တၢင်းပဵၼ်ၶူဝ်ႊဝိတ်ႉ 19 လၢမ်းၽႄႈၸပ်းၵၼ်ဝႆး ၼႂ်းၸိုင်ႈတႆး ပွတ်းႁွင်ႇ ဝၼ်းလဵဝ်ၵူၺ်း မီးၵူၼ်းလူႉတၢႆ ယွၼ်ႉတၢင်းပဵၼ်ၶူဝ်ႊဝိတ်ႉ 19 ထိုင် 4 ၵေႃႉ ။
မိူဝ်ႈၼႆႉ ဝၼ်းတီႈ 1/7/2021 ၵူၼ်းမိူင်းတႆး ပွတ်းႁွင်ႇ တၢႆယွၼ်ႉတၢင်းပဵၼ်ၶူဝ်ႊဝိတ်ႉ 19 ၼႂ်းၸႄႈဝဵင်းၵျွၵ်ႉမႄး 1 ၵေႃႉ၊ ၼွင်ၶဵဝ် 1 ၵေႃႉ၊ တၢင်ႉယၢၼ်း 1 ၵေႃႉလႄႈ ၼမ်ႉ ၶမ်း 1 ၵေႃႉ ၼႆယဝ်ႉ။
ၼႂ်းၸႄႈဝဵင်းၵျွၵ်ႉမႄးၼႆႉ ၼႂ်းဝၼ်းလဵဝ် မိူဝ်ႈဝႃး ဝၼ်းတီႈ 30 လိူၼ်ၵျုၼ်ႊၼႆႉၵူၺ်း မီးၵူၼ်းတိတ်းၸပ်း ၸိူဝ်ႉမႅင်း 30 ၵေႃႉ တင်းမူတ်းႁူမ်ႈၵၼ် မီး 58 ၵေႃႉယဝ်ႉ။ လူႉတၢႆ မိူဝ်ႈၼႆႉ ၵေႃႉၼိုင်ႈ ပဵၼ်ၵူၼ်းပွၵ်ႉ 1 ၼႆယဝ်ႉ။
ၼႂ်းၸႄႈဝဵင်းၼွင်ၶဵဝ်သမ်ႉ ဢူးဢွင်ႉမိၼ်ႉ ဢႃယု 65 ပီ လူႉတၢႆ မိူဝ်ႈၼႆႉ တီႈႁူင်းယႃၼွင်ၶဵဝ်၊ တီႈၼမ်ႉၶမ်းၵေႃႈမိူၼ်ၵၼ် လူႉတၢႆ တီႈႁူင်းယႃၼမ်ႉၶမ်း ၵေႃႉၼိုင်ႈ။
ၼွၵ်ႈလိူဝ်ၼၼ်ႉ တီႈၸႄႈဝဵင်းတၢင်ႉယၢၼ်းၵေႃႈ မိူဝ်ႈၼႆႉ ယၢမ်းၵၢင်ၼႂ် ၼၢင်းယိင်း ၵေႃႉၼိုင်ႈ လႆႈလူႉတၢႆ။
တေႃႇထိုင်ဝၼ်းတီႈ 1 လိူၼ်ၵျုၼ်ႊၼႆႉ ၼႂ်းၸိုင်ႈတႆးပွတ်းႁွင်ႇ 16 ၸေႈဝဵင်း မိူၼ်ၼင်ႇ လႃႈသဵဝ်ႈ၊ ၼွင်ၶဵဝ်၊ ၵျွၵ်ႉမႄး၊သီႇပေႃႉ၊ တၢင်ႉယၢၼ်း၊မိူင်းယႆ၊ ၵူတ်ႉၶၢႆ၊ သႅၼ်ဝီ၊ လၢဝ်ႇၵၢႆး၊ မူႇၸေႊ ၊ၼမ်ႉၶမ်း၊ ၼမ်ႉတူႈ ၸိူဝ်းၼႆႉႁူမ်ႈၵၼ်ၵူၼ်းၸပ်းတၢင်းပဵၼ်ၶူဝ်ႊဝိတ်ႉ 19 မီး ႁဵင်ပၢႆ ၵူၼ်းလူႉတၢႆ ဢမ်ႇယွမ်း 20 ၵေႃႉယဝ်ႉ။ ဢၼ်တိုၵ်ႉပႂ်ႉတူၺ်းငဝ်းလၢႆးတၢင်းပဵၼ် မီးၼပ်ႉႁူဝ်ႁဵင်။
ၾၢႆႇၼိုင်ႈပဵၼ်ၶၢဝ်းၵူၼ်းမိူင်းပဵၼ်ဝတ်းပဵၼ်ဢၢၼ် ၼၢဝ်ၶႆႈလိူတ်ႈဢွၵ်ႇၸွမ်းၾိင်ႈၾႃႉရႃႇသီႇလႄႈ ၵူၼ်းႁဵတ်းၵၢၼ်ၾၢႆႇပၢႆးယူႇလီ တီႈတူၼ်ႈတီး ဢၼ်ႁဵတ်း CDM ဝႆႉ ၵေႃႉၼိုင်ႈလၢတ်ႈဝႃႈ သင်ဝႃႈမီးငဝ်းလၢႆး ၵူၼ်ႉၶိုၼ်ႈ မူၺ်ႈၸဵပ်းၸွမ်းတူဝ်ၶိင်း ၊ ႁူဝ်ၶႆႈတႃလႅင်ၶေႃးၸဵပ်း ဢႆ ၸိူဝ်းၼႆႉၸိုင် ယႃႇဝႆႉမဝ်မၢင် ။ ထုၵ်ႇလီလုမ်းလႃးတူၺ်းလူပၢႆးယူႇလီၸဝ်ႈၵဝ်ႇလီလီ ၵၵ်းတူဝ်ယူႇႁိူၼ်း ယူႇႁၢင်ႇၵႆၵူၼ်းႁိူၼ်းၵူၼ်းယေးၵႆႉၵႆႉလၢင်ႉမိုဝ်း၊ ၵိၼ်တၢင်းၵိၼ်ဢၼ်မီးဢႃႁႃရ တဵမ်ထူၼ်ႈသေ ၼွၼ်းပၼ်ဢိမ်ႇဢိမ်ႇ ၵေႃႈယူတ်းယႃလႆႈၽွင်ႈယူႇ ဝႃႈၼႆ။
