ၵူၼ်းမိူင်းၼႂ်းၸႄႈဝဵင်းၵေးသီး လၢႆဝၢၼ်ႈ လႆႈဢွၼ်ၵၼ်ငိူင်ႉပၢႆႈၽေးသိုၵ်း မႃးသွၼ်ႈဝႆႉတီႈ ဝတ်ႉၼွင်သွမ်း ႁူဝ်ၵူၼ်း မွၵ်ႈ 300 ယွၼ်ႉ သိုၵ်းတႆး ၼင်ႇၵၼ် ပိုတ်းယိုဝ်းၵၼ် ဝႃႈၼႆ။
မိူဝ်ႈဝႃး ဝၼ်းတီႈ 1/6/2021 ယၢမ်းၵၢင်ၼႂ် 7 မူင်းပၢႆ ၵူၼ်းဝၢၼ်ႈမၢၵ်ႇဝၢဝ်း၊ ဝၢၼ်ႈလၵ်း၊ ဝၢၼ်ႈႁူဝ်ၽၢႆ၊ ဝၢၼ်ႈႁူဝ်ၼႃးလႄႈ ဝၢၼ်ႈၽၢႆမူင်ႈ ၸိူဝ်းၼႆႉ လႆႈဢွၼ်ၵၼ်ငိူင်ႉပၢႆႈၽေးသိုၵ်း ဢွၵ်ႇမႃးသွၼ်ႈဝႆႉတီႈဝတ်ႉၼွင်သွမ်း ဢိူင်ႇၼွင်သွမ်း ၸႄႈဝဵင်း ၵေးသီး ၸႄႈတွၼ်ႈလွႆလႅမ် ၸိုင်ႈတႆး ပွတ်းၸၢၼ်း ။
ၽူႈၸွႆႈထႅမ် ၵူၼ်းပၢႆႈၽေးသိုၵ်း တီႈဢိူင်ႇၼွင်သွမ်း ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ၸႂ်ႈၶႃႈဢေႃႈ ဢွၼ်ၵၼ်ပၢႆႈ မႃးသွၼ်ႈဝႆႉတီႈ ဝတ်ႉၼွင်သွမ်းလႄႈ ႁိူၼ်းပီႈၼွင်ႉၽႂ်မၼ်း။ ၵမ်ႈၼမ် ပဵၼ်ပီႈၼွင်ႉ ဝၢၼ်ႈမၢၵ်ႇဝၢဝ်းတင်း ဝၢၼ်ႈ လၵ်း ႁူဝ်ၵူၼ်းတေမီး 240 ပၢႆ၊ ပေႃးႁူမ်ႈၵၼ်တင်း တၢင်ႇဝၢၼ်ႈ တင်းမူတ်းတေမီး မွၵ်ႈ 300 ၼႆႉ”- ဝႃႈၼႆ။
ပၢင်တိုၵ်းပွတ်းၵေးသီးၼႆႉပဵၼ် သိုၵ်း RCSS တင်း သိုၵ်း SSPP ပိုတ်းယိုဝ်းၵၼ် ။ တေႃႇထိုင်မိူဝ်ႈၼႆႉၵၢင်ၼႂ် ယင်းတိုၵ်ႉပိုတ်းယိုဝ်းၵၼ်ယူႇ ၵူၼ်းပၢႆႈၽေးသိုၵ်းလၢတ်ႈၼင်ႇၼႆ။
“ပဵၼ်သိုၵ်းတႆး သွင်ၸုမ်း ယိုဝ်းၵၼ်ၶႃႈဢေႃႈ ။ၵူၼ်းဝၢၼ်ႈဝႃႈ လႆႈငိၼ်းသဵင်ၵွင်ႈသေ ၼႅတ်ႈပၢႆႈၼႆၶႃႈဢေႃႈ ။ ယၢမ်းလဵဝ် ပၢင်တိုၵ်းၼႆႉ ပဵၼ်ၵႂႃႇတၢင်းတိၼ်လွႆႁူၼ်း ၸမ်ၵႂႃႇတၢင်းဝၢၼ်ႈဢိတ်း မၢၵ်ႇၼႃႉ၊ ၼမ်ႉဢူပ်း ၼႂ်းဢိူင်ႇႁူဝ်ပူင်ႇ ပုၼ်ႉယဝ်ႉၶႃႈ။ ၵူၼ်းထုင်ႉၼၼ်ႉတႄႉလႅပ်ႈပၢႆႈၵႂႃႇတၢင်းမိူင်းၼၢင်းပုၼ်ႉၶႃႈဢေႃႈ။ မိူဝ်ႈၼႆႉၵေႃႈ သဵင်ၵွင်ႈတိုၵ်ႉ တႅၵ်ႇယူႇၶႃႈ ယိၼ်းပဵၼ်ၵမ်းပဵၼ်ၵမ်းၶႃႈဢေႃႈ”- ၽူႈၸွႆႈထႅမ် ၵူၼ်းပၢႆႈၽေး သိုပ်ႇလၢတ်ႈၼႄၼင်ႇၼႆ။
သင်ဝႃႈ ပၢင်တိုၵ်းၼႆႉ သိုပ်ႇပဵၼ်ၶၢဝ်းယၢဝ်းၼႆၸိုင် တႃႇၵူၼ်းပၢႆႈၽေးသိုၵ်း ႁူဝ်ၵူၼ်း မွၵ်ႈ 300 ၼႆႉ တေတူၵ်းၵိၼ်းယၢပ်ႇၽိုတ်ႇၵၼ် ဝႃႈၼႆ။
“ယၢမ်းလဵဝ်ၼႆႉ မီးၶဝ်ႈၽၵ်းလဵင်ႉၵၼ်ယူႇၶႃႈ ပေႃးဝႃႈ ပၢင်တိုၵ်းသိုပ်ႇယိုတ်ႈယၢဝ်းၵႂႃႇတႄႉ ၵူၼ်းပၢႆႈၽေးၵေႃႈ ဢမ်ႇၸၢင်ႈ ပွၵ်ႈႁိူၼ်းသေ တေယၢပ်ႇၽိုတ်ႇၵိၼ်းၸႂ်ၵမ်းလဵဝ်ၶႃႈယဝ်ႉ။ ယဝ်ႉၵေႃႈ လွင်ႈပၢႆးယူႇလီ”- ၵူၼ်းၼုမ်ႇ ၼွင်သွမ်းၵေႃႉ ၼိုင်ႈ လၢတ်ႈၼႄၼင်ႇၼႆ။
တီႈၵူၼ်းပၢႆႈၽေးသိုၵ်း ဢၼ်ပၢႆႈမႃးသွၼ်ႈဝႆႉ တီႈဝတ်ႉၼွင်သွမ်းၼၼ်ႉ မီးပႃးမႄႈလုၵ်ႈဢွၼ်ႇလႅင် 2 ၵေႃႉ ဢႃယုလႆႈ 2 ဝၼ်း၊ တိုၵ်ႉၵိူတ်ႇ မိူဝ်ႈဝၼ်းတီႈ 31/5/2021 ၼၼ်ႉၵူၺ်း။ ပဵၼ်ၵူၼ်းဝၢၼ်ႈလၵ်းတင်းသွင်ၵေႃႉဝႃႈၼႆ။
ၵူၼ်းၵေးသီးမုင်ႈမွင်း ယႃႇႁႂ်ႈသိုၵ်းတႆး ၼင်ႇၵၼ် ပိုတ်းယိုဝ်းၵၼ် ၾၢႆႇလႂ်တၢႆၵေႃႈ ပဵၼ်ၸၢဝ်း တႆးၼင်ႇၵၼ်ၵူၺ်း လႄႈ ယႃႇႁႂ်ႈပၢင်တိုၵ်းလႆႈၵႂၢင်ႈယႂ်ႇမႃးထႅင်ႈဝႃႈၼႆ။
ၾၢႆႇၼိုင်ႈယၢမ်းလဵဝ် ပဵၼ်ၶၢဝ်းလူဝ်ႇၽုၵ်ႇသွမ်ႈ လူင်းၵၢၼ် ယဝ်ႉလႄႈ သင်ဝႃႈ မီးပၢင်တိုၵ်း ၶိူဝ်းယႂ်းၸိုင် တေတုမ်ႉတိူဝ်ႉပႃး ၵၢၼ်ႁႃၵိၼ်လဵင်ႉတွင်ႉ ၵူၼ်းမိူင်း ႁၢဝ်ႈႁႅင်း ၵူၼ်းပိုၼ်ႉတီႈ ၵေးသီးလၢတ်ႈ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ