ၵူၼ်းပၢႆႈၽေးသိုၵ်း တီႈၵေးသီး တိုၵ်ႉၵိုတ်းဝႆႉ ႁဵင်ပၢႆ ပႆႇၸၢင်ႈပွၵ်ႈ

သဵင်ၵွင်ႈသဵင်မၢၵ်ႇ ယဵၼ်ဝႆႉလႄႈ ၵူၼ်းပၢႆႈၽေးသိုၵ်း ၼႂ်းၸႄႈဝဵင်းၵေးသီး  ဢွၼ်ၵၼ် ပွၵ်ႈၶိုၼ်း ႁိူၼ်းယေးၵမ်ႈၽွင်ႈ   ယွၼ်ႉမႆႈၸႂ်လွင်ႈၽုၵ်ႇသွမ်ႈ ၵၢၼ်ႁႃၵိၼ်လဵင်ႉတွင်ႉ  ဝႃႈၼႆ။

တႄႇဢဝ် ဝၼ်းတီႈ 1/6/2021 မႃး တေႃႇထိုင် ယၢမ်းလဵဝ် သိုၵ်း RCSS တင်း SSPP ပဵၼ်ပၢင်တိုၵ်းၵၼ် ႁၢဝ်ႈႁႅင်း ၼႂ်းၸႄႈ ဝဵင်းၵေးသီး ၸႄႈတွၼ်ႈလွႆလႅမ် ၸိုင်ႈတႆး ပွတ်းၸၢၼ်း ၊ ႁဵတ်းႁႂ်ႈၵူၼ်းမိူင်းၼႂ်းဢိူင်ႇမိူင်းၵၢဝ်၊ ၼွင်သွမ်းလႄႈ ႁူဝ်ပူင်ႇ လႆႈ ပၢႆႈၽေးသိုၵ်း  သွၼ်ႈၸွမ်းဝတ်ႉဝႃး လႄႈ ႁိူၼ်းပီႈၼွင်ႉၽႂ်မၼ်း ႁူဝ်ၵူၼ်းမီးၸမ် 3,000 ႁဵင် ၼႆယဝ်ႉ။

ၽူႈၸွႆႈထႅမ် ၵူၼ်းပၢႆႈၽေးသိုၵ်း တီႈၵေးသီး ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “မိူဝ်ႈသိုၼ်း တင်း မိူဝ်ႈဝႃး သွင်ဝၼ်း ၼႆႉ ပၢင်တိုၵ်းယဵၼ် ။  မိူဝ်ႈၼႆႉ ၵူၼ်းပၢႆႈၽေး ပွၵ်ႈမိူဝ်းၶိုၼ်းႁိူၼ်းယေးၵၼ် ၼမ်ဝႆႉၶႃႈဢေႃႈ။ ၼႂ်းဝဵင်းႁဝ်းၶႃႈ ဢၼ် ၵိုတ်းဝႆႉတႄႉ တေပဵၼ်တီႈၵျွင်းလူင်သွင်လၵ်း ႁူဝ်ၵူၼ်း 200 ပၢႆလႄႈ တီႈဝတ်ႉသုဝၼ်ႇၼသီႇရိ ႁူင်းထမ်း 100 ပၢႆ”- ဝႃႈၼႆ။

ယၢမ်းလဵဝ်ၼႆႉ ပၢင်တိုၵ်းယဵၼ်ဝႆႉယူႇသေတႃႉ  တိုၵ်ႉ ထႅမ်ႁႅင်းသိုၵ်း  ထႅင်ႈႁင်းၽႂ်ႁင်းမၼ်းယူႇလႄႈ  ၵူၼ်းဝၢၼ်ႈဢၼ်ပွၵ်ႈမိူဝ်းၶိုၼ်းႁိူၼ်းၸိူဝ်းၼၼ်ႉၵေႃႈ  လႅပ်ႈမီးငဝ်းလၢႆး တေၸၢင်ႈပွၵ်ႈမႃးၶိုၼ်းယူႇ ၽူႈၸွႆႈထႅမ် ၵူၼ်းပၢႆႈၽေးသိုၵ်း သိုပ်ႇလၢတ်ႈၼင်ႇ ၼႆ။

“မိူဝ်ႈၼႆႉ သိုၵ်းပွတ်းႁွင်ႇ တိုၵ်ႉထႅမ်ႁႅင်းသိုၵ်းထႅင်ႈယူႇၶႃႈ။ ၵွပ်ႈၼႆလႄႈ ၵူၼ်းပၢႆႈၽေးႁဝ်းၶႃႈ ဢၼ်ပွၵ်ႈမိူဝ်ႈၼႆႉ ထၢင်ႇ တႄႉ ပေႃးၵၢင်ၶမ်ႈမႃး လႅပ်ႈၸၢင်ႈပွၵ်ႈမႃးၶိုၼ်းယူႇ”- ဝႃႈၼႆ။

ယၢမ်းလဵဝ် ၵူၼ်းပၢႆႈၽေးသိုၵ်း ဢၼ်တိုၵ်ႉၵိုတ်း ဝႆႉတီႈၵေးသီး   မီးမွၵ်ႈ 1,000    ၵိုတ်းဝႆႉတီႈဝတ်ႉၼွင်သွမ်း ၊ ဝတ်ႉၵျွင်းလူင် 2 လၵ်း၊ ဝတ်ႉသူၼ်မွၼ်း၊ ဝတ်ႉမိူင်းၼွင်၊ မိူင်းၼၢင်း၊ ဝတ်ႉသုဝၼ်ႇ ၼ ႁူင်းထမ်း ၸိူဝ်းၼႆႉ။

သင်ဝႃႈ ပၢင်တိုၵ်းသိုပ်ႇပဵၼ်လႄႈၵူၼ်းဝၢၼ်ႈပၢႆႈၽေးမႃးထႅင်ႈၼမ်ၸိုင်    တေမီးလွင်ႈယၢပ်ႇၽိုတ်ႇတီႈယူႇတီႈၵိၼ်။ ၵွပ်ႈၼႆလႄႈၾၢႆႇၸွႆႈထႅမ်ၵူၼ်းပၢႆႈၽေးသိုၵ်း လႆႈဢုပ်ႇၵုမ်ၵၼ်သေၶိုင်ပွင်ဝႆႉယူႇ ဝႃႈၼႆ။

“ယၢမ်းလဵဝ်တႄႉ  ပီႈၼွင်ႉ တီႈၸမ်ၵႆ ၸွႆႈမႃးၵေႃႈမီးၽွင်ႈယူႇ ။ ၵူၼ်းဝဵင်းႁဝ်းၶႃႈၵေႃႈ မႃးၸွႆႈမႃးထႅမ်ၵၼ်ယူႇလႄႈ တေလႆႈဝႃႈ ၵုမ်ႇလုမ်ႈဝႆႉ ယူႇ။ သင်ဝႃႈ ပၢင်တိုၵ်းၼႆႉ ပဵၼ်ၶိုၼ်ႈမႃး ႁၢဝ်ႈႁႅင်းထႅင်ႈၵမ်းၼိုင်ႈၼႆတွၼ်ႈတႃႇ ၵူၼ်းပၢႆႈၽေး  တေၶႂ်ႈယၢပ်ႇဝႆႉၶႃႈဢေႃႈ၊ ယဝ်ႉၵေႃႈ တႃႇလုမ်းလႃးပၢႆးယူႇလီၶဝ် ဢၼ်ၼႆႉၵေႃႈ ႁဝ်းၶႃႈလူဝ်ႇၶိုင်ပွင်ဝႆႉပၼ်  ”-  ၵူၼ်းၵေးသီး ဢၼ်ၸွႆႈထႅမ်ၵူၼ်းပၢႆႈၽေးသိုၵ်းဝႆႉယူႇ လၢတ်ႈတီႈၽူႈတွႆႇႁွၵ်ႈ ၼင်ႇၼႆ။

တႄႇဢဝ် ဝၼ်းတီႈ 1/6/2021 ၼႆႉမႃး တေႃႇထိုင်ယၢမ်းလဵဝ် သိုၵ်း RCSS တင်း SSPP ပဵၼ်ပၢင်တိုၵ်းၵၼ် ႁၢဝ်ႈႁႅင်းၼႂ်း ၸႄႈဝဵင်းၵေးသီး  ၵူၼ်းမိူင်းၼႂ်း ဢိူင်ႇမိူင်းၵၢဝ်၊ ၼွင်သွမ်းလႄႈ ႁူဝ်ပူင်ႇ ၸိူဝ်းၼႆႉ  ဢွၼ်ၵၼ်ပၢႆႈၽေးသိုၵ်းမႃးသွၼ်ႈဝႆႉ ႁူဝ်ၵူၼ်း ၸမ် 3,000 ၵေႃႉ ။

ယၢမ်းလဵဝ်သမ်ႉ ပဵၼ်ၶၢဝ်းလူဝ်ႇၽုၵ်ႇသွမ်ႈၵေႃႈ ပိူင်ၼိုင်ႈ  ၊ ၸုမ်းယိပ်းၵွင်ႈၵၢင်ႇသွင်ၾၢႆႇသမ်ႉဢမ်ႇႁူပ်ႉထူပ်းဢုပ်ႇဢူဝ်းၵၼ်တႃႇၵႄႈလိတ်ႈလွင်ႈပိုတ်းယိုဝ်းၵၼ်၊  ႁဵတ်းႁႂ်ႈၵူၼ်းမိူင်း    ထူပ်းတၢင်းယၢပ်ႇၽိုတ်ႇတႃႇႁႃၵိၼ်လဵင်ႉၵၼ် ၼႆယဝ်ႉ။