ၼၢင်းယိင်း သွင်ၵေႃႉ ၵူၼ်းၵျွၵ်ႉမႄး ၵႂႃႇႁဵတ်းႁႆႈသေ ၽွင်းပွၵ်ႈမႃးၵိၼ်ၶဝ်ႈဝၼ်းၼၼ်ႉ ယဵပ်ႇၺႃးမၢၵ်ႇ ၾင်လိၼ်တႅၵ်ႇတိူဝ်ႉသႂ်ႇ လူႉတၢႆ 1 မၢတ်ႇ ၸဵပ်း ႁၢဝ်ႈႁႅင်း 1 ၵေႃႉ ဝႃႈၼႆ။
မိူဝ်ႈဝႃး ဝၼ်းတီႈ 7/7/2021 ယၢမ်းၵၢင်ဝၼ်း မွၵ်ႈ 12 မူင်း ၼၢင်းယိင်းသွင်ၵေႃႉ ၽွင်းၵႂႃႇႁဵတ်းႁႆႈသေ တေပွၵ်ႈမႃးၵိၼ်ၶဝ်ႈ ဝၼ်းတီႈႁိူၼ်းၼၼ်ႉ ယဵပ်ႇၺႃးမၢၵ်ႇ ၾင်လိၼ် တႅၵ်ႇတိူဝ်ႉသႂ်ႇ တီႈႁိမ်းဝၢၼ်ႈၵွင်းၶႃး ဢိူင်ႇလွႆဢၼ် ၸႄႈဝဵင်းၵျွၵ်ႉမႄး ၸိုင်ႈတႆး ပွတ်း ႁွင်ႇ ။
ၽူႈၸွႆႈထႅမ် ၸုမ်းပရႁိတ ၵျွၵ်ႉမႄး ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ၶဝ်သွင်ၵေႃႉ တေပွၵ်ႈမႃးၵိၼ်ၶဝ်ႈဝၼ်းၼႆ သေ မႃးယဵပ်ႇၺႃးမၢၵ်ႇၾင်လိၼ်ၾၢႆႇတူၵ်းဝၢၼ်ႈၵွင်းၶႃးၼၼ်ႉ ၵေႃႉၼိုင်ႈ တိူဝ်ႉၺႃးမၢတ်ႇၸဵပ်းႁၢဝ်ႈႁႅင်း ထႅင်ႈ ၵေႃႉၼိုင်ႈတႄႉ တၼ်းဢဝ်မႃးထိုင်ႁိူၼ်းသေ တၢႆၵႂႃႇပႅတ်ႈ ။ ၵေႃႉမၢတ်ႇၸဵပ်းၼၼ်ႉတႄႉ ဢဝ်မႃး ယူတ်းယႃတီႈတူဝ်ဝႆႉတီႈႁူင်းယႃၵျွၵ်ႉမႄး ”- ဝႃႈၼႆ။
ၼၢင်းယိင်းသွင်ၵေႃႉ ဢၼ်ယဵပ်ႇၺႃးမၢၵ်ႇၼၼ်ႉ ၵေႃႉလူႉတၢႆ ၸိုဝ်ႈႁွင်ႉၼၢင်းဢေးပိၼ်း (နန်းအေးပိန်) ဢႃယု 40 ပၢႆ။ ထႅင်ႈၵေႃႉၼိုင်ႈ ဢၼ်လႆႈတိူဝ်ႉၺႃးမၢတ်ႇၸဵပ်းႁၢဝ်ႈႁႅင်းၼၼ်ႉသမ်ႉ ၸိုဝ်ႈႁွင်ႉ ၼၢင်းဢေးမိၼ်ႉ (နန်းအေးမိန်) ဢႃယု မွၵ်ႈ 50 ပီ။
ၼၢင်းဢေးမိၼ်ႉ ဢႃယုမွၵ်ႈ 50 ပီၼၼ်ႉ မၼ်းၼၢင်း တိူဝ်ႉၸၢၵ်ႇမၢၵ်ႇမၢတ်ႇၸဵပ်း ႁၢဝ်ႈႁႅင်း ၸွမ်းၶႃ ၸွမ်းတူဝ် ၸွမ်း ၵွၵ်းႁူဝ် ၸွမ်းလင်ၸိူဝ်းၼႆႉ။
ဢွင်ႈတီႈမၢၵ်ႇတႅၵ်ႇ တီႈႁိမ်းဝၢၼ်ႈၵွင်းၶႃးၼၼ်ႉ ပဵၼ်ဢွင်ႈတီႈ သိုၵ်း TNLA, SSPP တင်း RCSS ၵႆႉပဵၼ်ပၢင်တိုၵ်းၵၼ် ၵူၼ်းၵျွၵ်ႉမႄး လၢတ်ႈ တီႈၽူႈတွႆႇႁွၵ်ႈၼင်ႇၼႆ။