ၵူၼ်းပၢႆႈၽေးသိုၵ်း ႁူဝ်ၵူၼ်း 400 ပၢႆ ဢၼ်ပၢႆႈမႃးသွၼ်ႈဝႆႉတီႈဝၢၼ်ႈပၢင်သပေႇ ဝဵင်းၼမ်ႉတူႈၼၼ်ႉ လူဝ်ႇတၢင်းၸွႆႈထႅမ် ၶွင်ၵိၼ်ယႅမ်ႉလႄႈ တႃႇယူႇသဝ်းၵိၼ်သၢင်ႈ ဝႃႈၼႆ။
ၵူၼ်းဝၢၼ်ႈပၢင်ၵႅၼ် ဝၢၼ်ႈၶႄႇလႄႈ ဝၢၼ်ႈပၢင်လူင် ဢၼ်ပၢႆႈမႃးသွၼ်ႈဝႆႉတီႈ ဝတ်ႉပၢင်သပေႇ မၢၼ်ႈလီ ဢၼ်မီးၼႂ်းၵႄႈ ၼမ်ႉတူႈ – သီႇပေႃႉ ၼႂ်းၸႄႈဝဵင်းၼမ်ႉတူႈ ၸိုင်ႈတႆး ပွတ်းႁွင်ႇ ႁူဝ်ၵူၼ်း 402 ၵေႃႉၼၼ်ႉ ႁူပ်ႉလွင်ႈယၢပ်ႇၽိုတ်ႇၵိၼ်းၸႂ် လွင်ႈၶဝ်ႈၼမ်ႉတၢင်းၵိၼ် ၶူဝ်းၼုင်ဝႆ ႁၢဝ်ႈႁႅင်း ၼႆယဝ်ႉ။
ၼၢင်းမွၼ်းမွၼ်းပဝ်း ၽူႈတႅၼ်းသၽႃး ၸႄႈဝဵင်းသီႇပေႃႉ ဢၼ်ဢွင်ႇပေႉပၢင်လိူၵ်ႈတင်ႈ ပီ 2020 ၼႆႉ လၢတ်ႈဝႃႈ – “မိူဝ်ႈၵႆႈ ႁဝ်းၶႃႈ လႆႈၵႂႃႇသူႇၸႂ်း ၵူၼ်း ပၢႆႈၽေး တီႈပၢင်သပေႇ။ ၶဝ်ထူပ်းတၢင်းယၢပ်ႇၽိုတ်ႇလိူဝ်ႁႅင်းၶႃႈဢေႃႈ။ လႆႈၵိၼ်ၶဝ်ႈၵပ်းဢီႇမဵတ်ႈၵူၺ်းၶႃႈ။ ပေႃး ႁဝ်းၶႃႈ ၵႂႃႇၽႅဝ်ၼႆၵေႃႈ ပီႈၼွင်ႉၵူၼ်းပၢႆႈၽေး ၸူမ်းၼမ်ႉတႃပေႃးတူၵ်း ၶႃႈဢေႃႈ။ ယၢမ်းလဵဝ် ၶၢတ်ႇၶဝ်ႈၼမ်ႉတင်းၵိၼ် လွင်ႈ ၼုင်ႈဝႆၶႃႈဢေႃႈ လူဝ်ႇၼႃႇၶႃႈ”- ဝႃႈၼႆ။
ထႅင်ႈၾၢႆႇၼိုင်ႈၵေႃႈ သဵၼ်ႈတၢင်း ၼမ်ႉတူႈ ဢၼ်ၵၢႆႇၸူး ဝၢၼ်ႈပၢင်သပေႇ ၵမ်းသိုဝ်ႈၼၼ်ႉ ထုၵ်ႇၸုမ်းယိပ်းၵွင်ႈၵၢင်ႇပိၵ်ႉ ဢိုတ်းသဵၼ်ႈတၢင်းဝႆႉ ဢမ်ႇပၼ် ၵူၼ်းမိူင်းၵႂႃႇမႃးလႄႈ တႃႇၸုမ်းၸွႆႈထႅမ်ၵူၼ်းပၢႆႈၽေး တေတေႃႉသူင်ႇၶဝ်ႈၼမ်ႉတၢင်းၵိၼ် ၵႂႃႇၸွႆႈၼၼ်ႉ ပဵၼ်ဢၼ်ယၢပ်ႇၽိုတ်ႇ ၵိၼ်းၸႂ် လိူဝ်ႁႅင်း ဝႃႈၼႆ။
လုင်းၸၢႆးပႃႉၺၢၼ်ႇ ၵႅမ်ႁူဝ်ပဝ်ႈ ၶွမ်ႊမတီႊၸွႆႈထႅမ်ၵူၼ်းပၢႆႈၽေးသိုၵ်း တီႈၼမ်ႉတူႈ လၢတ်ႈဝႃႈ – “သဵၼ်ႈတၢင်း ၼမ်ႉတူႈ – ပၢင်သပေႇ ဢၼ်ၵၢႆႇၸူးၵၼ်ၼႆႉ ၶဝ်ပိၵ်ႉဝႆႉ သဵၼ်ႈတၢင်းဢိူဝ်ႈ။ ၶဝ်ႈၼမ်ႉတၢင်းၵိၼ် တႃႇတေတေႃႉသူင်ႇ ပၼ်ၵူၼ်းပၢႆႈ ၽေး ပဵၼ်ဢၼ်ယၢပ်ႇၵိၼ်းၸႂ်တႄႉတႄႉၶႃႈ၊ ဢမ်ႇၸၢင်ႈတေႃႉသူင်ႇ ပၼ် ”- ဝႃႈၼႆ။
ၵူၼ်းပၢႆႈၽေးသိုၵ်း ဢၼ်ႁွတ်ႈၽႅဝ်ဝႆႉတီႈ ဝတ်ႉပၢင်သပေႇၼၼ်ႉ ၵမ်ႈၼမ် ပဵၼ်ၵူၼ်းထဝ်ႈ၊ ၼၢင်းယိင်းလႄႈ လုၵ်ႈဢွၼ်ႇ ၼႆယဝ်ႉ။
တႄႇဢဝ် ဝၼ်းတီႈ 28/3/2021 ၼႆႉမႃး ယွၼ်ႉၸုမ်းယိပ်းၵွင်ႈၵၢင်ႇၸၢဝ်းၶိူဝ်းၼင်ႇၼႆ ၸုမ်းဢူၺ်းလီ ပွတ်းႁွင်ႇ TNLA, SSPP တင်း RCSS ပဵၼ်ပၢင်တိုၵ်းၵၼ်ႁၢဝ်ႈႁႅင်းသေ ၵူၼ်းဝၢၼ်ႈလႆႈဢွၼ်ၵၼ်ပၢႆႈဢွၵ်ႇဝၢၼ်ႈမႃးသွၼ်ႈတီႉဝတ်ႉၵျွင်းမုၼ်ၸဝ်ႈ တေႃႇထိုင်ဝၼ်းမိူဝ်ႈၼႆႉ ယင်းပႆႇၸၢင်ႈပွၵ်ႈၶိုၼ်းႁိူၼ်းယေး။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ