။