ၸုမ်းဢူၺ်းလီ ပွတ်းႁွင်ႇ ပိုတ်းယိုဝ်းတပ်ႉပၢင်သဝ်းသိုၵ်းမၢၼ်ႈ ၼႂ်းၸႄႈဝဵင်းၵူတ်ႉၶၢႆ ႁၢဝ်ႈႁႅင်း ၽဝ်ပႃး တပ်ႉ ပၢင်သဝ်း သိုၵ်းမၢၼ်ႈ တီႈၼိုင်ႈ ဝႃႈၼႆ။

မိူဝ်ႈဝႃး ဝၼ်းတီႈ 5/5/2021 ယၢမ်းၵၢင်ၶမ်ႈမွၵ်ႈ 8 မူင်း တပ်ႉပၢင်သဝ်း ၶွင်ႇသီႇသိုၵ်းမၢၼ်ႈ ဢၼ်ပၵ်းဝႆႉၼႂ်း တၢင်းၶဝ်ႈဝဵင်း ၼိူဝ်သဵၼ်ႈတၢင်း ၵူတ်ႉၶၢႆ – လႃႈသဵဝ်ႈ ၼႂ်းၸႄႈဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇ ထုၵ်ႇ ၽဝ်ပႅတ်ႈ ၼႆယဝ်ႉ။

ၵူၼ်းပိုၼ်ႉတီႈ ၵူတ်ႉၶၢႆ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ၸႂ်ႈၶႃႈဢေႃႈ တပ်ႉပၢင်သဝ်းသိုၵ်းမၢၼ်ႈ ထုၵ်ႇၾႆးၽဝ် ပႅတ်ႈၶႃႈ။ လွင်ႈတုမ်ႉတိူဝ်ႉ ၵူၼ်းမၢတ်ႇ ၸဵပ်းလူႉတၢႆတႄႉ ဢမ်ႇမီး။ ၵူၺ်းၵႃႈ တိူဝ်ႉၺႃးၵႃးလူင် လႆႈလူႉၵွႆၸွမ်း ၵမ်ႈၽွင်ႈ”- ဝႃႈၼႆ။

ၼႂ်းၶၢဝ်းတၢင်း 2-3 ဝၼ်းမႃးၼႆႉ ၶွင်ႇသီႇသိုၵ်းမၢၼ်ႈ တင်း ၸုမ်းဢူၺ်းလီ သိုၵ်းၵၢဝ်ႈၵၢင်ႉ MNDAA တင်း သိုၵ်းတဢၢင်း TNLA ပဵၼ်ပၢင် တိုၵ်းၵၼ် ႁၢဝ်ႈႁႅင်း တၢင်းၾၢႆႇႁွင်ႉဝဵင်း ယၢၼ်ဝဵင်းမွၵ်ႈ 2 လၵ်းပၢႆ ၼႂ်းၸႄႈဝဵင်းၵူတ်ႉၶၢႆ ဢိင်ၼိူဝ် လွင်ႈ ပဵၼ်ပၢင်တိုၵ်းၵၼ်ၼႆႉသေ ၵူၼ်းဝၢၼ်ႈလႆႈပၢႆႈၽေးသိုၵ်း မွၵ်ႈ 3-4 ဝၢၼ်ႈ ၼႆယဝ်ႉ။

“တေပဵၼ် ဝၢၼ်ႈပၢင်ႇ ၼမ်ႉဢုမ် ဝၢၼ်ႈမႂ်ႇ လႄႈ ၸွမ်းယွမ်ႇႁိမ်းႁွမ်းပၢင်တိုၵ်းထႅင်ႈလၢႆဝၢၼ်ႈ ၸိူဝ်းၼႆႉ လႆႈဢွၼ်ၵၼ် ပၢႆႈ မႃးသွၼ်ႈဝႆႉတီႈ ဝတ်ႉပျီႇလူင်းၶျၢၼ်းတႃႇဝႆႉ မီးဝႆႉၼပ်ႉႁူဝ်ပၢၵ်ႇ။ ၵူၺ်းၵႃႈ မိူဝ်ႈၼႆႉ သဵင်ၵွင်ႈယဵၼ်ဝႆႉ”- ၵူၼ်းပိုၼ်ႉတီႈ ၵူတ်ႉၶၢႆ သိုပ်ႇလၢတ်ႈၼႄၼင်ႇၼႆ။

ဢိင်ၼိူဝ် လွင်ႈပဵၼ်ပၢင်တိုၵ်းၵၼ် တီႈၵူတ်ႉၶၢႆၼႆႉ မိူဝ်ႈဝၼ်းတီႈ 4 ပူၼ်ႉမႃးၼႆႉသေ ၵူၼ်းမိူင်း လႆႈမၢတ်ႇၸဵပ်း ၸွမ်းၼႂ်း ပၢင်တိုၵ်း 5 ၵေႃႉ ႁိူၼ်းယေး ၵူၼ်းဝၢၼ်ႈလႆႈလူႉၵွႆ 5 လင် ၼႆယဝ်ႉ။