ၵူၼ်းပၢႆႈၽေးသိုၵ်း တီႈၸႄႈဝဵင်းၵေးသီး ႁူဝ်ၵူၼ်း ႁဵင်ပၢႆ ပႆႇၸၢင်ႈပွၵ်ႈႁိူၼ်းယေး ယွၼ်ႉသိုၵ်း RCSS တင်း SSPP တိုၵ်ႉသိုပ်ႇပိုတ်းယိုဝ်းၵၼ်ယူႇ။
မိူဝ်ႈဝႃး ဝၼ်းတီႈ 30/6/2021 ယၢမ်းဝၢႆးဝၼ်းမွၵ်ႈ 1 မူင်း သိုၵ်း RCSS တင်း SSPP သိုပ်ႇပဵၼ်ပၢင်တိုၵ်းၵၼ် ႁၢဝ်ႈႁႅင်း တၢင်းပွတ်းလွႆႁူၼ်း ၸႄႈဝဵင်းၵေးသီး ၸႄႈတွၼ်ႈလွႆလႅမ် ၸိုင်ႈတႆးပွတ်းၸၢၼ်း ၵူၼ်းမိူင်းပၢႆႈၽေးသိုၵ်း ၼပ်ႉႁူဝ်ပၢၵ်ႇ လႆႈပၢႆႈၶဝ်ႈဝဵင်းထႅင်ႈ။
ၽူႈၸွႆႈထႅမ် ၵူၼ်းပၢႆႈၽေးသိုၵ်း ၵေႃႉၼိုင်ႈ တီႈၵေးသီး လၢတ်ႈတီႈၽူႈတွႆႇႁွၵ်ႈဝႃႈ- “ၸႂ်ႈၶႃႈဢေႃႈ မိူဝ်ႈဝႃး ၵူၼ်းပၢႆႈ ၽေးသိုၵ်း ၼမ်မႃးထႅင်ႈၶႃႈဢေႃႈ။ ပၢႆႈမႃးထႅင်ႈမိူဝ်ႈဝႃး ၵူၺ်းၵႃႈ ႁူဝ်ၵူၼ်းမီးၵႃႈႁိုဝ်တႄႉ ပႆႇလႆႈႁူႉ တႅတ်ႈတေႃးလီ တိုၵ်ႉၵဵပ်းသဵၼ်ႈသၢႆမၢႆမၼ်းဝႆႉယူႇၶႃႈ။ မိူဝ်ႈၼႆႉၵေႃႈ တိုၵ်ႉလႆႈငိၼ်းသဵင်ၵွင်ႈတႅၵ်ႇထႅင်ႈယူႇၶႃႈ။ ၵူၺ်းၵႃႈ လႆႈငိၼ်း ၾၢႆႇ လဵဝ်ၵူၺ်း”- ဝႃႈၼႆ။
ယၢမ်းလဵဝ် ၵူၼ်းပၢႆႈၽေးသိုၵ်း ဢၼ်ပၢႆႈမႃးသွၼ်ႈဝႆႉ ၸွမ်းဝတ်ႉၵျွင်းမုၼ်ၸဝ်ႈၼႂ်းဝဵင်း ၵေးသီးၼႆႉသမ်ႉ ပဵၼ် ဝတ်ႉသုဝၼ်ႇ ၼသီႇရိ ႁူင်းၶမ်း 200 ပၢႆ၊ ဝတ်ႉၵျွင်းလူင် ပွင်ဢုတ်ႇ 200 ပၢႆ၊ ဝတ်ႉႁေႃၶမ်း မွၵ်ႈ 150 ၵေႃႉ။ ဝတ်ႉၼွင်ယူမ်း – ဝတ်ႉမိူင်း ၼိမ်ၼႆႉသမ်ႉ တေမီး 130 ပၢႆ။ ယဝ်ႉၵေႃႈ ဝတ်ႉၼွင်သွမ်းလႄႈ ဝတ်ႉၼွင်ဝူဝ်း ၸိူဝ်းၼႆႉ။
“တီႈဝတ်ႉၼွင်သွမ်းၼၼ်ႉတႄႉ တေမီးမွၵ်ႈ 300 ပၢႆၼႆႉႁိုဝ် ဢမ်ႇႁူႉ။ ၵမ်ႈၽွင်ႈၵေႃႈ ပၢႆႈၶဝ်ႈမႃးသွၼ်ႈဝႆႉတီႈၼႂ်း ဝဵင်းထႅင်ႈ ၵူၼ်းပၢႆႈၽေးတႄႉ။ တီႈၼွင်ဝူဝ်းတႄႉ ႁဝ်းၶႃႈ ဢမ်ႇယိုၼ်းထိုင်လႆႈလႄႈ မီးၵႃႈႁိုဝ်တႄႉ ပႆႇလႆႈႁူႉႁူဝ်ၵူၼ်းမၼ်း ၶႃႈ”- ၽူႈ ၸွႆႈထႅမ် ၵူၼ်းပၢႆႈၽေး သိုပ်ႇလၢတ်ႈၼႄၼင်ႇၼႆ။
ယၢမ်းလဵဝ် ၵူၼ်းပၢႆႈၽေး ဢၼ်ပၢႆႈမႃးသွၼ်ႈဝႆႉတီႈၵေးသီး ႁူဝ်ၵူၼ်း ႁဵင်ပၢႆၼႆႉ ၵမ်ႈၼမ် တေပဵၼ်ၼၢင်းယိင်း လႄႈ လုၵ်ႈ ဢွၼ်ႇ။ ၵွပ်ႈၼႆလႄႈ ၶိူင်ႈၸႂ်ႉသွႆ ၼၢင်းယိင်း ၸိူဝ်းၼႆႉၵေႃႈ တိုၵ်ႉလူဝ်ႇတၢင်းၸွႆႈထႅမ်ထႅင်ႈတင်းၼမ် ဝႃႈၼႆ။
“ယၢမ်းလဵဝ် ဢၼ်လူဝ်ႇတၢင်းၸွႆႈထႅမ်ထႅင်ႈတႄႉ ၶိူင်ႈၸႂ်ႉသွႆ ၼၢင်းယိင်း။ ယဝ်ႉၵေႃႈ ၶွင်ၵိၼ်ယႅမ်ႉ ၸိူဝ်းၼႆႉ”- ၽူႈၸွႆႈထႅမ် ၵူၼ်းပၢႆႈၽေး သိုပ်ႇလၢတ်ႈၼႄထႅင်ႈၼင်ႇ ၼႆ။
ယၢမ်းလဵဝ် သိုၵ်းတင်းသွင်ၾၢႆႇၼႆႉ တိုၵ်ႉထႅမ်ႁႅင်းသိုၵ်းၼင်ႇၵၼ် ၵူၼ်းမိူင်းတႄႉ မႆႈၸႂ် ၵူဝ်ပဵၼ်ပၢင်တိုၵ်းၵၼ် ၶိုၼ်ႈမႃး ႁၢဝ်ႈႁႅင်းထႅင်ႈၵူၺ်းယဝ်ႉ ၵူၼ်းပၢႆႈၽေးသိုၵ်း ဢၼ် ပၢႆႈႁွတ်ႈထိုင်ၵေးသီး ၵေႃႉၼိုင်ႈလၢတ်ႈ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ