ၵူၼ်းပၢႆႈၽေးသိုၵ်းတီႈၼမ်ႉတူႈ ဢွၼ်ၵၼ်ပွၵ်ႈၶိုၼ်းႁိူၼ်းယေးၽွင်ႈ

ၼႂ်းၶၢဝ်းတၢင်း သွင်ဝၼ်းမႃးၼႆႉ ၵူၼ်းဝၢၼ်ႈပၢင်လူင် ႁူဝ်ၵူၼ်း ၸမ် 100 ဢွၼ်ၵၼ်ပွၵ်ႈၶိုၼ်းႁိူၼ်းယေး   ၸိူဝ်းၺႃးၾႆးမႆႈႁိူၼ်းၼၼ်ႉၵေႃႈၶိုၼ်းမိူဝ်းႁဵတ်းသုမ်ႉသွင်းသေ ယူႇသဝ်း။ 

ဝၼ်းတီႈ 27-28/5/2021 သွင်ဝၼ်းမႃးၼႆႉ ၵူၼ်းဝၢၼ်ႈပၢင်လူင် ဢိူင်ႇပၢင်လူင် ၸႄႈဝဵင်းၼမ်ႉတူႈ ဢၼ်လႆႈပၢႆႈၽေးသိုၵ်း ၶၢဝ်းတၢင်းသွင်လိူၼ်ပၢႆၼၼ်ႉ ဢွၼ်ၵၼ်ပွၵ်ႈၶိုၼ်းႁိူၼ်းယေးၽႂ်မၼ်း တေမီးႁူဝ်ၵူၼ်းၸမ် 100 ။  ႁိူၼ်းယေး ၸိူဝ်းထုၵ်ႇၾႆးမႆႈၵႂႃႇၸိူဝ်းၼၼ်ႉၵေႃႈ ၵူၼ်းဝၢၼ်ႈၸွႆႈၵၼ်ႁဵတ်းသုမ်ႉသွင်းၵၼ်သေ ယူႇသဝ်းၵႂႃႇ ၼႆယဝ်ႉ။

ၵူၼ်း  ဢိူင်ႇပၢင်လူင် ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ႁဝ်းၶႃႈ ဢွၼ်ၵၼ်ပွၵ်ႈမႃး ၼႂ်းၶၢဝ်းတၢင်းသွင်ဝၼ်း ၼႆႉ တေမီးႁူဝ်ၵူၼ်း ၸမ် 100 ၶႃႈ။ ႁိူၼ်းယေး ၵူၼ်းဝၢၼ်ႈႁဝ်း ၸိူဝ်းထုၵ်ႇၾႆးမႆႈၵႂႃႇၸိူဝ်းၼၼ်ႉ လႆႈဢွၼ်ၵၼ်မႃးႁဵတ်း သုမ်ႉႁဵတ်းသွင်းၵၼ်သေ ယူႇၸိူင်ႉၼႆၶႃႈဢေႃႈ ယၢပ်ႇၽိုတ်ႇၵၼ်ၶႃႈဢေႃႈ တႃႇတေပူၵ်းတင်ႈႁဵတ်းၶိုၼ်ႈလင်မႂ်ႇတႄႉ မၼ်းဢမ်ႇငၢႆႈၶႃႈ”- ဝႃႈၼႆ။

ႁိူၼ်းယေး ၵူၼ်ဝၢၼ်ႈ ပၢင်လူင် ဢၼ်ထုၵ်ႇၾႆးၽဝ်ပႅတ်ႈၼၼ်ႉ တင်းမူတ်း တေမီး 46 လင် ၵူၼ်းဝၢၼ်ႈလႆႈပၢႆႈၽေးသိုၵ်း တင်ႈတႄႇ မိူဝ်ႈႁၢင်လိူၼ်မၢတ်ႊၶျ် ပူၼ်ႉမႃး  တေႃႇထိုင်ယၢမ်းလဵဝ် မီးၶၢဝ်းတၢင်းသွင်လိူၼ်ပၢႆယဝ်ႉ ဝႃႈၼႆ။

“ႁဝ်းၶႃႈ လႆႈပၢႆႈၽေးသိုၵ်းၼႆႉ မီးၶၢဝ်းတၢင်းသွင်လိူၼ်ပၢႆသွင်ဝၼ်း ယဝ်ႉ။ သင်ဝႃႈ တိုၵ်ႉမီးသိုၵ်းသွင်ၾၢႆႇ တိုၵ်ႉၶဵင်ႈၶႅင် တေႃႇၵၼ် ယူႇၸိုင် ပၢင်တိုၵ်းၼႆႉ မၼ်းဢမ်ႇယဵၼ်။ ႁဝ်းၶႃႈၵေႃႈ တေပႆႇၸၢင်ႈပွၵ်ႈႁိူၼ်းယေးၵၼ် ။တေလႆႈဝႃႈ ယဵၼ်ယဝ်ႉ ႁႃႉၼႆၵေႃႈ ပႆႇယဵၼ်တႄႉတႄႉ။ လႆႈငိၼ်းဝႃႈ သိုၵ်းၶူဝ်းလၢႆးၶဝ် ၶၢမ်ႈၵႂႃႇတၢင်းတႃႈဝဵင်းလႅင် ၊ ၵႂႃႇတၢင်းတႃႈတေႈၼႆလႄႈ လွင်ႈၶဵင်ႈၶႅင်ၵၢၼ်သိုၵ်းတေႃႇၵၼ် ၸင်ႇယဵၼ်လူင်းၵႂႃႇဢိတ်းၼိုင်ႈၶႃႈ”- ၵူၼ်းပိုၼ်ႉတီႈ ဢိူင်ႇပၢင်လူင် သိုပ်ႇလၢတ်ႈၼႄၼင်ႇၼႆ။

  ဝၢႆးသေ ၶွင်ႇသီႇသိုၵ်းမၢၼ်ႈ မိူၵ်ႈမႂ်ႈ ယိုတ်းဢႃႇၸိုင်ႈမိူင်းမႃး မိူဝ်ႈ ဝၼ်းတီႈ 1/2/2021 ၼၼ်ႉသေ ထိုင် မႃးၼႂ်းၵၢင်လိူၼ်မၢတ်ႊၶျ်ၼႆႉ သိုၵ်း RCSS တင်း ၸုမ်းဢူၺ်းလီပွတ်းႁွင်ႇ TNLA, SSPP လႆႈပဵၼ်ပၢင်တိုၵ်းၵၼ် ႁၢဝ်ႈ ႁႅင်း ၵူၼ်းမိူင်း  ၼမ်ႉတူႈ ႁူဝ်ၵူၼ်း ၼပ်ႉႁဵင် လႆႈပၢႆႈၽေးသိုၵ်း တေႃႇထိုင်ယၢမ်းလဵဝ် ပႆႇၸၢင်ႈပွၵ်ႈႁိူၼ်းယေး ။ ႁိူၼ်းယေးၵူၼ်းဝၢၼ်ႈထုၵ်ႇၾႆးမႆႈ ဢမ်ႇယွမ်း 100 လင်။ ၵူၼ်းမိူင်းၺႃးၸၢၵ်ႇ မၢတ်ႇၸဵပ်း ယွၼ်ႉပၢင်တိုၵ်းလႄႈ ယဵပ်ႇၺႃး မၢၵ်ႇႁၢင်ႈၵၢင် လူႉတၢႆ ၸိူဝ်းၼႆႉၵေႃႈမီးပဵၼ်လၢႆၵေႃႉ  ။