TNLA တင်း RCSS ပဵၼ်ပၢင်တိုၵ်းၵၼ် တီႈၸႄႈဝဵင်းၵျွၵ်ႉမႄး ၸိုင်ႈတႆး ပွတ်းႁွင်ႇ ၶၢဝ်းတၢင်း မွၵ်ႈ 1 ၸူဝ်ႈမူင်းပၢႆ ဝႃႈၼႆ။
မိူဝ်ႈဝႃး ဝၼ်းတီႈ 22/6/2021 ယၢမ်းၵၢင်ၶမ်ႈ မွၵ်ႈ 6 မူင်း သိုၵ်း TNLA တင်း RCSS ပဵၼ်ပၢင်တိုၵ်းၵၼ် ၼႂ်းဢိူင်ႇတေႃႉ သၢင်ႇ ၸႄႈဝဵင်းၵျွၵ်ႉမႄး ၸိုင်ႈတႆးပွတ်းႁွင်ႇ သွင်ၾၢႆႇ ပဵၼ်ပၢင်တိုၵ်းၵၼ် ႁိုင်မွၵ်ႈ 1 ၸူဝ်ႈမူင်းပၢႆ ၊ ၵူၼ်းပၢႆႈၽေးသိုၵ်းၸုပ်ႈမႂ်ႇတႄႉပႆႇမီးၼင်ႇၵဝ်ႇလႆႈႁူႉၼင်ႇၼႆ။
ၸဝ်ႈႁၢၼ် ၶမ်းၸၢမ်ႇ ၽူႈၶၢၼ်ပၢၵ်ႇ RCSS လၢတ်ႈတီႈၽူႈတွႆႇႁွၵ်ႈဝႃႈ – “မႅၼ်ႈဢေႃႈ လႆႈပဵၼ်ပၢင်တိုၵ်းၵၼ်တီႈၵျွၵ်ႉမႄး ၵဵဝ်ႇလူၺ်ႈ လွင်ႈပၢင်တိုၵ်းလၢႆးႁူဝ်ယွႆႈမၼ်းတႄႉ ပႆႇလႆႈႁူႉ”- ဝႃႈၼႆ။
တၢင်းၾၢႆႇၽူႈၶၢၼ်ပၢၵ်ႇ TNLA တႄႉ ယူႇတီႈၽူႈတွႆႇႁွၵ်ႈၵပ်းၸူး ဢမ်ႇတိတ်း ပိၵ်ႉၶိူင်ႈဝႆႉ ဝႃႈၼႆ။
ၽူႈတူင်ႉၼိုင် တူင်ႇဝူင်းၵူၼ်း ၼႂ်းၵျွၵ်ႉမႄး ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ၸႂ်ႈၶႃႈဢေႃႈ သိုၵ်း TNLA တင်း RCSS ပဵၼ်ပၢင်တိုၵ်းၵၼ် တေႁိုင်မွၵ်ႈ 1 ၸူဝ်ႈ မူင်းၼႆႉၶႃႈ။ သိုၵ်း TNLA သမ်ႉ မီးယူႇဝႆႉ တၢင်းဝၢၼ်ႈၵျႃႇပူဝ်ႉလႄႈ ၵွင်းလွင်းဝွင်း သိုၵ်း RCSS သမ်ႉမီးယူႇတၢင်းတေႃႉသၢင်ႇ ႁဵတ်းၼႆၶႃႈဢေႃႈ။ ပၢင်တိုၵ်းဢၼ် ပဵၼ်မိူဝ်ႈဝႃးၼႆႉ ႁႂ်ႈပဵၼ် ႁၢဝ်ႈႁႅင်းမိူၼ် တၢင်းၼမ်ႉတူႈၼၼ်ႉတႄႉ ဢမ်ႇၸႂ်ႈၼင်ႇၵဝ်ႇ” – ဝႃႈၼႆ။
ၼႂ်းဢိူင်ႇတေႃသၢင်ႇ ၸႄႈဝဵင်းၵျွၵ်ႉမႄးၼႆႉ ၵူၼ်းမိူင်းၼႂ်းပိုၼ်ႉတီႈ မွၵ်ႈ 5-6 ဝၢၼ်ႈ လႆႈဢွၼ်ၵၼ်ပၢႆႈၽေးသိုၵ်း မီး ၶၢဝ်း တၢင်း 6 လိူၼ်ပၢႆပႆႇၸၢင်ႈပွၵ်ႈႁိူၼ်းယေးၵၼ်ၵေႃႈမီး။ ယၢမ်းလဵဝ် ဢၼ်ၵိုတ်း ယူႇဝႆႉတီႈႁိူၼ်းယေးၵေႃႈမီးဝႆႉယူႇ ၵမ်ႈၼမ် တေပဵၼ်ၵူၼ်းထဝ်ႈ။ ၵူၼ်းၼုမ်ႇ ၸိူဝ်းၼႆႉတႄႉ လႆႈဢွၼ်ၵၼ်ပၢႆႈၵႂႃႇႁဵတ်းၵၢၼ် တၢင်ႇတီႈ တၢင်ႇမိူင်း ။
“ၼႂ်းဢိူင်ႇတေႃႉသၢင်ႇၼႆႉ ၵူၼ်းၼုမ်ႇ ၵမ်ႈၼမ် ဢွၼ်ၵၼ်ပၢႆႈၵႂႃႇႁဵတ်းၵၢၼ် တၢင်းမိူင်းၶႄႇ မိူင်းထႆး ၸိူဝ်းၼႆႉၵေႃႈ ၼမ် ၼႃႇ။ ပၢႆႈၶဝ်ႈတၢင်ႇဝဵင်း ၸိူဝ်းၼႆႉၵေႃႈမီး။ ဢၼ်ၵိုတ်းယူႇဝႆႉတီႈႁိူၼ်းယေးတႄႉ တေပဵၼ်ၵူၼ်းထဝ်ႈ ၸိူဝ်းၼႆႉ ၵူၺ်းၶႃႈ။ တင်ႈတႄႇ သိုၵ်း TNLA တင်း RCSS ပဵၼ်ပၢင်တိုၵ်းၵၼ် မႃးတၢင်းပွတ်းၼၼ်ႉႁၢဝ်ႈႁႅင်းသေ မၢင်ဝၢၼ်ႈ ပၢႆႈၽေး သိုၵ်းဝႆႉ တေႃႇထိုင်ယၢမ်းလဵဝ် ပႆႇၸၢင်ႈပွၵ်ႈမိူဝ်းၵေႃႈမီးၶႃႈယဝ်ႉ”- ၽူႈတူင်ႉၼိုင် ၼႂ်းတူင်ႇဝူင်းၵူၼ်း သိုပ်ႇလၢတ်ႈၼႄ ၼင်ႇၼႆ။
ၵူၼ်းပိုၼ်ႉတီႈ ဢၼ်လႆႈပၢႆႈၽေးသိုၵ်း ဝႆႉပဵၼ်ၵူၼ်းဝၢၼ်ႈတၢင်းပွတ်းတေႃႉသၢင်ႇ မိူၼ်ၼင်ႇ ဝၢၼ်ႈၵွင်းလွင်းဝွင်း၊ ဝၢၼ်ႈ တေႃႉသၢင်ႇ၊ ဝၢၼ်ႈပႃႇၶႃး၊ ဝၢၼ်ႈၵျႃႇပူဝ်ႉလႄႈ ဝၢၼ်ႈမိူင်းၵုင်း ၸိူဝ်းၼႆႉ။
ဝၢႆးသေ ၶွင်ႇသီႇသိုၵ်းမၢၼ်ႈ မိူၵ်ႈမႂ်ႈ ယိုတ်းဢႃႇၼႃႇ ၸိုင်းမိူင်းမႃးၼႆႉ သိုၵ်းၸၢဝ်းၶိူဝ်းၼင်ႇၵၼ်၊ ၶွင်ႇသီႇသိုၵ်းမၢၼ်ႈ မိူၵ်ႈမႂ်ႈ တင်း သိုၵ်းၸၢဝ်းၶိူဝ်း ၸိူဝ်းၼႆႉ လႆႈပဵၼ်ပၢင်တိုၵ်းၵၼ် ၼႂ်းၸိုင်ႈတႆးပွတ်းႁွင်ႇမႃးႁၢဝ်ႈႁႅင်း ၼႆယဝ်ႉ။
