မိူဝ်ႈၼႆႉ ဝၼ်းတီႈ 24/3/2021 ယၢမ်းၵၢင်ၼႂ် မၢၵ်ႇလူင် တူၵ်းသႂ်ႇ တီႈဝတ်ႉ/ ၵျွင်းပၢင်ၵုတ်ႇ ၼႂ်းထုင်ႉပၢင်သေႃႉ ၸႄႈဝဵင်း ၼမ်ႉတူႈ ၸႄႈတွၼ်ႈၵျွၵ်ႉမႄး ၸိုင်ႈတႆး ပွတ်းႁွင်ႇ ယွၼ်ႉသိုၵ်း TNLA တင်း RCSS ပဵၼ်ပၢင်တိုၵ်းၵၼ်။

ၵူၼ်းပိုၼ်ႉတီႈ ပၢင်ၵုတ်ႇ လၢတ်ႈဝႃႈ – “ၸႂ်ႈၶႃႈဢေႃႈ မၢၵ်ႇလူင် တူၵ်းသႂ်ႇၵျွင်း 2 လုၵ်ႈ ၸၢၵ်ႇမၢၵ်ႇ တိူဝ်ႉသႂ်ႇ ၸဝ်ႈသြႃႇႁဝ်း ၶႃႈ လႆႈမၢတ်ႇၸဵပ်းပႃးၶႃႈဢေႃႈ။ ယၢမ်းလဵဝ်လႆႈဢဝ်ၵႂႃႇယူတ်းယႃဝႆႉတီႈလႃႈသဵဝ်ႈၶႃႈ။ ”- ဝႃႈၼႆ။

ပၢင်တိုၵ်းဢၼ်ပဵၼ်တၢင်းၼမ်ႉတူႈမိူဝ်ႈၼႆႉ တႄႇဢဝ် ယၢမ်းၵၢင်ၼႂ် 6 မူင်း ထိုင် 10 မူင်း သဵင်ၵွင်ႈၸင်ႇတေယဵၼ် လူင်း ၵႂႃႇဝႃႈၼႆ။

“သိုၵ်းလွႆ လုၵ်ႉတၢင်းၼမ်ႉသၼ်ႇ လူင်းမႃးၶႃႈဢေႃႈ ယူႇတီႈပၢင်တွင်းသေ ယိုဝ်း မႃးတၢင်းပၢင်ၵုတ်ႈၼႆႉၶႃႈ။ ၸွမ်းႁိမ်း ႁွမ်းပၢင်ၵုတ်ႈ ၸိူဝ်းၼႆႉသမ်ႉ သိုၵ်းၶူဝ်းလၢႆး တူင်ႉၼိုင်ယူႇဝႆႉ ပၢင်တိုၵ်းတႄႉ တႄႇဢဝ် ယၢမ်းၵၢင်ၼႂ် 6 မူင်း ထိုင် 10 မူင်း ၼႆႉၶႃႈ”- ၵူၼ်းပၢင်ၵုတ်ႇ သိုပ်ႇလၢတ်ႈၼႄၼင်ႇၼႆ။

ဝၢၼ်ႈပၢင်ၵုတ်ႇၼႆႉ မီးၾၢႆႇ တူၵ်းမၢၼ်ႈၸၢမ် ယၢၼ်ၵႆဝဵင်းၼမ်ႉတူႈ မွၵ်ႈ 16 လၵ်း  ။

ၼွၵ်ႈလိူဝ်ၼၼ်ႉ တၢင်းၾၢႆႇႁွင်ႇဝၢၼ်ႈၼွင်ဢေႃႈ ၸိူဝ်းဝၢၼ်ႈၼႃးႁၢင်း၊ ၼႃးငူး ၸိူဝ်းၼၼ်ႉၵေႃႈ ယၢမ်းလဵဝ် တိုၵ်ႉသိုပ်ႇ ပဵၼ်ပၢင်တိုၵ်းၵၼ်ယူႇ ။

 တၢင်းၾၢႆႇဢွၵ်ႇ ပၢင်လူင် မၢၼ်ႈလီ လွႆလမ် ၸိူဝ်းၼႆႉၵေႃႈ သိုၵ်းတင်းသွင်ၾၢႆႇ တိုၵ်ႉၶဵင်ႈၶႅင်ၵၼ်ဝႆႉ ၵူၼ်းမိူင်း မႆႈၸႂ် ၵူဝ်ပဵၼ်ပၢင်တိုၵ်းႁၢဝ်ႈႁႅင်း  ။

တႄႇဢဝ် ၵၢင်လိူၼ်ၾႅပ်ႊၿိဝ်ႊရီႊမႃး တေႃႇထိုင်ယၢမ်းလဵဝ်ၼႆႉ သိုၵ်း RCSS တင်း ၸုမ်းဢူၺ်းလီ ပွတ်းႁွင်ႇ TNLA, SSPP ပဵၼ်ပၢင်တိုၵ်းၵၼ်မႃးႁၢဝ်ႈႁႅင်း ၵူၼ်းမိူင်း ႁိမ်းႁဵင် လႆႈဢွၼ်ၵၼ်ပၢႆႈၽေးသိုၵ်း ၊ ၵမ်ႈၽွင်းယင်းပႆႇၸၢင်ႈပွၵ်ႈၶိုၼ်းႁိူၼ်းယေး၊ ယၢပ်ႇၽိုတ်ႇလွင်ႈယူႇလွင်ႈၵိၼ်။