ဢွၼ်ႇၸၢႆး ၵေႃႉၼိုင်ႈ မၢၵ်ႇ တႅၵ်ႇတိူဝ်ႉသႂ်ႇလႄႈ မၢတ်ႇၸဵပ်းႁၢဝ်ႈႁႅင်း ၽွင်းၽႃႇၽိုၼ်းယူႇၼႂ်းဝၢင်းႁိူၼ်ၸဝ်ႈၵဝ်ႇ တီႈဝဵင်းၼွင်ၶဵဝ် မိူင်းတႆးပွတ်းႁွင်ႇ။
မိူဝ်ႈဝၼ်းတီႈ 12/05/2026 ဢွၼ်ႇၸၢႆးၵေႃႉၼိုင်ႈ ၸိုဝ်ႈႁွင်ႉ ထႅတ်ႉဢွင်ႇၵူဝ်ႇ (ထက်အောင်ကို) ဢႃယု 19 ပီ ယူႇပွၵ်ႉပႃႇႁၵ်ႉ (ပါဟတ်ရပ်ကွက်) ဝဵင်းၼွင်ၶဵဝ် ၼင်ႈၽႃႇၽိုၼ်းယူႇၼႂ်းဝၢင်းႁိူၼ်းၼၼ်ႉ မၢၵ်ႇ(ဢၼ်ဢမ်ႇတႅၵ်ႇသေၶၢင်ႉၶမ်ဝႆႉၽွင်းပၢင်တိုၵ်းၼၼ်ႉ) ၵိုင်ႉၵၢင်ႉတႅၵ်ႇသႂ်ႇမၼ်းၸၢႆး ထိုင်တီႈလႆႈမၢတ်ႇၸဵပ်း။
မၢၵ်ႇတႅၵ်ႇတိူဝ်ႉသႂ်ႇ တိၼ်လႄႈမိုဝ်းမၼ်းၸၢႆး၊ ထိုင်တီႈလႆႈတႅပ်းပႅတ်ႈ မိုဝ်းၶွၼ်ၼိုင်ႈ – ယၢမ်းလဵဝ်လႆႈသူင်ႇယူတ်းယႃတူဝ်ဝႆႉတီႈႁူင်းယႃ ပၢင်ႇဢူႈလူင် ဝႃႈၼႆ။
ဝဵင်းၼွင်ၶဵဝ်ၼႆႉ ပဵၼ်ဝဵင်းဢၼ်ထူပ်းၽေးပၢင်တိုၵ်း ၽႅၼ်ယၼ်ႇသိုၵ်းမႃးႁိုင်ၼၢၼ်းဝဵင်းၼိုင်ႈ။
ပူၼ်ႉမႃးလၢႆဝၼ်းၼႆႉၵေႃႈ ၵူၼ်းၸၢႆးၵေႃႉၼိုင်ႈ ယူႇဝဵင်းၵျွၵ်ႉမႄး ၵႂႃႇၵဵပ်းလႆႈ မၢၵ်ႇၵွင်ႈလူင်သေ မႃးယႃႉတူၺ်း၊ ဢဝ်မၢၵ်ႇၼၼ်ႉတႅၵ်ႇသႂ်ႇ မိုဝ်းပုတ်း ၶႃပုတ်း ဢူၵ်းမၢင်ႈၽၢၵ်ႇသေ တၢႆထင်တီႈၼႂ်းဝၢင်းႁိူၼ်း။
ယၢမ်းလဵဝ် ၼႂ်းၸႄႈဝဵင်းၼွင်ၶဵဝ် လႄႈ ဝဵင်းၵျွၵ်ႉမႄးၼႆႉ ယၢမ်းလဵဝ်ပၢင်တိုၵ်းယဵၼ်ၵႂႃႇသေတႃႉ ၵူၼ်းမိူင်းပိုၼ်ႉတီႈ တိုၵ်ႉလႆႈၶၢမ်ႇတၢမ်ႇ ၽေးမၢၵ်ႇမႅင်းၾင်လိၼ် တင်း ၶိူင်ႈၵွင်ႈၵၢင်ႇ ဢၼ်ၵိုတ်းၶမ်ဝႆႉမိူဝ်ႈပၢင်တိုၵ်း။
ဢိင်ၼိူဝ်လွင်ႈၼႆႉ ၽူႈမီးပုၼ်ႈၽွၼ်း ၵေႃႈ တိုၵ်းသူၼ်းလၢတ်ႈဝႆႉဝႃႈ – သင်ၽႂ်ႁၼ်မႅၼ်ႈ မၢၵ်ႇမႅင်းၾင်လိၼ်၊ မၢၵ်ႇမိုဝ်ႉၸိုၼ်းယၢမ်း ၼႆ ႁႂ်ႈပွင်ႇၶၢဝ်ႇတီႈၽူႈမီးပုၼ်ႈၽွၼ်းၼႂ်းဝၢၼ်ႈၼႂ်းသူၼ်၊ ယႃႇပေၵႂႃႇယိပ်းၵႂႃႇတိူဝ်ႉ လႃးလႃးဝႃႈၼႆဝႆႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ