သဵင်ၵွင်ႈပႆႇယဵၼ် ၵူၼ်းပၢႆႈၽေးသိုၵ်း တီႈဝဵင်းၵေးသီး ပႆႇၸၢင်ႈပွၵ်ႈႁိူၼ်းယေး

ၵူၼ်းဝၢၼ်ႈၼႂ်းၸႄႈဝဵင်းၵေးသီး လၢႆးလၢႆဢိူင်ႇပၢႆႈၽေးသိုၵ်းမႃးသွၼ်ႈဝႆႉၸွမ်းဝတ်ႉဝႃးၽႃသိူဝ်ႇ တေႃႇယၢမ်းလဵဝ် ပႆႇၸၢင်ႈပွၵ်ႈႁိူၼ်းယေးၵၼ် ယွၼ်ႉငဝ်းလၢႆး ၼႂ်းပိုၼ်ႉတီႈ ပႆႇၼိမ်ယဵၼ် ဝႃႈၼႆ။

တႄႇဢဝ် ဝၼ်းတီႈ 1/6/2021 မႃးထိုင်ယၢမ်းလဵဝ်   ၵူၼ်းဝၢၼ်ႈ ၼႂ်းဢိူင်ႇၼွင်သွမ်း မိူင်းၵၢဝ်လႄႈ ႁူဝ်ပူင်ႇ ၸိူဝ်း  ပၢႆႈၽေးသိုၵ်း ဢၼ်ပၢႆႈမႃး သွၼ်ႈဝႆႉတီႈဝတ်ႉၼွင်သွမ်း၊ ဝတ်ႉသုဝၼ်ႇၼသီႇရိ ႁူင်းၶမ်း၊ ဝတ်ႉၵျွင်းလူင်သွင်လၵ်း၊ ဝတ်ႉၼွင်ဝူဝ်း မိူင်းၼၢင်းလႄႈ ဝတ်ႉၼွင်သွမ်း ၼႂ်းၸႄႈဝဵင်းၵေးသီး ၸႄႈတွၼ်ႈလွႆလႅမ် ၸိုင်ႈတႆးပွတ်းၸၢၼ်း ယွၼ်ႉ SSPP တင်း RCSS  တိုၵ်းတေႃးပိုတ်းယိုဝ်းတေႃႇၵၼ် ၶဵင်ႈၶႅင်ၵၢၼ်သိုၵ်းတေႃႇၵၼ်လႄႈ ပႆႇၸၢင်ႈပွၵ်ႈၶိုၼ်းႁိူၼ်းယေး ဝႃႈၼႆ။

ၽူႈၸွႆႈထႅမ် ၵူၼ်းပၢႆႈၽေးသိုၵ်း တီႈၵေးသီး လၢတ်ႈတီႈၽူႈတွႆႇႁွၵ်ႈဝႃႈ – “ယၢမ်းလဵဝ် တီႈၼွင်သွမ်းၼႆႉ  မီးႁူဝ်ၵူၼ်း မွၵ်ႈ 700 ။   ထူပ်းတၢင်းယၢပ်ႇၽိုတ်ႇၵၼ် လွင်ႈၼမ်ႉၸႂ်ႉ/ ၼမ်ႉၵိၼ် ၸိူဝ်းၼႆႉ။ ယဝ်ႉၵေႃႈ ႁွင်ႈၽၢႆႈ ၸိူဝ်း ၼႆႉၵေႃႈ မီးဢေႇ ဢၼ်ၼႆႉၵေႃႈ ယၢပ်ႇၽိုတ်ႇၵၼ်ၶႃႈဢေႃႈ။ လွင်ႈၵိၼ်ယႅမ်ႉတႄႉ ပေႃးၶၢဝ်းႁိုင်ၸိုင် တေၵိၼ်းၸႂ်ၵၼ်ၶႃႈ ဢေႃႈ”- ဝႃႈၼႆ။

ယၢမ်းလဵဝ် ၵူၼ်းပၢႆႈၽေးသိုၵ်း ဢၼ်ပၢႆႈမႃးသွၼ်ႈဝႆႉ တီႈဝတ်ႉၼွင်သွမ်းၼႆႉသမ်ႉ ပဵၼ်ၵူၼ်းဝၢၼ်ႈမၢၵ်ႇဝၢဝ်း၊ ၼမ်ႉဢူပ်း၊ ဝၢၼ်ႈလၵ်း၊ ႁူဝ်ၽၢႆလႄႈ ဝၢၼ်ႈႁူဝ်ၼႃး ၸိူဝ်းၼႆႉ။

“ပၢင်တိုၵ်းတင်းသွင်ၾၢႆႇတႄႉ တိုၵ်ႉပဵၼ်ယူႇ ၵူၺ်းၵႃႈ ဢမ်ႇပေႃးႁႅင်း မိူၼ်မိူဝ်ႈပူၼ်ႉမႃးၼၼ်ႉ တၢင်းၾၢႆႇၶူဝ်းၶဵဝ် လွင်ႈၶဵင်ႈ ၶႅင်ၵၢၼ်သိုၵ်းတေႃႇၵၼ် ၸိူဝ်းၼႆႉၵေႃႈ တိုၵ်ႉမီးယူႇ။ တၢင်းၾၢႆႇၶူဝ်းၶဵဝ်  တိုၵ်ႉထႅမ်ႁႅင်းသိုၵ်းမႃးထႅင်ႈယူႇ။ ပၢင်တိုၵ်း တႄႉ တေလႅပ်ႈပဵၼ်ၶၢဝ်းႁိုင်ယူႇ”-  ၵူၼ်းပိုၼ်ႉတီႈ ၵေးသီး ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈၼင်ႇၼႆ။

ၵူၼ်းပၢႆႈၽေးသိုၵ်း တီႈၸႄႈဝဵင်းၵေးသီးၼႆႉ ဝတ်ႉသုဝၼ်ႇၼသီႇရိ ႁူင်းၶမ်း မီးမွၵ်ႈ 80 ၵေႃႉ၊ ဝတ်ႉၵျွင်းလူင် 2 လၵ်း 100 ပၢႆ၊ ဝတ်ႉ သူၼ်မွၼ်း မွၵ်ႈ 70 ၵေႃႉလႄႈ ဝတ်ႉၼွင်ဝူဝ်း မိူင်းၼၢင်း ၵမ်ႈၼမ် ပဵၼ်ၵူၼ်းၼႂ်းဢိူင်ႇၼွင်သွမ်း၊ မိူင်း ၵၢဝ်လႄႈ ႁူဝ်ပူင်ႇ ၸိူဝ်းၼႆႉ။

ယၢမ်းလဵဝ်သမ်ႉ ပဵၼ်ၶၢဝ်းလူဝ်ႇၽုၵ်ႇသွမ်ႈၵေႃႈပိူင်ၼိုင်ႈသေ ၵူၼ်းပၢႆႈၽေးသိုၵ်း တီႈၸႄႈဝဵင်းၵေးသီး မုင်ႈမွင်း ႁႂ်ႈ ပၢင်တိုၵ်းတင်းသွင်ၾၢႆႇ ၵိုတ်းတိုၵ်းတေႃႇၵၼ် ၼႆယဝ်ႉ။