ၵူၼ်းၼႂ်းၸႄႈဝဵင်းၵေးသီး ၵေႃႉၼိုင်ႈ ၵႂႃႇတူၺ်းၼႃးသေ ၺႃးယိုဝ်းၼႂ်းတူင်ႇၼႃး ပဵၼ်ၼမ်ႉမိုဝ်းၽႂ် ၸုမ်းလႂ် ယိုဝ်းသႂ်ႇ ဢၼ်ဝႃႈ ၼၼ်ႉ ပႆႇလႆႈႁူႉ ။
မိူဝ်ႈဝၼ်းတီႈ 4/7/2021 ယၢမ်းၵၢင်ၼႂ် 8 မူင်း ၸၢႆးသၢင်ႇဢွင်ႇ ဢႃယု မွၵ်ႈ 30 ပီ ၵူၼ်းဝၢၼ်ႈၼႃးတုၼ် ဢိူင်ႇမိူင်းၵၢဝ် ၸႄႈ ဝဵင်းၵေးသီး ၸႄႈတွၼ်ႈလွႆလႅမ် ၸိုင်ႈတႆး ပွတ်းၸၢၼ်း ၺႃးယိုဝ်းၽွင်းမၼ်းၵႂႃႇတူၺ်းၼႃး ၊ တိူဝ်ႉမၢတ်ႇတီႈၶႃလူင် ပဵၼ်ၸုမ်းလႂ်ယိုဝ်းဢမ်ႇႁူႉ ။
ၵူၼ်း ၵေးသီး ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ၸႂ်ႈၶႃႈဢေႃႈ ပဵၼ်ၵူၼ်းဝၢၼ်ႈၼႃးတုၼ် ။ မၼ်းၵႂႃႇ တူၺ်းၼႃးသေ ၺႃးယိုဝ်း တိူဝ်ႉၺႃးတီႈၶႃႈလူင်မၼ်း ၾၢႆႇသၢႆႉ ။ ၵူၺ်းၵႃႈ ပဵၼ်ၽႂ် ၸုမ်းလႂ် ယိုဝ်းသႂ်ႇၼႆ မၼ်းၵေႃႈဢမ်ႇႁူႉၼႆၶႃႈဝႃႇ ”- ဝႃႈၼႆ။
ယၢမ်းလဵဝ် ၸၢႆးသၢင်ႇဢွင်ႇ ၵေႃႉၺႃးယိုဝ်းၼၼ်ႉ ယူတ်းယႃတူဝ်ဝႆႉတီႈဝၢၼ်ႈၼႃးတုၺ်၊ သၢႆသိုၵ်းၾၢႆႇမေႃယႃ SSPP ယူတ်းယႃဝႆႉပၼ်ဝႆႉ ဝႃႈၼႆ။
“မိူဝ်ႈလဵဝ် မၼ်းမီးတီႈဝၢၼ်ႈဢေႃႈ သိုၵ်းၶူဝ်းၶဵဝ်မႃးယႃပၼ်ဝႆႉယူႇ ။ ၵူၼ်းႁိူၼ်းမၼ်းၶႂ်ႈ ယွၼ်းဢဝ်တူဝ်မၼ်းမႃးယႃတီႈၵေးသီးယူႇၵေႃႈ ယွၼ်ႉပိူဝ်ႈပၢင်တိုၵ်းလႄႈ သိုၵ်းၶူဝ်းၶဵဝ်ဝႃႈ တေယူတ်း ယႃပၼ်ၵူၺ်းၼႆဝႃႇ။ ပဵၼ်ၸုမ်းလႂ် ယိုဝ်းသႂ်ႇတႄႉတႄႉဢၼ်ဝႃႈၼၼ်ႉတႄႉဢမ်ႇၸၢင်ႈႁူႉၶႃႈ။ ယွၼ်ႉဝႃႈတီႈၼၼ်ႉ မၼ်းပဵၼ်ၼႂ်းၵေႈပၢင်တိုၵ်းဝႆႉလႄႈ”- ၵူၼ်းပိုၼ်ႉတီႈၵေးသီး သိုပ်ႇလၢတ်ႈၼႄၼင်ႇၼႆ။
လွင်ႈၼႆႉ ၸုမ်းၶၢဝ်ႇၽူႈတွႆႇႁွၵ်ႈ ၵပ်းၸူးၽူႈၶၢၼ် ပၢၵ်ႇ SSPP ၵေႃႈ ဢမ်ႇလႆႈလႄႈဢမ်ႇၸၢင်ႈလႆႈတွင်ႈထၢမ်ငဝ်းလၢႆးပၢင်တိုၵ်းၼႂ်းပိုၼ်ႉတီႈလႄႈတင်းလွင်ႈၵူၼ်းမၢတ်ႇၸဵပ်း။
ၼႂ်းၸႄႈဝဵင်းၵေးသီး ၸိုင်ႈတႆးပွတ်းၸၢၼ်းၼႆႉ သိုၵ်း RCSS တင်း SSPP ပဵၼ်ပၢင် တိုၵ်းၵၼ်မႃးမီးၶၢဝ်းတၢင်း လိူၼ်ပၢႆ ယဝ်ႉ ပႆႇယဵၼ် ။ တေႃႇထိုင်ယၢမ်းလဵဝ် တင်းသွင်ၾၢႆႇတိုၵ်ႉၶဵင်ႈၶႅင် ထႅမ်ႁႅင်းသိုၵ်း ၼင်ႇၵၼ်ထႅင်ႈ။
ထႅင်ႈၾၢႆႇၼိုင်ႈၵေႃႈ ၽွင်းၶၢဝ်းၼႆႉ ပဵၼ်ၶၢဝ်းလူဝ်ႇၽုၵ်ႇသွမ်ႈယဝ်ႉသေတႃႉ ယွၼ်ႉပၢင်တိုၵ်းလႄႈ ၵူၼ်းမိူင်း ၼႂ်းၸႄႈဝဵင်းၵေးသီး ၼပ်ႉႁဵင် ႁၢမ်း သုၼ်ႇၽုၵ်ႇသွမ်ႈ တႃႇလဵင်ႉၼႃႈႁိူၼ်း ၼႂ်းပီတေမႃး။