သိုၵ်းမၢၼ်ႈဢဝ်ႁူမ်ႇလူမ်ႈ ၸွမ်းသဵၼ်ႈတၢင်း မိူင်းၼွင် – ၵေးသီး

ၶွင်ႇသီႇသိုၵ်းမၢၼ်ႈ မိူၵ်ႈမႂ်ႈ ဢဝ်ႁူမ်ႇလူမ်ႈၸွမ်းတၢင်းၵႃးလူင် ၼႂ်းၵႄႈ မိူင်းၼွင် – ၵေးသီး တင်းၼမ်လၢႆ ဝႃႈၼႆ။

ဝၼ်းတီႈ 23-24/6/2021 ၶၢဝ်းတၢင်း 2 ဝၼ်းမႃးၼႆႉ ၶွင်ႇသီႇသိုၵ်းမၢၼ်ႈ မိူၵ်ႈမႂ်ႈ ထႅမ်ႁႅင်းၵူၼ်း ဢဝ်ႁူမ်ႇလူမ်ႈ ၸွမ်းသဵၼ်ႈ တၢင်းလူင် ၼႂ်းၵႄႈမိူင်းၼွင် – ၵေးသီး ၼႂ်းၸႄႈဝဵင်းၵေးသီး ၸႄႈတွၼ်ႈလွႆလႅမ် ၸိုင်ႈတႆးပွတ်းၸၢၼ်း ၊ မီးၶၢဝ်ႇဝႃႈ တေမီးထႅဝ်ၵႃးသူင်ႇၶူဝ်းသိုၵ်းမၢၼ်ႈ   ၶိုၼ်ႈတၢင်းပွတ်းႁွင်ႇ ၼႆယဝ်ႉ။

ၽူႈတူင်ႉၼိုင် ၼႂ်းတူင်ႇဝူင်းၵူၼ်း ၵေးသီး ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ မိူဝ်ႈဝႃးတင်းမိူဝ်ႈၼႆႉမႃး ၸွမ်းသဵၼ်ႈ တၢင်းလူင် မိူင်းၼွင် တေႃႇထိုင် ၵေးသီးၼႆႉ ပဵၼ်သိုၵ်းမၢၼ်ႈ ဢဝ်ႁူမ်ႇလူမ်ႈဝႆႉမူတ်းၶႃႈယဝ်ႉ။ လႆႈငိၼ်းဝႃႈ သိုၵ်းမၢၼ်ႈ တေတေႃႉႁႅင်းသိုၵ်းၶဝ် လုၵ်ႉတၢင်းပွတ်းၸၢၼ်း ၵႂႃႇတၢင်းပွတ်းႁွင်ႇ။ ၵူၺ်းၵႃႈ ၶဝ်ပႂ်ႉႁဵတ်းၼၼ်ၵူၺ်း လွင်ႈၵူတ်ႇထတ်း ၵူၼ်းမိူင်းၵႂႃႇမႃးတႄႉ ဢမ်ႇမီး” –  ဝႃႈၼႆ။

ယၢမ်းလဵဝ်ၼႆႉသမ်ႉ ၼႂ်းၸႄႈဝဵင်းၵေးသီး သိုၵ်း SSPP တင်း RCSS ပိုတ်ႇပၢင်တိုၵ်းၵၼ်တေႃႇမႃး ႁၢဝ်ႈႁႅင်း တႄႇဢဝ် ႁူဝ် လိူၼ်ၼႆႉမႃးတေႃႇထိုင်ယၢမ်းလဵဝ် ပႆႇယဵၼ် ၼႆယဝ်ႉ။

ၵူၼ်းမိူင်းပိုၼ်ႉတီႈ ၵေးသီး ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ယၢမ်းလဵဝ် ပၢင်တိုၵ်းဢၼ်ပဵၼ်ယူႇၼႂ်းၵေးသီး ၵမ်ႈ ၼမ်ၼႆႉ တေပဵၼ်ၼႂ်းၵႄႈမိူင်းၼွင် – ၵေးသီး။ လွင်ႈသိုၵ်းမၢၼ်ႈ မႃးဢဝ်ႁူမ်ႇလူမ်ႈၼႆႉ ၵူဝ်သိုၵ်းတႆး ပႂ်ႉငွႆးယိုဝ်းၶဝ်ယူဝ်ႉ။ မိူဝ်ႈပူၼ်ႉမႃးၼၼ်ႉ ၺႃးယိုဝ်းယဝ်ႉၵမ်းၼိုင်ႈ သိုၵ်းမၢၼ်ႈ တၢႆၵေႃႉ မၢတ်ႇ 3 ၵေႃႉ လူးၼၼ်ႉ။ ယွၼ်ႉၼၼ်လႄႈ ၶဝ်ၵူဝ် ပိူၼ်ႈငွႆးယိုဝ်းၶဝ်ယူဝ်ႉ ထၢင်ႇတႄႉ”- ဝႃႈၼႆ။

ၵူၺ်းၵႃႈ ပၢင်တိုၵ်း တၢင်းၵေးသီးမိူဝ်ႈၼႆႉသမ်ႉ ယဵၼ်ၼိမ်ဝႆႉ သဵင်ၵွင်ႈပႆႇႁၼ်တႅၵ်ႇတၢင်းလႂ် ၽူႈတူင်ႉၼိုင် တူင်ႇဝူင်း ၵူၼ်းၵေးသီး သိုပ်ႇလၢတ်ႈၼႄၼင်ႇၼႆ။

“မိူဝ်ႈၼႆႉ ပၢင်တိုၵ်း သိုၵ်းတႆးၼင်ႇၵၼ်တႄႉ ယဵၼ်ဝႆႉ ယွၼ်ႉၵႃးသိုၵ်းမၢၼ်ႈ တေလတ်းၽၢၼ်ႇမႃးတၢင်းၼႆႉလႄႈ သိုၵ်း မၢၼ်ႈၸႂ်ႉၶဝ်ၵိုတ်းဝႆႉၶႃႈယူဝ်ႉ။ ယွၼ်ႉဝႃႈ သိုၵ်းမၢၼ်ႈ တေၸႂ်ႉၶဝ်ယၢၼ်ၵႆဝႆႉတၢင်းလူင် ၸိူဝ်းၼႆႉၵေႃႈ တေပႃးၵႃႈ”- ဝႃႈၼႆ။  

တႄႇဢဝ် ဝၼ်းတီႈ 1/6/2021 ၼႆႉမႃး သိုၵ်း RCSS တင်း SSPP တႄႇပၢင်တိုၵ်းၵၼ်မႃး ၼႂ်းၸႄႈဝဵင်းၵေးသီး ၸိုင်တႆး ပွတ်းၸၢၼ်း တေႃႇထိုင်ယၢမ်းလဵဝ် ပႆႇယဵၼ် ၵူၼ်းမိူင်း ၼႂ်းဢိူင်ႇမိူင်းၵၢဝ်၊ ႁူဝ်ပူင်ႇလႄႈ ၼွင်သွမ် လႆႈပၢႆႈ ၼပ်ႉႁဵင် ၼႆ ယဝ်ႉ။