ၶွင်ႇသီႇသိုၵ်းမၢၼ်ႈ မိူၵ်ႈမႂ်ႈ တင်း ၸုမ်းဢူၺ်းလီ ပွတ်းႁွင်ႇ သိုပ်ႇပဵၼ်ပၢင်တိုၵ်းၵၼ် ႁၢဝ်ႈႁႅင်းထႅင်ႈ တီႈႁိမ်းတူဝ်းၵဵတ်ႉ ဢေႊသျုႊဝေႃႊ ၵူတ်ႉၶၢႆ – မူႇၸေႊ ဝႃႈၼႆ။
မိူဝ်ႈၼႆႉ ဝၼ်းတီႈ 7/5/2021 ယၢမ်းဝၢႆးဝၼ်း မွၵ်ႈ 1 မူင်း ၶွင်ႇသီႇသိုၵ်းမၢၼ်ႈ မိူၵ်ႈမႂ်ႈ တင်း သိုၵ်းတဢၢင်း TNLA, ၵူဝ်းၵၢင်ႉ MNDAA သိုပ်ႇပဵၼ်ပၢင်တိုၵ်းၵၼ် တီႈႁိမ် ဝၢၼ်ႈမေႃႇႁိုၵ်း လႄႈ ဝၢၼ်ႈၼႃးဝၢႆ ၼႂ်းၸႄႈဝဵင်းၵူတ်ႉၶၢႆ ၸႄႈတွၼ်ႈမူႇၸေႊ ၸိုင်ႈတႆး ပွတ်းႁွင်ႇ ၼႆယဝ်ႉ။
“ၸႂ်ႈၶႃႈဢေႃႈ ပဵၼ်ပၢင်တိုၵ်းၵၼ်ၶႃႈ တေႃႇထိုင်ယၢမ်းလဵဝ် သဵင်ၵွင်ႈပႆႇယဵၼ်လီ တိုၵ်ႉမေႃးပဵၼ်ၵမ်းယူႇ။ ယၢမ်းလဵဝ်တႄႉ ပႆႇလႆႈငိၼ်း ၵူၼ်းပၢႆႈၽေးသိုၵ်း ၶႃႈ ပႂ်ႉထွမ်ႇ တူၺ်းယူႇ”- ၽူႈတူင်ႉၼိုင် ၼႂ်းတူင်ႇဝူင်းၵူၼ်း ၸႄႈဝဵင်းၵူတ်ႉၶၢႆ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈၼင်ႇၼႆ။
တႄႇဢဝ် ဝၼ်းတီႈ 4/5/2021 ၼႆႉမႃး ၶွင်ႇသီႇသိုၵ်းမၢၼ်ႈ တင်း ၸုမ်းဢူၺ်းလီ ပွတ်းႁွင်ႇ သိုၵ်းၵူဝ်းၵၢင်ႉ သိုၵ်းတဢၢင်း ပဵၼ်ပၢင်တိုၵ်းၵၼ် တၢင်းၵူတ်ႉၶၢႆၼႆႉ ႁၢဝ်ႈႁႅင်းသေ ၵူၼ်းမိူင်းပိုၼ်ႉတီႈ လႆႈပၢႆႈၽေးသိုၵ်း ႁူဝ်ၵူၼ်း ဢမ်ႇယွမ်း 200 ၵေႃႉ ၼႆယဝ်ႉ။
“ယၢမ်းလဵဝ် ၵူၼ်းပၢႆႈၽေး တီႈၵူတ်ႉၶၢႆၼႆႉ ၸွမ်းၼင်ႇႁဝ်းၶႃႈလႆႈႁပ်ႉႁူႉၸွမ်းတႄႉ တေပဵၼ်ပီႈၼွင်ႉ တၢင်းဝၢၼ်ႈပၢင်ႇ ၼမ်ႉဢုမ် ဝၢၼ်ႈမႂ်ႇ လႄႈ ဢိၵ်ႇထႅင်ႈလၢႆဝၢၼ်ႈ ၸွမ်းႁိမ်းႁွမ်းၼၼ်ႉ ပၢႆႈမႃးယူႇဝႆႉတီႈဝတ်ႉပျီႇလူင်းၶျၢၼ်းတႃႇၵၼ်ဝႆႉ”- ၽူႈၸွႆႈထႅမ် တူင်ႇဝူင်းၵူၼ်း သိုပ်ႇလၢတ်ႈၼႄၼင်ႇၼႆ။
ဢိင်ၼိူဝ် လွင်ႈပဵၼ်ပၢင်တိုၵ်းၵၼ် တီႈၸႄႈဝဵင်းၵူတ်ႉၶၢႆၼႆႉသေ ၵူၼ်းဝၢၼ်ႈ 5 ၵေႃႉ လႆႈတိူဝ်ႉၺႃးမၢတ်ႇၸဵပ်းၸွမ်း ၼႂ်း ၼၼ်ႉ တႃႇ 4 ၵေႃႉ လႆႈမၢတ်ႇၸဵပ်းႁၢဝ်ႈႁႅင်း။ ယဝ်ႉၵေႃႈ ႁိူၼ်းယေး ၵူၼ်းဝၢၼ်ႈ လႆႈလူႉၵွႆၸွမ်း 5 လင် ၼႆယဝ်ႉ။
မိူဝ်ႈဝၼ်းတီႈ 5/6/2021 ၼၼ်ႉ ၸုမ်းဢူၺ်းလီ ၽဝ်ပႅတ်ႈသုမ်းပၢင်သဝ်းသိုၵ်းမၢၼ်ႈ တီႈၼိုင်ႈ ဢၼ်မီးႁိမ်းတၢင်း ၼႂ်းၵႄႈ ၵူတ်ႉၶၢႆ – မူႇၸေႊ ၼႂ်းၸႄႈဝဵင်းၵူတ်ႉၶၢႆ ၼႆယဝ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ