ၵူၼ်းပၢႆႈၽေးသိုၵ်း တီႈမိူင်းငေႃႉ ၸႄႈဝဵင်းၵျွၵ်ႉမႄး မီးႁူဝ်ၵူၼ်း 652 ၵေႃႉၼႂ်းၼၼ်ႉ ပႃးမႄႈမၢၼ်း 8 ၵေႃႉ လုၵ်ႈဢွၼ်ႇ ဢႃယု 5 ၶူပ်ႇ လူင်းတႂ်ႈ 78 ၵေႃႉ ဢွၼ်ၵၼ်ယၢပ်ႇၽိုတ်ႇလွင်ႈၵိၼ်ယူႇဝႃႈၼႆ။
တႄႇဢဝ် ႁူဝ်လိူၼ်ၵျုႊလၢႆႊ 2021 ၼႆႉမႃး ၵူၼ်းဝၢၼ်ႈ ၼႂ်းဢိူင်ႇတေႃႉသၢင်ႇ မွၵ်ႈ 8 ဝၢၼ်ႈ ပၢႆႈၽေးသိုၵ်း မႃးသွၼ်ႈဝႆႉတီႈမိူင်းငေႃႉ ၸႄႈဝဵင်းၵျွၵ်ႉမႄး ၸိုင်ႈတႆးပွတ်းႁွင်ႇ ႁူဝ်ၵူၼ်း 652 ၵေႃႉ၊ ယွၼ်ႉသိုၵ်း TNLA, SSPP တင်း RCSS ပဵၼ်ပၢင်တိုၵ်းၵၼ် ႁၢဝ်ႈႁႅင်း ၼႆယဝ်ႉ။
ၵူၼ်းၼုမ်ႇ ၽူႈၵႂႃႇၸွႆႈထႅမ် ၵူၼ်းပၢႆႈၽေးသိုၵ်း တီႈမိူင်းငေႃႉ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ယၢမ်းလဵဝ် ၵူၼ်းပၢႆႈ ၽေးသိုၵ်း ႁဝ်းၶႃႈ တီႈမိူင်းငေႃႉ ဢၼ်လူဝ်ႇတၢင်းၸွႆႈထႅမ်တႄႉတႄႉ ပဵၼ်မေႃယႃ ၶႃႈဢေႃႈ။ ယွၼ်ႉဝႃႈ တီႈ ၼၼ်ႉ မီးဝႆႉပႃးမႄႈမၢၼ်း 8 ၵေႃႉ၊ ၵူၼ်းပဵၼ်ၶႆႈပဵၼ်ၼၢဝ် ၸိူဝ်းၼႆႉၵေႃႈမီးၼမ် ။ ယဝ်ႉၵေႃႈ တၢင်းၵိၼ်တၢင်းယႅမ်ႉၸိူဝ်းၼႆႉၶၢတ်ႇဝႆႉဢေႃႈ” – ဝႃႈၼႆ။
ၾၢႆႇၼိုင်ႈ ယၢမ်းလဵဝ် တၢင်းပဵၼ်ၶူဝ်ႊဝိတ်ႉ 19 ၽႄႈလၢမ်းထႅင်ႈႁၢဝ်ႈႁႅင်း၊ တီႈဝဵင်းၵျွၵ်ႉမႄးမီး 80 ပၢႆ၊ လူႉတၢႆယဝ်ႉ 2 ၵေႃႉ၊ ၾၢႆႇၸွႆႈထႅမ်မႆႈၸႂ်ၵူဝ်ၵူၼ်းပၢႆႈၽေးသိုၵ်းတိတ်းၸပ်းတၢင်းပဵၼ်ၶူဝ်ႊဝိတ်ႉၵူၺ်းယဝ်ႉ ဝႃႈၼႆ။
“မိူဝ်ႈလဵဝ်ၼႆႉ တၢင်းပဵၼ်ၶူဝ်ႊဝိတ်ႉ 19 ၽႄႈလၢမ်းႁၢဝ်ႈႁႅင်းမႃးထႅင်ႈ။ ၽႂ်မီးၸိူဝ်ႉမႅင်းႁႃႉဢမ်ႇမီးၼႆ ဢမ်ႇၸၢင်ႈႁူႉလႆႈ။ မိူၼ်ၵူၼ်းၵႂႃႇၸွႆႈထႅမ်ၵူၼ်းပၢႆႈၽေးသိုၵ်းၸိူဝ်းၼၼ်ႉၵေႃႈ ယိုင်ႈၶႅၼ်းလူဝ်ႇဝႆႉသတိ။ ၵူဝ်လႆႈပဵၼ်ၵူၼ်းတေႃႉတၢင်းပဵၼ် ဢဝ်ၵႂႃႇၽႄႈၸပ်းၵူၼ်းပၢႆႈၽေးသိုၵ်း ။ ၵမ်ႉမႃးပႃးၵၼ်တိတ်းၸပ်းတင်းမူတ်းတေယၢပ်ႇၸႂ်။ သင်ဝႃႈဢမ်ႇၵႂႃႇၸွႆႈၼႆၵေႃႈ ၵူၼ်းပၢႆႈၽေးသမ်ႉတေတုၵ်ႉၶ ။ ၵွပ်ႈၼႆလႄႈ ၵူၼ်းၵႂႃႇၸွႆႈၵူၼ်းပၢႆႈၽေးသိုၵ်းၵေႃႈလူဝ်ႇမီးလွင်ႈလွတ်ႈၽေးၶူဝ်ႊဝိတ်ႉ ဢွၼ်တၢင်းယူႇ ”- ၵူၼ်းၼုမ်ႇ ၵႂႃႇၸွႆႈထႅမ် ၵူၼ်းပၢႆႈၽေးသိုၵ်း သိုပ်ႇလၢတ်ႈၼႄ ၼင်ႇၼႆ။
ၵူၼ်းပၢႆႈၽေးသိုၵ်း ဢၼ်ပၢႆႈမႃးသွၼ်ႈဝႆႉတီႈမိူင်းငေႃႉၼႆႉ တီႈဝတ်ႉၵုၼ်ၵွၵ်ႇ (အောင်သုခ) ၼၼ်ႉမီးဝႆႉ ၵူၼ်းဝၢၼ်ႈ ပၢင်မၢၵ်ႇမိုဝ်း ပၢႆႈမႃးသွၼ်ႈဝႆႉ 78 လင်ႁိူၼ်း ႁူဝ်ၵူၼ်း 257 ၵေႃႉ ၼႂ်းၼၼ်ႉ လုၵ်ႈဢွၼ်ႇ ဢႃယု 5 ၶူပ်ႇ လူင်းတႂ်ႈ မီး 48 ၵေႃႉ လႄႈ မႄႈ မၢၼ်း 3 ၵေႃႉ။
တီႈႁူင်းႁဵၼ်း ၸၼ်ႉဢွၼ် မၢၼ်ႈပိုၼ်ႉသမ်ႉ ပဵၼ်ၵူၼ်းဝၢၼ်ႈၵွင်းလွင်းဝွင်း မႃးသွၼ်ႈယူႇတႃႇ 34 လင်ႁိူၼ်း ႁူဝ်ၵူၼ်း 97 ၵေႃႉ ၼႂ်း ၼၼ်ႉ လုၵ်ႈဢွၼ်ႇဢႃယု 5 ၶူပ်ႇလူင်းတႂ်ႈ 10 ၵေႃႉ လႄႈ မႄႈမၢၼ်း 2 ၵေႃႉ။ ယဝ်ႉၵေႃႈ တီႈႁူင်းႁဵၼ်းၼၼ်ႉၵူၺ်း ၵူၼ်းဝၢၼ်ႈတေႃႉသၢင်ႇသမ်ႉမီးတႃႇ လင်ႁိူၼ်း 59 လင် ႁူဝ်ၵူၼ်း 144 ၵေႃႉ ၼႂ်းၼၼ်ႉ လုၵ်ႈဢွၼ်ႇ 6 ၵေႃႉ မႄႈပုမ်ယႂ်ႇ 3 ၵေႃႉ။
တီႈမၢၼ်ႈပိုၼ်ႉသမ်ႉ ၵူၼ်းဝၢၼ်ႈပွၵ်ႉၵၢတ်ႇပၢႆႈမႃး လင်ႁိူၼ်း 11 လင် ႁူဝ်ၵူၼ်း 30 ၵေႃႉ။ လုၵ်ႈဢွၼ်ႇ 2 ၵေႃႉ။ တီႈၵေႃ လိၵ်ႈလၢႆးတႆး မိူင်းငေႃႉသမ်ႉ ပဵၼ်ၵူၼ်းဝၢၼ်ႈပႃႇ ၶႃး လင်ႁိူၼ်း 21 လင် ႁူဝ်ၵူၼ်း 70 ၵေႃႉ လုၵ်ႈဢွၼ်ႇ 7 ၵေႃႉ။
ဝၢၼ်ႈၼမ်ႉသူမ်ႈသမ်ႉ ပဵၼ်ၵူၼ်းဝၢၼ်ႈ သႃႇတီႇၸၢၼ်း၊ သႃႇတီႇႁွင်ႇလႄႈ ပၢင်ႁူႈ လင်ႁိူၼ်း 17 လင် ႁူဝ်ၵူၼ်း 54 ၵေႃႉ လုၵ်ႈဢွၼ်ႇ 5 ၵေႃႉ ။ ၵူၼ်းပၢႆၽေး တင်းမူတ်းႁူမ်ႈၵၼ် တေမီး 652 ၵေႃႉ။ ပႆႇႁူႉပႃး ၸိူဝ်းၵႂႃႇပိုင်ႈယူႇဝႆႉၸွမ်းႁိူၼ်း ပီႈ ၼွင်ႉၽႂ်မၼ်း ပေႃးႁူမ်ႈၵၼ်ပႃး ၸိူဝ်းၼၼ်ႉၸိုင် တေမီးမွၵ်ႈႁဵင် လႆႈႁူႉၼင်ႇၼႆ။
