ၼၢင်းယိင်း ဢႃယု 50 ပီ ၵေႃႉၼိုင်ႈ ၵႂႃႇတူၺ်းၼႃးၼႂ်းၼႃႈလိၼ်သိုၵ်းသိူဝ် ၺႃးယိုဝ်းမၢတ်ႇၸဵပ်းသေ ယၢမ်းလဵဝ် ၽႂ်ဢဝ်ၵႂႃႇယူတ်းယႃတူဝ်ဝႆႉတီႈလႂ်ပႆႇႁၼ်၊ ပီႈၼွင်ႉလုၵ်ႈလၢၼ်မႆႈၸႂ်။
ဝၼ်းတီႈ 7/7/2021 ယၢမ်းၵၢင်ဝၼ်း ၼၢင်းၼူၼ်း ဢႃယု 50 ပီ ၵူၼ်းဝၢၼ်ႈဢိတ်း ဢိူင်ႇမိူင်းၼၢင်း ၸႄႈဝဵင်းၵေးသီး ၸႄႈ တွၼ်ႈလွႆလႅမ် ၸိုင်ႈတႆး ပွတ်းၸၢၼ်း ၵႂႃႇတူၺ်းၼႃးသေ ထုၵ်ႇယိုဝ်း ၼႂ်းၵႄႈပၢင်တိုၵ်းသိုၵ်းသိူဝ် RCSS တင်း SSPP ။
ၽူႈၸွႆႈထႅမ်ၵူၼ်းပၢႆႈၽေး ၵေးသီး ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “မိူဝ်ႈဝၼ်းၼၼ်ႉ ၼၢင်းၼူၼ်းၵႂႃႇတူၺ်းၼႃး။ မိူဝ်ႈၽွင်းၵႂႃႇၼၼ်ႉ ပၢင်တိုၵ်းပႆႇပဵၼ် ၽိူဝ်ႇထိုင်ၵႂႃႇၼႂ်းၼႃးယဝ်ႉ ပၢင်တိုၵ်းၼႆႉ ၸင်ႇပဵၼ်ၶိုၼ်ႈမႃး ႁဵတ်းၼၼ်သေ မၼ်း ၼၢင်း တိူဝ်ႉၺႃးမၢၵ်ႇၵွင်ႈ တီႈၵုမ်ႇၵူၼ်ႈမၼ်းၼၢင်းၶႃႈဢေႃႈ”- ဝႃႈၼႆ။
ယၢမ်းလဵဝ် တူဝ်ၼၢင်းၼူၼ်းၼၼ်ႉ ထုၵ်ႇသူင်ႇၵႂႃႇ ယႃဝႆႉတီႈႁူင်းယႃလႂ် ၵေႃႈဢမ်ႇႁူႉ။ လုၵ်ႈလၢင်းပီႈၼွင်ႉၸွမ်းႁႃၵေႃႈ ဢမ်ႇပႆႇႁၼ်တေႃႇထိုင်ယၢမ်းလဵဝ်။
“ႁဝ်းၶႃႈ လႆႈငိၼ်းဝႃႈ မၼ်းၼၢင်း ထုၵ်ႇသူင်ႇၵႂႃႇယူတ်းယႃတူဝ်တီႈမိူင်းၼွင်။ ၵမ်းၼႆႉၽိူဝ်ႇထၢမ်တူၺ်းမိူင်းၼွင် ဢမ်ႇမီးမေႃယႃၼႆသေ သမ်ႉဝႃႈ ၶိုၼ်းသူင်ႇမႃး ၵေးသီး။ ၵမ်းၼႆႉ ၶႃႈဝႃႈ တေဢၢင်ႈၵႂႃႇၸွႆႈမၼ်းၼၢင်းၼႆသေ ၵႂႃႇတူၺ်းတီႈ ႁူင်းယႃၵေးသီး။ တီႈႁူင်း ယႃသမ်ႉ ဢမ်ႇမီး ။ ၶဝ်ဝႃႈဢမ်ႇၽႅဝ်မႃး သူင်ႇၵႂႃႇယူတ်းယႃတူဝ်ဝႆႉတီႈၶူဝ်လမ်ယဝ်ႉ ၼႆၶႃႈဝႃႇ”- ၽူႈ ၸွႆႈထႅမ် ၵူၼ်းပၢႆႈၽေး သိုၵ်းတီႈၵေးသီး သိုပ်ႇလၢတ်ႈၼႄၼင်ႇၼႆ။
ၼၢင်းၼူၼ်းၼႆႉ ပဵၼ်လုၵ်ႈယိင်း လုင်းသၢမ် – ပႃႈဢွင်ႇ ပဵၼ်ၵူၼ်းဝၢၼ်ႈဢိတ်း ဢိူင်ႇမိူင်းၼၢင်း ။ ပီႈၼွင်ႉလုၵ်ႈလၢၼ် မႆႈၸႂ် သေ ၸွမ်းႁႃတူဝ်မၼ်းၼၢင်းယူႇ ။
မိူဝ်ႈဝၼ်းတီႈ 4/7/2021 ပူၼ်ႉမႃးၼၼ်ႉ ၸၢႆးသၢင်ႇဢွင်ႇ ၵူၼ်းဝၢၼ်ႈၼႃးထွၼ်ႇ ၸႄႈဝဵင်းၵေးသီး မၼ်းၸၢႆး ၶီႇရူတ်ႉၶိူင်ႈ သေ ၵႂႃႇတူၺ်းၼႃး ၼၼ်ႉၵေႃႈ ၺႃးယိုဝ်းသေ လႆႈမၢတ်ႇၸဵပ်း ယၢမ်းလဵဝ် ထုၵ်ႇသူင်ႇယူတ်းယႃတူဝ်ဝႆႉတီႈလႂ် ဢၼ်ဝႃႈ ၼၼ်ႉ ပႆႇႁူႉ ၽူႈၸွႆႈထႅမ်ၵူၼ်းပၢႆႈသိုၵ်း တီႈၵေးသီး လၢတ်ႈၼႄၼင်ႇၼႆထႅင်ႈ။
တႄႇဢဝ် ဝၼ်းတီႈ 1/6/2021 မႃး တေႃႇထိုင် ယၢမ်းလဵဝ် သိုၵ်း RCSS တင်း SSPP ပိုတ်ႇပၢင်တိုၵ်းတေႃႇၵၼ် ၼႂ်း ၸႄႈဝဵင်းၵေးသီးမႃးႁၢဝ်ႈႁႅင်း တေႃႇထိုင်ယၢမ်းလဵဝ် ပၢင်တိုၵ်းပႆႇယဵၼ် ၵူၼ်းမိူင်းၼႂ်းပိုၼ်ႉတီႈ လႆႈပၢႆႈၽေးသိုၵ်း 2,408 ၵေႃႉယဝ်ႉ။
