ဝၢႆးသွၼ်းၼမ်ႉသၢင်းၵျၢၼ်ႇ မႃးၼႆႉ ၶွင်ႇသီႇသိုၵ်းမၢၼ်ႈ မိူၵ်းမႂ်ႈ ယိုဝ်းၵွင်ႈလူင်သႂ်ႇ တပ်ႉပၢင်သဝ်း RCSS/SSA ၸွမ်းလႅၼ် လိၼ်တႆး – ထႆး ပဵၼ်လၢႆတီႈ ဝႃႈၼႆ။
မိူဝ်ႈဝႃး ဝၼ်းတီႈ 21/4/2021 ယၢမ်းၵၢင်ၼႂ် 10:30 မူင်း သိုၵ်းမၢၼ်ႈ တပ်ႉယၢမ်းမၢႆ 11 ဢၼ်ယူႇၾၢႆႇတူၵ်း ဝၢၼ်ႈပၢင်မႂ်ႇသုင် ယၢၼ်လႅၼ်လိၼ်ထႆး မွၵ်ႈ 4 လၵ်း ပွႆႇမၢၵ်ႇလူင် သႅၼ်း 81 MM 5 လုၵ်ႈ/ ႁူၺ်ႇ သႂ်ႇဢွင်ႈတီႈတပ်ႉၵဝ်ႇသိုၵ်းတႆး RCSS/ SSA ယၢမ်းမၢႆ 1 ဢၼ်ယူႇယၢၼ် ဝတ်ႉၾႃႉဝဵင်းဢိၼ်းမွၵ်ႈ 2 လၵ်း (ဝတ်ႉဢၼ်ၸဝ်ႈၵွၼ်းၸိူင်း ၵေႃႇတင်ႈ လူႇတၢၼ်းဝႆႉ မီးၼႂ်းၸႄႈဝဵင်း ဝဵင်းႁႅင် ၸႄႈတွၼ်ႈ ၵဵင်ႈမႆႇ မိူင်းထႆး)။
ၵူၼ်းပိုၼ်ႉတီႈ လႅၼ်လိၼ်တႆး – ထႆး ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “သိုၵ်းမၢၼ်ႈ ပွႆႇမၢၵ်ႇမႃး 5 လုၵ်ႈ ပွႆႇမႃးတီႈ တပ်ႉ ယၢမ်းမၢႆ 1 – သၼ်လွႆလမ်၊ မၢၵ်ႇၸိူဝ်းၼၼ်ႉ တူၵ်းၼႂ်းပႃႇမႆႉ ႁိမ်းလႅၼ်လိၼ်ထႆး 5 လုၵ်ႈ ၼႂ်း ၼၼ်ႉတႅၵ်ႇ 1 လုၵ်ႈ”– ဝႃႈၼႆ။
မိူဝ်ႈဝႃး ယၢမ်းၵၢင်ၼႂ် မွၵ်ႈ 8:30 မူင်းၼင်ႇၵဝ်ႇ ၶွင်ႇသီႇသိုၵ်းမၢၼ်ႈ ဢၼ်ပၵ်းတပ်ႉ ဝႆႉတီႈပုၵ်းမူၼ်း မီးၾၢႆႇတူၵ်းလွႆတႆးလႅင်း ယၢၼ်မွၵ်ႈ 6 ၵီႊလူဝ်ႊမီႊတိူဝ်ႊ ၼၼ်ႉ ယိုဝ်းၵွင်ႈလူင် သႅၼ်း 81 MM မႃး 3 လုၵ်ႈ မၢၵ်ႇၼၼ်ႉ တူၵ်းတၢင်းၸဵင်ႇႁွင်ႇဝၼ်းဢွၵ်ႇ ငဝ်ႈၸိုင်ႈ လွႆတႆးလႅင်း တႅၵ်ႇတင်းသၢမ်လုၵ်ႈ။ ငဝ်းၸိုင်ႈလွႆတႆးလႅင်း RCSS တိတ်း ၸပ်းဝႆႉ တၢင်းၾင်ႇထႆး ၼႂ်းၸႄႈတွၼ်ႈမႄႈႁွင်ႈသွၼ် ၼႆယဝ်ႉ။
မိူဝ်ႈဝၼ်းတီႈ 18/4/2021 ယၢမ်းႁူဝ်ၶမ်ႈ 5:45 မူင်း ၼၼ်ႉၵေႃႈ သိုၵ်းမၢၼ်ႈမိူၵ်ႈမႂ်ႈ တႂ်ႈၵုမ်းၵမ် တိူင်းသိုၵ်းသၢမ်ၸဵင်ႇ ၵဵင်း တုင် ဢၼ်ပဵၼ် တပ်ႉႁူၺ်ႈၶႆႉဢၼ်ပၵ်းတေႃႇ ၼႃႈလွႆၵေႃႇမိူင်း ႁၢင်ႇၵႆ ငဝ်ႈငုၼ်းၼႃႈလိၼ်သိုၵ်း (မၢႆ-1) သၢႆသိုၵ်း ၵဵင်းတုင် လွႆၵေႃႇဝၼ်း မွၵ်ႈ 6 လၵ်း ၼၼ်ႉ ယိုဝ်းၵွင်ႈလူင် (Motar 120 MM) သႂ်ႇ တပ်ႉလွႆၵေႃႇဝၼ်း၊ တူၵ်းသႂ်ႇ တီႈၼႂ်းႁႆႈ ၵူၼ်းပၢႆႈၽေး ႁူၺ်ႈပၢင်ၵႂၢႆး 3 လုၵ်ႈ။
မိူဝ်ႈဝၼ်းတီႈ 19/4/2021 ယၢမ်းဝၢႆးဝၼ်း 3:38 မူင်းၼၼ်ႉၵေႃႈ သိုၵ်းမၢၼ်ႈ ယိုဝ်းၸူး တပ်ႉ RCSS /SSA တပ်ႉလွႆၵေႃႇဝၼ်း ၼႃႈလိၼ်သိုၵ်းမၢႆ 1 ၵဵင်းတုင်ထႅင်ႈမၢၵ်ႇလူင် 2 လုၵ်ႈ။ တပ်ႉလွႆၵေႃႇဝၼ်း ၼႃႈလိၼ်သိုၵ်းမၢႆ 1 သမ်ႉ တိတ်းၸပ်း တၢင်း လႅၼ်လိၼ်ထႆး ၼႂ်းၸႄႈတွၼ်ႈၵဵင်းႁၢႆး ။
တေႃႇထိုင်ဝၼ်းမိူဝ်ႈၼႆႉ ၾၢႆႇတပ်ႉသိုၵ်းၸိုင်ႈတႆး RCSS/SSA ဢမ်ႇမီးလွင်ႈတုမ်ႉတွပ်ႇသင်ၶိုၼ်းလႄႈ သွင်ၾၢႆႇၵေႃႈ ဢမ်ႇပႆႇပဵၼ်ပၢင်တိုၵ်းၵၼ်။ ၵူၺ်းၵႃႈ ၵူၼ်းပၢႆႈၽေး ဢၼ်မီးၸွမ်းလႅၼ်လိၼ်တႄႉ မႆႈၸႂ် ၵူဝ်ပဵၼ်ပၢင်တိုၵ်းထႅင်ႈလႄႈ ဢဝ်လုၵ်ႈ ဢဝ်လၢင်း ၶဝ်ႈယူႇၼႂ်းလုၵ်းထႅင်ႉ လုၵ်းပဵၼ် ။
