ၵူၼ်းဝၢၼ်ႈၸိူဝ်းယူႇ တိၼ်လွႆႁူၼ်း (လႅၼ်လိၼ် ၵေးသီး မိူင်းၵိုင်) ၸိူဝ်းယူႇၾင်ႇမိူင်းၵိုင် လၢႆလၢႆဝၢၼ်ႈ   ႁူဝ်ၵူၼ်း 376 ၵေႃႉ  လႆႈပၢႆႈၽေးသိုၵ်း သွၼ်ႈဝႆႉတီႈမိူင်းၵိုင် မီးၶၢဝ်းတၢင်း 3 – 4 ဝၼ်းယဝ်ႉ ယၢမ်းလဵဝ် လူဝ်ႇတၢင်းၸွႆႈထႅမ် လွင်ႈၵိၼ်ယႅမ် ၶူဝ်းၸႂ်ႉတိုဝ်း  တင်း ၼမ်။

သိုၵ်း RCSS တင်း SSPP ပဵၼ်ပၢင်တိုၵ်းၵၼ် တၢင်းပွတ်းလွႆႁူၼ်း   တႄႇဢဝ်ႁူဝ်လိူၼ်ၵျူႊလၢႆႊ 2021 ၼႆႉမႃးၼၼ်ႉ ၵူၼ်းၼႂ်းၸႄႈဝဵင်းၵေးသီးၵူၺ်းဢမ်ႇၵႃး  ၵူၼ်းမိူင်း ဢၼ်ယူႇ တိၼ်လွႆႁူၼ်းလႅၼ်ၶႅၼ်ႈ  ၵေးသီးလႄႈ မိူင်းၵိုင်  376 ၵေႃႉ ၵေႃႈ လႆႈပၢႆႈမႃးသွၼ်ႈဝႆႉ တီႈဝတ်ႉၼမ်ႉၽဵတ်း ႁူဝ်ၵူၼ်း 90 ၵေႃႉ၊ ဝတ်ႉၽြႃးၸၢၵ်ႈ ႁူဝ်ၵူၼ်း 205 ၵေႃႉ၊  ၊ ဝတ်ႉႁူၺ်ႈလူင် ဢိူင်ႇႁူၺ်ႈလူင် မီးႁူဝ်ၵူၼ်း 81 ၵေႃႉ ။ ဝတ်ႉၵျွင်း 3 တီႈၼႆႉ တင်ႈဝႆႉၼႂ်းၸႄႈဝဵင်းမိူင်းၵိုင်  ။   

ၽူႈၸွႆႈထႅမ် ၵူၼ်းပၢႆႈၽေးသိုၵ်း တီႈမိူင်းၵိုင် ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ႁဝ်းၶႃႈဢၼ်လုၵ်ႉမိူင်းၵိုင်မႃးၼႆႉ ပဵၼ်ဝၢၼ်ႈၸိူဝ်း ဢၼ်ယူႇႁိမ်းၸမ် လွႆႁူၼ်း ၼႆႉဢေႃႈ။  သမ်ႉၵူၼ်း  ဝၢၼ်ႈၽၵ်းႁီႉ လွႆတွင်ႇ ၸိူဝ်းၼႆႉ။  ၸိူဝ်းၶဝ်တႄႉ ဢမ်ႇတၼ်းလႆႈသင်မႃး။ တၼ်းလႆႈၶူဝ်း  ၸပ်းတူဝ် မႃးၵူၺ်း ရူတ်ႉၵႃးထူဝ်ႈ ၽႃႈႁူမ်ႇၶူဝ်းၼွၼ်း ၸိူဝ်းၼႆႉ ဢမ်ႇလႆႈသင်မႃးၶႃႈ။ ယၢပ်ႇၽိုတ်ႇ လွင်ႈ ၼုင်ႈဝႆ  ၶႃႈဢေႃႈ”- ဝႃႈၼႆ။

ၵူၼ်းပၢႆႈၽေးသိုၵ်း တီႈမိူင်းၵိုင် ဢၼ်ပၢႆႈမႃး ႁူဝ်ၵူၼ်း 376 ၵေႃႉၼႆႉ ပဵၼ်ၵူၼ်းဝၢၼ်ႈၽၵ်းႁီႉ လွႆတွင်ႇ ဝၢၼ်ႈၼႆႉတႄႉ ယူႇၼႂ်းၸႄႈဝဵင်းၵေးသီး၊ လိူဝ်ၼၼ်ႉ မိူၼ်ၼင်ႇ ဝၢၼ်ႈၵႅင်း ၵုင်းၺွင်ႇ၊ သီႇၶၢပ်ႇ၊ ၶမ်းၽိူၵ်ႇ၊ ၼမ်ႉပဝ်း၊ ၵုင်းယုမ်ႉ၊ ဝၢၼ်ႈ ၼွင်ၶဵဝ်လႄႈ ဝၢၼ်ႈၼႃးတုၼ်ႇ ၸိူဝ်းၼႆႉသမ်ႉ ပဵၼ်ၼႂ်းၸႄႈဝဵင်းမိူင်းၵိုင် ၼႆယဝ်ႉ။

ၵူၼ်းပၢႆႈၽေးသိုၵ်းၼႆႉသမ်ႉ ၵမ်ႈၼမ် ပဵၼ်ၵူၼ်းထဝ်ႈ လုၵ်ႈဢွၼ်ႇလႄႈ ၼၢင်းယိင်း ယၢမ်းလဵဝ် ၵပ်ႉၵိၼ်းၵၼ် လွင်ႈၶဝ်ႈ ၼမ်ႉတၢင်းၵိၼ် လွင်ႈၼုင်ႈဝႂ် ၸိူဝ်းၼႆႉ။

“ယၢမ်းလဵဝ် လူဝ်ႇတၢင်းၸွႆႈထႅမ် ႁၢဝ်ႈႁႅင်းၶႃႈဢေႃႈ ၶဝ်ႈၼမ်ႉတၢင်းၵိၼ်၊ လွင်ႈၼုင်ႈဝႆ၊ ၽႃႈၵၢင်ယုင်း၊ ယဝ်ႉၵေႃႈ ၶိူင်ႈၸႂ်ႉၼၢင်း ယိင်း ၸိူဝ်းၼႆႉ။ တၢင်းသၢႆၼၼ်ႉသမ်ႉ လႅင်းၾူၼ်းဢမ်ႇလီ လႆႈပဵၼ်တီႈၵူၺ်းလႄႈ လွင်ႈၵၢၼ်ၵပ်းသိုပ်ႇ ၵႂႃႇမႃးႁႃၵၼ် ၵေႃႈ ယၢပ်ႇၽိုတ်ႇ။ လွင်ႈၵိၼ်ယႅမ်ႉတႃႇတေမိူဝ်းၸွႆႈထႅမ်ၵၼ်ၵေႃႈ ပဵၼ်ဢၼ်ယၢပ်ႇၽိုတ်ႇဝႆႉၶႃႈဢေႃႈ”- ၵူၼ်းၼုမ်ႇ ပိုၼ်ႉ တီႈ မိူင်းၵိုင် ၵေႃႉၼိုင်ႈ လၢတ်ႈတီႈ ၽူႈတွႆႇႁွၵ်ႈၼင်ႇၼႆ။

မိူဝ်ႈဝႃး ဝၼ်းတီႈ 8/7/2021 ယူႇတီႈ ၸုမ်းပႃႇတီႇႁူဝ်သိူဝ် မိူင်းၵိုင်၊ ၵူၼ်းမိူင်းၵူၼ်းၼုမ်ႇ ၼႂ်းပွၵ်ႉ 1 ပွၵ်ႉ 5 ပွၵ်ႉ ၸိူဝ်းၼႂ်း ဝဵင်းလႄႈ ၶႅပ်ႇဝဵင်း ၸိူဝ်းၼႆႉ လႆႈဢွၼ်ၵၼ်မိူဝ်းၸွႆႈထႅမ်ပၼ်ၵူၼ်းပၢႆႈၽေး တီႈဢိူင်ႇမိူင်းၶုၼ် တင်း ဢိူင်ႇႁူၺ်ႈလူင်ၵၼ် ၼႆယဝ်ႉ။

ထႅင်ႈၾၢႆႇၼိုင်ႈၵေႃႈ ယၢမ်းလဵဝ်ၼႆႉ တၢင်းပဵၼ်ၶူဝ်ႊဝိတ်ႉ 19 ၽႄႈလၢမ်းႁၢဝ်ႈႁႅင်းထႅင်ႈသေ ၼႂ်းၸႄႈဝဵင်းမိူင်းၵိုင်ၼႆႉ မီးၵူၼ်းတိတ်းၸပ်းၸိူဝ်ႉမႅင်း ၶူဝ်ႊဝိတ်ႉ 19 ၵႂႃႇယဝ်ႉ 3 ၵေႃႉ ဝႃႈၼႆ။

“တႃႇတေလူႇၶၢမ်ႇ ၵူၼ်းမိူင်းႁဝ်းၶႃႈ လွတ်ႈလွတ်ႈလႅဝ်းလႅဝ်း တႃႇမိူဝ်းၸွႆႈထႅမ်ၵူၼ်းပၢႆႈၽေးသိုၵ်း မိူၼ်မိူဝ်ႈၵူႈပွၵ်ႈတႄႉ ၶႂ်ႈယၢပ်ႇယဝ်ႉၶႃႈ။ ယၢမ်းလဵဝ်ၼႆႉ ၽႂ်ၵေႃႈ ဢမ်ႇဢွၵ်ႇႁိူၼ်းယေး ။ဢွၼ်ပိၵ်ႉၽၵ်းတူသေ ယူႇၼႂ်း ႁိူၼ်း   ယွၼ်ႉတၢင်းပဵၼ်ၶူဝ်ႊဝိတ်ႉ 19 ၼႆႉၶႃႈယဝ်ႉ”-  ၽူႈၸွႆႈထႅမ်ၵူၼ်းပၢႆႈၽေးသိုၵ်း တီႈမိူင်းၵိုင် သိုပ်ႇ လၢတ်ႈၼႄၼင်ႇၼႆ။

ယွၼ်ႉၼၼ်လႄႈ တွၼ်ႈတႃႇၵႅတ်ႇၶႄႁႄႉၵင်ႈတၢင်းပဵၼ် ၶူဝ်ႊဝိတ်ႉ 19 ပေႃးတေဢမ်ႇၽႄႈလၢမ်း ထိုင်တီႈၵူၼ်းပၢႆႈၽေး သိုၵ်း ႁူဝ်ၵူၼ်း 376 ၵေႃႉၼၼ်ႉ ယူႇတီႈၸုမ်းတူင်ႉၼိုင် တူင်ႇဝူင်းၵူၼ်း ၸုမ်းပႃႇတီႇ ၸုမ်းၵူၼ်းၼုမ်ႇ မိူင်းၵိုင် ပႂ်ႉႁပ်ႉ လွင်ႈလူႇၶၢမ်ႇ တီႈၽူႈမီးၼမ်ႉၸႂ်ၸေႇတၼႃႇ တီႈၸမ်ၵႆ လွင်ႈၶဝ်ႈၼမ်ႉတင်းၵိၼ် လွင်ႈၼုင်ႈဝႆ ၽႃႈႁူမ်ႇၶူဝ်းၼွၼ်း ၶိူင်ႈၸႂ်ႉၼၢင်းယိင်းလႄႈ ၽႃႈတူမ်းသူပ်း Mask လႄႈ ၼမ်ႉယႃႈလၢင်ႉမိုဝ်း ၸိူဝ်းၼႆႉယူႇ။

ဢိင်ၼိူဝ်လွင်ႈၵူၼ်းပၢႆႈၽေးသိုၵ်း တီႈမိူင်းၵိုင် ႁူဝ်ၵူၼ်း 376 ၵေႃႉၼႆႉ ယွၼ်ႉသိုၵ်း RCSS တင်း SSPP ပဵၼ်ပၢင်တိုၵ်း ၵၼ် ႁၢဝ်ႈႁႅင်း ၸွမ်းလွႆႁူၼ်း။ ၼွၵ်ႈလိူဝ်ၼၼ်ႉ ၼႂ်းၸႄႈဝဵင်းၵေးသီးၵေႃႈ ၵူၼ်းပၢႆႈၽေးသိုၵ်း 2,400 ပၢႆ လႆႈပၢႆႈယၢၼ် ႁိူၼ်းယေးၵၼ် ယွၼ်ႉသိုၵ်းသွင်ၾၢႆႇ ပိုတ်ႇယိုဝ်းၵၼ်မႃး မီးၶၢဝ်းတၢင်း လိူၼ်ပၢႆယဝ်ႉ ပႆႇယဵၼ်။