မိူဝ်ႈၼႆႉ ဝၼ်းတီႈ 23/3/2021 ယၢမ်းၵၢင်ၼႂ် ၵူၼ်းဝၢၼ်ႈသူၼ်လူင်၊ ႁၢတ်ႇလႅၼ်ႈ လႄႈ ဝၢၼ်ႈၽႃလၢႆး ၼႂ်းဢိူင်ႇၵုင်းသႃႇ ႁူဝ်ၵူၼ်း 97 ၵေႃႉ လႆႈပၢႆႈၽေးသိုၵ်း မႃးသွၼ်ႈဝႆႉတီႈ ဝတ်ႉဢွင်ႇမင်ႇၵလႃႇၽူဝ်းတေႃႇ ၼႂ်းဝဵင်းသီႇပေႃႉ တႄႈတွၼ်ႈၵျွၵ်ႉ မႄး ၸိုင်ႈတႆး ပွတ်းႁွင်ႇ ယွၼ်ႉသိုၵ်း RCSS တင်း SSPP ပိုတ်းယိုဝ်းၵၼ် ။
ၵူၼ်းဝၢၼ်ႈ ဢၼ်ပၢႆႈမႃးသွၼ်ႈဝႆႉတီႈ ဝတ်ႉၽူဝ်းတေႃႇ လၢတ်ႈဝႃႈ – “ဝၢႆးဝၼ်းၼႆႉ ႁဝ်းၶႃႈ ဢွၼ်ၵၼ်ပၢႆႈဢွၵ်ႇမႃး တေမီး 97 ၵေႃႉၶႃႈ။ ႁူဝ်ၶမ်ႈၼႆႉ လႅပ်ႈတေထိုင်မႃးထႅင်ႈၶႃႈ။ ဢမ်ႇၶႂ်ႈလၢတ်ႈယဝ်ႉၶႃႈ ပဵၼ်ႁဝ်းၼင်ႇၵၼ် ယိုဝ်းၵၼ်ၶႃႈဢေႃႈ” – ဝႃႈၼႆ။
ဢိင်ၼိူဝ် လွင်ႈၼႆႉ ၽူႈၶၢၼ်ပၢၵ်ႇ SSPP တႄႉဝႃႈ RCSS တင်း SSPP ပိုတ်းယိုဝ်းၵၼ်။ ၵူၺ်းၵႃႈ တၢင်းၽူႈၶၢၼ်ပၢၵ်ႇ RCSS တႄႉဝႃႈ တၢင်းသီႇပေႃႉတႄႉ ပႆႇငိၼ်းဝႃႈႁိုဝ် ဝႃႈၼႆ။
ယၢမ်းလဵဝ်ၾၢႆႇၸွႆႈထႅမ်ၵူၼ်းပၢႆႈၽေး ၸုမ်းပရႁိတ ၶတ်းၸႂ်ၸွႆႈထႅမ် ဝႆႉယူႇသေတႃႉ ၵူၼ်းပၢႆႈၽေးဢမ်ႇတၼ်းလႆႈသင်ၵိုၵ်းၸပ်းတူဝ်မႃးလႄႈ မီးလွင်ႈယၢပ်ႇၽိုတ်ႇ ၽႃႈႁူမ်ႇၶူဝ်းၼွၼ်းဢိၵ်ႇၶဝ်ႈၼမ်ႉတင်းၵိၼ်။
ၼၢင်းမွၼ်းမွၼ်းပဝ်း တႅၼ်းၽွင်းၸႄႈဝဵင်းသီႇပေႃႉဢၼ်ဢွင်ႇပေႉပၢင်လိူၵ်ႈတင်ႈ 2020 ပူၼ်ႉမႃးၼႆႉလၢတ်ႈတီႈၽူႈတွႆႇႁွၵ်ႈဝႃႈ – “ၵမ်ႈၽွင်ႈသမ်ႉတေမႃးတၢင်းၼႆႉ ၵမ်ႈၽွင်ႈသမ်ႉတေၵႂႃႇတင်းပွတ်းၼမ်ႉဢုၼ်ႇ ၸေႈဢႅၼ်ႇၼႆၼၼ်ႉၼႃႇ ။ ၶၢဝ်းတၢင်းၶဝ်ၵေႃႈသမ်ႉယၢပ်ႇၽိုတ်ႇသေ ၶဝ်ၵေႃႈဢမ်ႇလႆႈသင်မႃး။ ဢမ်ႇမီးၽႃႈၽႅၼ်ႇ၊ ဢၼ်ၵိၼ်ဢၼ်ယႅမ်ႉၵေႃႈ ဢမ်ႇပေႃးတႅမ်ထူၼ်ႈ ဢမ်ႇပႆႇမီးၽႂ်မႃးႁၢင်ႈႁႅၼ်းဝႆႉပၼ် ”- ဝႃႈၼႆ။
တင်ႈဢဝ်ၽွင်းၶၢဝ်းသိုၵ်းမၢၼ်ႈယိုတ်းဢႃႇၼႃႇဝၢၼ်ႈမိူင်းမႃးၼႆႉ ဝၢၼ်ႈမိူင်းသုၵ်ႉယုင်ႈ ဢူၼ်ဢၢၼ်ပတ်းပိုၼ်ႉၸိုင်ႈမိူင်း။ လိူဝ်ၼၼ်ႉၼႂ်းမိူင်းတႆးပွတ်းႁွင်ႇ ၸွမ်းဝဵင်းၵျွၵ်ႉမႄး၊ ၼမ်ႉတူႈ၊သီႇပေႃႉၸိူဝ်းၼႆႉၵမ်းၵမ်းပဵၼ်ပၢင်တိုၵ်းၵၼ်ယူႇတိၵ်းတိၵ်းလႄႈ ၵူၼ်းပၢႆႈၽေးသိုၵ်းမၢင်တီႈ ယင်းပႆႇၸၢင်ႈပွၵ်ႈၶိုၼ်းႁိူၼ်းၵေႃႈ တိုၵ်ႉမီးဝႆႉ တင်းၼမ် ။
