ၵူၼ်းပၢႆႈၽေးသိုၵ်း တီႈဝတ်ႉၼွင်သွမ်း ႁူဝ်ၵူၼ်း 400 ပၢႆ ၼႂ်းၼၼ်ႉ တႃႇ 95 ၵေႃႉ လူဝ်ႇတၢင်းၸွႆႈထႅမ် ၽႃႈႁူမ်ႇၶူဝ်း ၼွၼ်းၵၼ် ယွၼ်ႉပႆႇၵုမ်ႇလုမ်ႇၵၼ်။
တႄႇဢဝ် ဝၼ်းတီႈ 1/6/2021 မႃးတေႃႇထိုင်ယၢမ်းလဵဝ် ၵူၼ်းဝၢၼ်ႈလၵ်း၊ ၼမ်ႉဢူပ်းလႄႈ ဝၢၼ်ႈမၢၵ်ႇဝၢဝ်း ဢၼ်ပၢႆႈမႃး သွၼ်ႈဝႆႉတီႈဝတ်ႉၼွင်သွမ်း ၸႄႈဝဵင်းၵေးသီး ၸႄႈတွၼ်ႈလွႆလႅမ် ၸိုင်ႈတႆးပွတ်းၸၢၼ်း ႁူဝ်ၵူၼ်း 487 ၵေႃႉ ၼႂ်းၼၼ်ႉ တႃႇ 95 ၵေႃႉ လူဝ်ႇတၢၼ်းၸွႆႈထႅမ် ၽႃႈႁူမ်ႇၶူဝ်းၼွၼ်း ၼႆယဝ်ႉ။
ၽူႈၸွႆႈထႅမ် ၵူၼ်းပၢႆႈၽေးသိုၵ်း တီႈၵေးသီး ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “မိူဝ်ႈလဵဝ် ဢၼ်လူဝ်ႇတၢင်းၸွႆႈထႅမ် ႁႅင်းတႄႉ ၵူၼ်းပၢႆႈၽေးႁဝ်းၶႃႈ တီႈၼွင်သွမ်း ႁူဝ်ၵူၼ်း 95 ၵေႃႉ ၶၢတ်ႇၽႃႈႁူမ်ႇၶူဝ်းၼွၼ်းၵၼ်ဝႆႉၶႃႈဢေႃႈ ပႆႇၵုမ်ႇလုမ်ႇ ၵၼ်ၶႃႈ။ ယွၼ်ႉဝႃႈ မိူဝ်ႈၽွင်းပၢႆႈမႃးၼၼ်ႉ ဢမ်ႇတၼ်းလႆႈသင်၊ တေႃႇထိုင်ယၢမ်းလဵဝ်ၼႆႉ ပႆႇမီးၸဝ်ႈတႃႇၼၶဝ် လူႇ တၢၼ်းၵမ်ႉထႅမ်ၸွႆးမႃႈၶႃႈ”- ဝႃႈၼႆ။
ၵူၼ်းပၢႆႈၽေးသိုၵ်း တီႈၸႄႈဝဵင်းၵေးသီးၼႆႉ မႃးမီးတီႈ ဝတ်ႉၼွင်သွမ်း 487 ၵေႃႉ၊ ဝတ်ႉသုဝၼ်ႇၼသီႇရိ ႁူင်းထမ်း မွၵ်ႈ 80 ၵေႃႉ၊ ဝတ်ႉၵျွင်းလူင် 2 လၵ်း 100 ပၢႆ၊ ဝတ်ႉ သူၼ်မွၼ်း မွၵ်ႈ 70 ၵေႃႉလႄႈ ဝတ်ႉၼွင်ဝူဝ်း မိူင်းၼၢင်း ၵမ်ႈၼမ် ပဵၼ်ၵူၼ်းၼႂ်းဢိူင်ႇၼွင်သွမ်း၊ မိူင်းၵၢဝ်လႄႈ ႁူဝ်ပူင်ႇ ၸိူဝ်းၼႆႉ။
“တီႈၵေးသီးၼႆႉ တင်းမူတ်းပေႃးႁူမ်ႈၵၼ်ၼႆၵူၼ်းၸပ်းတၢင်းပဵၼ် တေမီးမွၵ်ႈ 700 ပၢႆ ပႆႇၸၢင်ႈပွၵ်ႈႁိူၼ်း ယေးၵၼ် ၼႂ်းသွင်သၢမ်ဝၼ်းမႃးၼႆႉ ဢၼ်ပွၵ်ႈမိူဝ်းၵေႃႈ မိူဝ်းၵမ်ႈၽွင်ႈယဝ်ႉၶႃႈ။ ၸိူဝ်းပွၵ်ႈမိူဝ်းၼၼ်ႉတႄႉ ၽႃႈႁူမ်ႇၶူဝ်းၼွၼ်း ၶဝ်ၸိူဝ်းၼၼ်ႉ ဢဝ်ဝႆႉၼႂ်း ထူဝ်ႈ/ ၼႂ်းၵႃးၸိူဝ်းၼၼ်ႉဝႆႉ ဢမ်ႇၶၢမ်ႇဢဝ်လူင်းထူဝ်ႈ/ လူင်းၵႃးၵၼ်။ သင်ဝႃႈ ငဝ်းလၢႆးပၢင်တိုၵ်းဢမ်ႇလီၶိုၼ်ႈမႃးၼႆ တေ ၸၢင်ႈၼႅတ်ႈပၢႆႈဢွၵ်ႇမႃးလႆႈၵမ်းလဵဝ်”- ၽူႈၸွႆႈထႅမ် ၵူၼ်းပၢႆႈၽေးသိုၵ်း ၵေးသီး သိုပ်ႇလၢတ်ႈၼႄၼင်ႇၼႆ။
ယၢမ်းလဵဝ် ပၢင်တိုၵ်း တၢင်းပွတ်းၼွင်သွမ်း – ၵေးသီးတႄႉ ယဵၼ်လူင်းဝႆႉယဝ်ႉသေတႃႉ ၵူၼ်းပၢႆႈၽေးသိုၵ်း ပႆႇ ႁတ်းပွၵ်ႈႁိူၼ်းယေးၵၼ် ယွၼ်ႉပႆႇမီးလွင်ႈႁူမ်ႇလူမ်ႈ။ တၢင်းဝၢၼ်ႈၽိူင်း – မိူင်းၼၢင်းတႄႉ တိုၵ်းသိုပ်ႇ ပဵၼ်ၵၼ်ယူႇ ၵူႈဝၼ်း ၵူၼ်းပိုၼ်ႉတီႈ ၵေးသီး ၵေႃႉၼိုင်ႈ လၢတ်ႈၼႄၼင်ႇၼႆ။
“ယူႇတီႈႁဝ်းၶႃႈ ၵူၼ်းမိူင်းတႄႉ တုၵ်းယွၼ်းႁႂ်ႈပၢင်တိုၵ်းၸဵဝ်းယဝ်ႉ ၸဵဝ်းယဵၼ် ယွၼ်ႉဝႃႈ မိူဝ်ႈလဵဝ်ၼႆႉ ပဵၼ်ၶၢဝ်းၵူၼ်းမိူင်း လူဝ်ႇၽုၵ်ႇသွမ်ႈၵၼ်ယဝ်ႉလႄႈ သင်ဢမ်ႇလႆႈၽုၵ်ႇၶၢဝ်းၼႆႉ တႃႇပီၼႃႈ တေဢမ်ႇမီးသင်ၵိၼ်ယဝ်ႉ ယွၼ်ႉၼၼ်ႉ ယွၼ်း ႁႂ်ႈသိုၵ်းသွင်ၸုမ်းၼၼ်ႉ ၸဵဝ်းဢုပ်ႇဢူဝ်းၵၼ်ဝႆးဝႆးသေၵမ်း”- ၽူႈတူင်ႉၼိုင် ၼႂ်းတူင်ႇဝူင်းၵူၼ်း ၵေးသီး ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈၼင်ႇၼႆ။
ယၢမ်းလဵဝ်ၼႆႉ သိုၵ်းတင်းသွင်ၾၢႆႇ တိုၵ်ႉထႅမ်ႁႅင်းသိုၵ်းၼင်ႇၵၼ်ထႅင်ႈတင်းၼမ် ယဝ်ႉၵေႃႈ တၢင်းၾၢႆႇၶွင်ႇသီႇသိုၵ်းမၢၼ်ႈ မိူၵ်ႈမႂ်ႈၵေႃႈ ထႅမ်ႁႅင်းသိုၵ်း တူင်ႉၼိုင် ၸွမ်းတၢင်းၵႃးလူင် မိူင်းၵဝ် – ၼွင်သွမ်း ၸိူဝ်းၼႆႉထႅင်ႈ တင်းၼမ် ၼႆယဝ်ႉ။
