ၵူၼ်းပၢႆႈၽေးသိုၵ်း တီႈၵေးသီး ႁူဝ်ၵူၼ်းၸမ်ႁဵင် ပႆႇၸၢင်ႈပွၵ်ႈႁိူၼ်းယေးၵၼ် မီးၶၢဝ်းတၢင်း 20 ဝၼ်းပၢႆယဝ်ႉ ဝႃႈၼႆ။
ၵူၼ်းဝၢၼ်ႈတၢင်းဢိူင်ႇၼွင်သွမ်း၊ ဢိူင်ႇမိူင်းၵၢဝ်လႄႈ ဢိူင်ႇ ႁူဝ်ပူင်ႇ ၸႄႈဝဵင်းၵေးသီး ဢွၼ်ၵၼ်ပၢႆႈၽေးသိုၵ်း မႃးသွၼ်ႈဝႆႉၸွမ်းဝတ်ႉၵျွင်းမုၼ်ၸဝ်ႈ တေႃႇထိုင်ယၢမ်းလဵဝ် မီးၶၢဝ်းတၢင်း 20 ဝၼ်းပၢႆယဝ်ႉ ပႆႇၸၢင်ႈပွၵ်ႈႁိူၼ်းယေး ႁူဝ်ၵူၼ်းမီး မွၵ်ႈႁဵင် ။ RCSS တင်း SSPP ပိုတ်းယိုဝ်းၵၼ် ၼႂ်းၸႄႈဝဵင်းၵေးသီး ၸႄႈတွၼ်ႈလွႆလႅမ် ၸိုင်ႈတႆးပွတ်းၸၢၼ်း တင်ႈတႄႇဝၼ်းတီႈ 1/6/20921 မႃးတေႃႇယၢမ်းလဵဝ် သွင်ၾၢႆႇတိုၵ်ႉၶဵင်ႈၶႅင်ၵၢၼ်သိုၵ်းဢၼ်ဢမ်ႇထၢတ်ႇ။
ၽူႈၸွႆႈထႅမ် ၵူၼ်းပၢႆႈၽေးသိုၵ်း တီႈၵေးသီး ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ၵူၼ်းပၢႆႈၽေးသိုၵ်းတႄႉ ၸိူဝ်းပွၵ်ႈ မိူဝ်းၵေႃႈ မိူဝ်းၵမ်ႈၽွင်းယဝ်ႉ။ ၸိူဝ်းၵိုတ်းဝႆႉၼႆႉတႄႉ ယွၼ်ႉၼႂ်းပိုၼ်ႉတီႈပႆႇမီးလွင်ႈၼိမ်ယဵၼ်လႄႈ ပႆႇၸၢင်ႈပွၵ်ႈ။ ပေႃး တူၺ်းငဝ်းလၢႆး ယၢမ်းလဵဝ်ၼႆႉ ပၢင်တိုၵ်းယဵၼ်လူင်းယဝ်ႉသေတႃႉ ၼႂ်းၶၢဝ်းတၢင်း 2-3 ဝၼ်းမႃးၼႆႉ။ ၵူၺ်းၵႃႈ သိုၵ်းတင်း သွင်ၾၢႆႇ တိုၵ်ႉထႅမ်ႁႅင်းၼင်ႇၵၼ်ထႅင်ႈယူႇလႄႈ ပၢင်တိုၵ်းၼႆႉ ဢမ်ႇႁူႉဝႃႈ တေပဵၼ်ထႅင်ႈမိူဝ်ႈလႂ်”- ဝႃႈၼႆ။
ယၢမ်းလဵဝ် ၵူၼ်းပၢႆႈၽေးသိုၵ်း တီႈၵေးသီး ဢၼ်ပႆႇၸၢင်ႈပွၵ်ႈၶိုၼ်းႁိူၼ်းၼႆႉ မီးတီႈဝတ်ႉၼွင်သွမ်း 487 ၵေႃႉ၊ တီႈသုဝၼ်ႇၼသီႇရိ ႁူင်းၶမ်း 200 ပၢႆ၊ ဝတ်ႉသူၼ်မွၼ်း မွၵ်ႈ 80 ၵေႃႉ၊ ဝတ်ႉၵျွင်းလူင်ပွင်ဢုတ်ႇ 100 ပၢႆလႄႈ ဝတ်ႉၼွင်ဝူဝ်း မိူင်းၼၢင်း ၸိူဝ်းၼႆႉ။
“ ပေႃးႁုပ်ႈၵၼ်မူတ်းမူတ်းၼႆ တေမီးမွၵ်ႈ 800 ပၢႆ။ ယၢမ်းလဵဝ်တႄႉ လွင်ႈၵိၼ်ယႅမ်ႉ ၵုမ်ႇထူၼ်ႈၵၼ်ယူႇ ပေႃး ၶၢဝ်းႁိုင်တႄႉ တေၶႂ်ႈၵိၼ်းၸႂ်ယူႇ”- ၽူႈၸွႆႈထႅမ် ၵူၼ်းပၢႆႈၽေးသိုၵ်း သိုပ်ႇလၢတ်ႈၼႄထႅင်ႈၼင်ႇၼႆ။
ၵူၼ်းပၢႆႈၽေးသိုၵ်း တီႈၼွင်သွမ်း ႁူဝ်ၵူၼ်း 487 ၼၼ်ႉ ယၢမ်းလဵဝ် လူဝ်ႇတၢင်းၸွႆႈထႅမ်ႁၢဝ်ႈႁႅင်း လွင်ႈၽႃႈႁူမ်ႇၶူဝ်းၼွၼ်း ပႆႇၵုမ်ႇထူၼ်ႈၼႆယဝ်ႉ။
“တီႈၼွင်သွမ်းၼၼ်ႉသမ်ႉ ၵူၼ်းပၢႆႈၽေးၵေႃႈၼမ် လိူဝ်ပိူၼ်ႈလႄႈ ၽႃႈႁူမ်ႈၶူဝ်းၼွၼ်း ပႆႇၵုမ်ႇ ထူၼ်ႈ ။ သင်ဝႃႈ မီးပီႈၼွင်ႈတီႈၸမ်ၵႆ ၸွႆႈထႅမ်ပၼ်မႃးတႄႉ တေၶႅၼ်းလီၶႃႈယဝ်ႉ မွင်းပႂ်ႉ ၸဝ်ႈတႃႇၼ ၶဝ် မႃးၸွႆႈထႅမ်ပၼ်ယူႇၶႃႈ”- ၽူႈၸွႆႈထႅမ် ၵူၼ်းပၢႆႈၽေးသိုၵ်း သိုပ်ႇလၢတ်ႈၼႄထႅင်ႈၼင်ႇၼႆ။
ၵူၼ်းပၢႆႈၽေးသိုၵ်း ဢၼ်မႃးသွၼ်ႈဝႆႉတီႈ ဝတ်ႉၼွင်သွမ်းၼႆႉ ၵမ်ႈၼမ် ပဵၼ်ၵူၼ်းဝၢၼ်ႈလၵ်း၊ ဝၢၼ်ႈမၢၵ်ႇဝၢဝ်းလႄႈ ဝၢၼ်ႈၼမ်ႉဢူပ်း ၸိူဝ်းၼႆႉ။ ပဵၼ်ဝၢၼ်ႈဢၼ်ၸမ်ပၢင်တိုၵ်း ၵမ်ႈသိုဝ်ႈလႄႈ တေႃႇထိုင် ယၢမ်းလဵဝ် ၵူၼ်းပၢႆႈၽေး ပႆႇၸၢင်းပွၵ်ႈႁိူၼ်းယေးၵၼ်။ တီႈဝတ်ႉၼွင်သွမ်း ၼႆႉယၢၼ်ၵၼ်တင်း ဝဵင်းၵေးသီး 11 လၵ်း ယၢၼ်ၵၼ်တင်းဢွင်ႈတီႈ ပဵၼ်ပၢင်တိုၵ်းသမ်ႉ မွၵ်ႈ 2-3 လၵ်း ၼႆယဝ်ႉ။
