ၸုမ်းယိပ်းၵွင်ႈၵၢင်ႇၸၢဝ်းၶိူဝ်းၼင်ႇၵၼ် ၼႂ်းမိူင်းတႆး ပိုတ်းယိုဝ်းၵၼ်ႁၢဝ်ႈႁႅင်း တၢင်းထုင်ႉၼမ်ႉလၼ်ႈ ၵူၼ်းမိူင်းလႆႈပၢႆႈၽေးသိုၵ်း ၸမ်ႁဵင်။
မိူဝ်ႈၼႆႉ ဝၼ်းတီႈ 19/5/2021 ယၢမ်းၵၢင်ၼႂ် မွၵ်ႈ 5 မူင်း သိုၵ်း RCSS တင်း ၸုမ်းဢူၺ်းလီ ပွတ်းႁွင်ႇ ပဵၼ်ပၢင်တိုၵ်းၵၼ် ႁၢဝ်ႈႁႅင်း ၼႂ်းဢိူင်ႇဝၢၼ်ႈၸိင်း ၸႄႈဝဵင်း သီႇပေႃႉ ၸႄႈတွၼ်ႈၵျွၵ်ႉမႄး ၸိုင်ႈတႆးပွတ်းႁွင်ႇ။ ၵူၼ်းမိူင်းမွၵ်ႈၸမ် ႁဵင် လႆႈပၢႆႈမႃးသွၼ်ႈတီႈဝတ်ႉဝၢၼ်ႈၸိင်း ။
ၸဝ်ႈႁၢၼ် ၶမ်းၸၢမ်ႇ ၽူႈၶၢၼ်ပၢၵ်ႇ RCSS လၢတ်ႈတီႈၽူႈတွႆႇႁွၵ်ႈဝႃႈ – “ၸႂ်ႈၶႃႈဢေႃႈ လႆႈပဵၼ်ပၢင်တိုၵ်းၵၼ် တၢင်းသီႇ ပေႃႉ ၶဝ်ၸႂ်ႉႁႅင်းသိုၵ်း မွၵ်ႈ 800 ပၢႆ လေႃႇတိုၵ်းႁဝ်းၶႃႈဢေႃႈ”- ဝႃႈၼႆ။
ဢိင်ၼိူဝ် လွင်ႈပၢင်တိုၵ်း ဢၼ်ပဵၼ်ယူႇတၢင်းပွတ်းႁွင်ႇ ၸႄႈဝဵင်းၼမ်ႉတူႈ၊ ၵျွၵ်ႉမႄးလႄႈ သီႇပေႃႉ ၸိူဝ်းၼႆႉ ႁဵတ်းႁႂ်ႈ ၵူၼ်းမိူင်းၼႂ်းပိုၼ်ႉတီႈ ထူပ်းတၢင်းယၢပ်ႇ ၽိုတ်ႇတုၵ်ႉၶၵိၼ်းၸႂ် ဝႃႈၼႆ။
ၽူႈတူင်ႉၼိုင် ၼႂ်းတူင်ႇဝူင်းၵူၼ်း သီႇပေႃႉ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ပၢင်တိုၵ်းၼႆႉ ပေႃးတေပဵၼ်ၸိူင်ႉၼႆ ၶၢဝ်းယၢဝ်းတိၵ်းတိၵ်းၼႆ ၵူၼ်းမိူင်းၼႆႉ မၼ်းတေတုၵ်ႉၶၼႃႇ ၶႃႈယဝ်ႉ။ ၶႅၼ်းတေႃႈ ႁၼ်ထိုင်ၵၢင် ၸႂ်ပေႃႈမႄႈ ၵူၼ်းမိူင်းဢိတ်းၼိုင်ႈ ၶႂ်ႈႁႂ်ႈၵိုတ်းလိုဝ်ႈပၢင်တိုၵ်းၼႂ်းမိူင်းတႆးႁဝ်းၼႆႉ ၵူႈတီႈၶႃႈဢေႃႈ”- ဝႃႈၼႆ။
ယၢမ်းလဵဝ်ၼႆႉ သမ်ႉပဵၼ်ၶၢဝ်းလူဝ်ႇလူင်းၵၢၼ် ၽုၵ်ႇသွမ်ႈယဝ်ႉလႄႈ ၵူၼ်းမိူင်း ထူပ်းတၢင်းယၢပ်ႇၽိုတ်ႇၵိၼ်းၸႂ် တႃႇႁႃၵိၼ်လဵင်ႉတွင်ႉ ။
ၵူၼ်းပိုၼ်ႉတီႈ ၼမ်ႉလၼ်ႈၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “တႄႇၸဵမ်ၸဝ်ႉ မႃးတေႃႇထိုင်ယၢမ်းလဵဝ် တိုၵ်ႉလႆႈ ငိၼ်းသဵင်ၵွင်ႈတႅၵ်ႇယူႇ ပႆႇယဵၼ်။ မိူဝ်ႈလဵဝ်ၼႆႉ ပဵၼ်ၶၢဝ်းလူဝ်ႇလူင်းႁႆႈလူင်းၼႃးယဝ်ႉ ပၢင်တိုၵ်းသမ်ႉမႃးပဵၼ်ၸိူင်ႉၼႆ တုၵ်ႉၶတႄႉၶႃႈဢေႃႈ။ ပေႃးဢမ်ႇႁဵတ်းဝႆႉ ႁႃဝႆႉယၢမ်းလဵဝ် ပီၼႃႈႁဝ်းတေဢဝ်သင်ၵိၼ်။ ၶွၼ်ႇၵေႃႈ ပေႃးလူဝ်ႇလႆႈသႂၢင်း ပၼ်ၶဝ်ထႅင်ႈ။ တေဢဝ်တီႈလႂ် ၵႂႃႇသႂၢင်းပၼ်ၶဝ်”- ဝႃႈၼႆ။
ၵူၼ်းဝၢၼ်ႈ ဢၼ်ပၢႆႈႁွတ်ႈဝႆႉတီႈဝတ်ႉဝၢၼ်ႈၸိင်းၼၼ်ႉ ပဵၼ်ၵူၼ်းဝၢၼ်ႈၵွင်းၶၢမ်၊ ပၢင်ႇ သိမ်ႇ၊ ၵုင်းၼိဝ်ႉ၊ ဝၢၼ်ႈတၢပ်ႈ၊ ၸၢမ်ၵႃး၊ ႁူဝ်ၼမ်ႉလႄႈ ၵုင်းမူင်ႈ ၼႂ်းဢိူင်ႇ ဝၢၼ်ႈၸိင်း ႁူဝ်ၵူၼ်း ၸမ်ႁဵင် ။
ၼွၵ်ႈလိူဝ်ၼၼ်ႉ မိူဝ်ႈၼႆႉ ယၢမ်းၵၢင်ၼႂ် တီႈၵဵတ်ႉၼမ်ႉဢုၼ်ႇ သႅၼ်ဝီ ၸိုင်ႈတႆး ပွတ်းႁွင်ႇၼၼ်ႉၵေႃႈ ၶွင်ႇသီႇသိုၵ်းမၢၼ်ႈ တင်း ၸုမ်းဢူၺ်းလီ ပဵၼ်ပၢင်တိုၵ်းၵၼ်ထႅင်ႈႁၢဝ်ႈႁႅင်း ၵူၼ်းမိူင်းပိုၼ်ႉတီႈႁိမ်းႁွမ်း ၸိူဝ်းၼၼ်ႉလႆႈပၢႆႈ ၶဝ်ႈဝဵင်းသႅၼ်ဝီ တင်း လႃႈသဵဝ်ႈတင်းၼမ် ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ