RCSS တင်း TNLA ပဵၼ်ပၢင်တိုၵ်းၵၼ် တၢင်းၼမ်ႉတူႈ မၢၵ်ႇလူင် တူၵ်းသႂ်ႇၼႂ်းဝၢၼ်ႈလုၵ်ႈၼိုင်ႈ တႅၵ်ႇတိူဝ်ႉ ၵူၼ်းဝၢၼ်ႈလႆႈမၢတ်ႇၸဵပ်း ၵေႃႉၼိုင်ႈ ။
မိူဝ်ႈၼႆႉ ဝၼ်းတီႈ 23/3/2021 ယၢမ်းၵၢင်ၼႂ် သိုၵ်း RCSS တင်း TNLA ပဵၼ်ပၢင် တိုၵ်းၵၼ် တီႈႁိမ်းမၢၼ်ႈၸၢမ် ၸႄႈဝဵင်း ၼမ်ႉတူႈ ၸႄႈတွၼ်ႈၵျွၵ်ႉမႄး ၸိုင်ႈတႆး ပွတ်းႁွင်ႇ မၢၵ်ႇလူင် လုၵ်ႈၼိုင်ႈတူၵ်းသႂ်ႇ ၼႂ်းမၢၼ်ႈၸၢမ် ၸၢၵ်ႇမၢၵ်ႇတိူဝ်ႉသႂ်ႇ ၵူၼ်းဝၢၼ်ႈ လႆႈမၢတ်ႇၸဵပ်း ၵေႃႉၼိုင်ႈ ၼႆယဝ်ႉ။
ၸဝ်ႈႁၢၼ် ၶမ်းၸၢမ်ႇ ၽူႈၶၢၼ်ပၢၵ်ႇ RCSS လၢတ်ႈဝႃႈ – “မိူဝ်ႈၼႆႉ တၢင်းၼမ်ႉတူႈ တီႈႁိမ်းမၢၼ်ႈၸၢမ် RCSS ႁဝ်းၶႃႈ တင်း TNLA ပဵၼ်ပၢင်တိုၵ်းၵၼ် သိုၵ်း TNLA ဢဝ်မၢၵ်ႇပွႆႇၶဝ်ႈၼႂ်းဝၢၼ်ႈ ၼၢင်းယိင်းၸၢဝ်းၶႄႇၵေႃႉၼိုင်ႈ လႆႈတိူဝ်ႉၺႃး မၢတ်ႇၸဵပ်း တီႈၶႃ” – ဝႃႈၼႆ။
လိူဝ်ၼၼ်ႉ မိူဝ်ႈၼႆႉ ယၢမ်းၵၢင်ၼႂ် တၢင်းပွတ်းဢိူင်ႇတေႃႇသၢင်ႇ ႁိမ်းဝၢၼ်ႈပၢင်မၢၵ်ႇ မိုဝ်း ၸႄႈဝဵင်းၵျွၵ်ႉမႄးၵေႃႈ သိုၵ်း RCSS တင်း TNLA လႆႈပဵၼ်ပၢင်တိုၵ်းၵၼ်သေ မၢၵ်ႇလူင် တူၵ်းသႂ်ႇ ၼႂ်းႁိူၼ်းၵူၼ်းဝၢၼ်ႈလုၵ်ႈၼိုင်ႈ ၵူၼ်းဝၢၼ်ႈလႆႈလူႉ တၢႆ 1 ၵေႃႉ ၼၢင်းယိင်း 3 ၵေႃႉ လႆႈတိူဝ်ႉမၢတ်ႇၸဵပ်း ၸွမ်းႁၢဝ်ႈႁႅင်း ၼႆယဝ်ႉ။