ဝၼ်းမိူဝ်ႈၼႆႉ 9/3/2021 ယၢမ်းဝၢႆးဝၼ်း ၶွင်ႇသီႇဢဝ်ၶိုၼ်းၸိုင်ႈတႆး တပ်ႉသိုၵ်းၸိုင်ႈတႆး RCSS/SSA တင်း ၶွမ်ႊမတီႊတႅၼ်းတၢင်သၽႃးမိူင်းႁူမ်ႈတုမ် CRPH ႁူပ်ႉထူပ်းၵၼ် တင်းဢွၼ်ႊလၢႆႊ လူၺ်ႈဢမ်ႇပဵၼ်တၢင်းၵၢၼ်။
ပၢင်ႁူပ်ႉထူပ်းဢုပ်ႇဢူဝ်းၵၼ်ၼၼ်ႉ ၸဝ်ႈသိုၵ်းလူင်ၸၢႆးငိုၼ်း ၽူႈၼမ်းၼႂ်း (2) ၶွင်ႇသီႇဢဝ်ၶိုၼ်းၸိုင်ႈတႆး RCSS/SSA ဢွၼ်ႁူဝ်သေ မီးၽူႈၶဝ်ၵေႃပွင်ၵၢၼ်ငဝ်ႈငုၼ်း ၸဝ်ႈသိုၵ်းၸၢႆးႁၢၼ်၊ ၸၢႆးလႅင်း ၶဝ်ႈႁူမ်ႈၸွမ်း။
ထႅင်ႈၾၢႆႇၼိုင်ႈသမ်ႉ ၽူႈၶဝ်ၵေႃပွင်ၵၢၼ်ငဝ်ႈငုၼ်း ပႃႇတီႇၼူၵ်ႉယုင်း ဢူးဢွင်ႇၵျီႇၺုၼ်ႉ လႄႈ ၽူႈတႅၼ်းသၽႃး CRPH ဢူးတိၼ်ႇထုတ်ႉဢူး၊ ဢူးလုၼ်ႇၵူဝ်ႇလၢတ်ႈ မေႃတႅမ်ႈၵႃႇတုၼ်း ယီႇမုၼ်ႇ၊ တေႃႇၸိၼ်ႇမႃႇဢွင်ႇ တင်း ၸေႃးယႃးၽွင်ႇယႂႃႇ ၶဝ်ၸိူဝ်းၼႆႉ ၶဝ်ႈႁူမ်ႈ ဢုပ်ႇဢူဝ်းၸွမ်း။
ပၢင်ႁူပ်ႉထူပ်းဢုပ်ႇဢူဝ်းၵၼ်ၼၼ်ႉ ဢုပ်ႇဢူဝ်း လႅၵ်ႈလၢႆႈတၢင်းႁၼ်ထိုင် ၵဵဝ်ႇၵပ်းငဝ်းလၢႆးၵၢၼ်မိူင်းဝၼ်းမိူဝ်ႈၼႆႉ၊ CRPH သမ်ႉ သပ်းလႅင်းဢုပ်ႇဢူဝ်းလွင်ႈႁဵတ်းလွင်ႈသၢင်ႈၼႃႈၵၢၼ် ဝၢႆးသိုၵ်းမၢၼ်ႈ ယိုတ်းဢႃႇၼႃႇ ၊ ႁႃလွၵ်းလၢႆး တၢင်းဢွၵ်ႇ ပၼ်ႁႃၵၢၼ်မိူင်း။
ၸိူင်ႉၼၼ်ၼင်ႇၵဝ်ႇ ၾၢႆႇၶွင်ႇသီႇဢဝ်ၶိုၼ်းၸိုင်ႈတႆးၵေႃႈ ဢုပ်ႇဢူဝ်းလႅၵ်ႈလၢႆႈ ၵဵဝ်ႇၵပ်းၶၵ်ႉ ၵၢၼ်လွင်ႈငမ်းယဵၼ် ဝၢႆး ၸုမ်းသိုၵ်းမၢၼ်ႈ ယိုတ်းဢဝ်ဢႃႇၼႃႇဝၢၼ်ႈမိူင်းမႃး ၸဵမ်ၸိူဝ်းၼႆႉ။