ၼႂ်းၸႄႈဝဵင်းၵေးသီး ထုင်ႉလွႆႁူၼ်း ၼၼ်ႉ ၶၢဝ်းတၢင်းသွင်သၢမ်ဝၼ်းၼႆႉ ဝူင်ႈၵၢင်သိုၵ်း SSPP တင်း သိုၵ်း RCSS ဢမ်ႇတိုၵ်း ဢမ်ႇတေႃးၵၼ်သေတႃႉ ၵူၼ်းၸိူဝ်းၺႃးၸၢၵ်ႇသိုၵ်းသေ လႆႈပၢႆယၢၼ်ဝၢၼ်ႈ ယၢၼ်ႁိူၼ်း 900 ပၢႆၼၼ်ႉ ပႆႇၸၢင်ႈပွၵ်ႈႁိူၼ်းၶိုၼ်း။
တႄႇဝၼ်းတီႈ 1/6/2021 ၼၼ်ႉမႃးတေႃႇထိုင်ယၢမ်းလဵဝ် သိုၵ်း RCSS တင်း SSPP သွင်ၾၢႆႇပိုတ်းယိုဝ်း ၵၼ် ၼႂ်း ၸႄႈဝဵင်းၵေးသီး ၸႄႈတွၼ်ႈလွႆလႅမ် ၸိုင်ႈတႆး ပွတ်းၸၢၼ်း။ သွင်တပ်ႉ ႁိမ်ပိုၼ်ႉတီႈ ၵၼ် ၼိူဝ် သၼ်လွႆႁူၼ်း၊ တင်းသွင်ၾၢႆႇ မီးလွင်ႈတၢႆမၢတ်ႇၼင်ႇၵၼ်၊ ယွၼ်ႉပၢင်တိုၵ်းသေ ၵူၼ်းဝၢၼ်ႈ ၵူၼ်းမိူင်း ဢၼ်ပၢႆႈမႃးမီးတီႈ ဝိႁၢရ်သူၼ်မွၼ်း၊ ဝိႁၢရ်သုဝၼ်ႇၼသီႇရိႁူင်းၶမ်း ဝိႁၢရ်ပွင်ဢုတ်ႇ ၸိူဝ်းၼႆႉပၢႆႇၸၢင်ႈ ပွၵ်ႈၶိုၼ်းႁိူၼ်း။
ၽူႈၸွႆႈထႅမ် ၵူၼ်းပၢႆႈၽေးသိုၵ်း ၵေႃႉၼိုင်ႈ လၢတ်ႈဝႃႈ – “ၸွမ်းၼင်ႇ ႁဝ်းၶႃႈ လႆႈႁူႉၸွမ်းသဵၼ်ႈမၢႆတႄႉ တီႈၵျွင်းၵမ်ႇမထၢၼ်းတင်း ၵျွင်းႁေႃတႄႉ ပွၵ်ႈမိူဝ်းမူတ်းယဝ်ႉ။ တီႈ ၼႂ်းဝဵင်းယၢမ်းလဵဝ် ၵိုတ်းဝႆႉတႄႉ တီႈဝတ်ႉသုဝၼ်ႇၼသီႇရိႁူင်းၶမ်း၊ ဝတ်ႉပွင်ဢုတ်ႇယဝ်ႉၵေႃႈ တီႈဝတ်ႉသူၼ်မွၼ်း ၸိူဝ်းၼႆႉ ပႆႇၸၢင်ႈ ပွၵ်ႈၶိုၼ်းၶႃႈ”- ဝႃႈၼႆ။
ယွၼ်ႉဝႃႈ ၽွင်းယၢမ်းၼႆႉ ပဵၼ်ၶၢဝ်းလူဝ်ႇၽုၵ်ႇသွမ်ႈ ၵၢၼ်ႁႃလိၼ်လဵင်ႉတွင်ႉ ၵေႃႈပိူင်ၼိုင်ႈသေ ၵူၼ်းပၢႆႈၽေး ၵမ်ႈၽွင်ႈ ၵေႃႈ ဢွၼ်ၵၼ်ပွၵ်ႈမိူဝ်းႁဵတ်းၵၢၼ်ၵၼ် ယၢမ်းၵၢင်ဝၼ်း။ ပေႃးထိုင်ၵၢင်ၶမ်ႈသမ်ႉ ဢွၼ်ၵၼ်မႃးၼွၼ်းတီႈဝတ်ႉ ၸိူဝ်းၼႆႉ မီး ဝႃႈၼႆ။
“တီႈၵျွင်းၼွင်သွမ်းၼႆႉ မီးၵူၼ်း မွၵ်ႈ 95 ၵေႃႉၼႆႉ ဢမ်ႇတၼ်းလႆႈ ၽႃႈႁူမ်ႇၶူဝ်းၼွၼ်းသင်မႃးလႄႈ ယၢပ်ႇၽိုတ်ႇၵိၼ်းၸႂ်ဝႆႉဢေႃႈ၊ ပေႃးဢမ်ႇလႆႈၽုၵ်ႇသွမ်ႈၶၢဝ်းၼႆႉဝႆႉ ပီၼႃႈတေၵိၼ်သင်ယၢပ်ႇၸႂ်ၵျၶႃႈ”- ၽူႈမႃးၸွႆႈထႅမ်ႈၼၼ်ႉ သိုပ်ႇလၢတ်ႈထႅင်ႈၼင်ႇၼႆ။
ယွၼ်ႉ RCSS , SSPP ယိုဝ်းၵၼ်လႄႈ ယၢမ်းလဵဝ် ၵူၼ်းပၢႆႈၽေးသိုၵ်း တီႈဝတ်ႉသုဝၼ်ၼသီရိႁူင်းၶမ်း မီးမွၵ်ႈ 200 ၵေႃႉ၊ တီႈဝတ်ႉပွင်ဢုတ်ႇ သွင်လၵ်း မီး100 ပၢႆ ၊ တီႈဝတ်ႉသူၼ်မွၼ်း မီး 50 ပၢႆ ၊ တီႈၼွင်သွမ်း မီးႁိမ်း 500 ၵေႃႉ။
သိုၵ်း RCSS တင်း SSPP ပိုတ်းယိုဝ်းၵၼ်ၼႆႉ တႄႇမႃး တၢင်းၼမ်ႉတူႈ ၽွင်းႁၢင်ပီ 2020 ။ ယၢမ်း လဵဝ် တႄႉ ၽႄႈမႃးထိုင်တၢင်းမိူင်းတႆးပွတ်းၸၢၼ်းသေ ႁိမ်တပ်ႉၵၼ် ဢၼ်မီးၼိူဝ် သၼ်လွႆႁူၼ်း ၼၼ်ႉယူႇ။ ယင်းမီးၶၢဝ်ႇဝႃႈ သွင်ၾၢႆႇ တိုၵ်ႉထႅမ်ႁႅင်းသိုၵ်းထႅင်ႈသေ ၼႂ်းၶၢဝ်းတၢင်း လၢႆဝၼ်းတၢင်းၼႃႈၼႆႉ ၸၢင်ႈ ယိုဝ်း ၵၼ်ထႅင်ႈ ႁၢဝ်ႈႁၢဝ်ႈႁႅင်းႁႅင်းၼႆ လႆႈႁူႉၸွမ်းၶၢဝ်ႇငၢဝ်းၼႂ်းပိုၼ်ႉတီႈ ၼင်ႇၼႆ။
