လိၵ်ႈဢၼ် ၸႂ်ႉၸိုဝ်ႈႁွင်ႈၵၢၼ်ၾၢႆႇၼွၵ်ႈမိူင်း RCSS ယိုၼ်ႈထိုင် တွၵ်ႊတိူဝ်ႊသႃႊသႃႊ ၵဵဝ်ႇၵပ်းလွင်ႈတေႁူမ်ႈမိုဝ်းၵၼ်ႁဵတ်းၵၢၼ်ၵႂႃႇၼၼ်ႉ ဢမ်ႇၸႂ်ႈၶေႃႈၸီႉသင်ႇ ႁူဝ်ပဝ်ႈ RCSS ၸွမ်သိုၵ်းလူင်ယွတ်ႈသိုၵ်း ဝႃႈၼႆ။

ဝၼ်းတီႈ 6/3/2021 မိူဝ်ႈၼႆႉမီးလိၵ်ႈၽိုၼ်ႈၼိုင်ႈ ယိုၼ်ႈထိုင် တွၵ်ႊတိူဝ်ႊသႃႊသႃႊ ၽူႈတႅၼ်းတၢင်မိူင်းမၢၼ်ႈ CRPH ၵဵဝ်ႇလူၺ်ႈၸၢတ်ႈၸိုင်ႈလုမ်ႈၾႃႉၵဵဝ်ႇၵပ်းလွင်ႈတႃႇသၢၼ်မိုဝ်းၵၼ်ႁဵတ်းၵၢၼ်ၵႂႃႇ။ တီႈၽိုၼ်လိၵ်ႈၼၼ်ႉ တွၵ်ႇဝႆႉမၢႆ (လူဝ်ႊၵူဝ်ႊ) ႁွင်ႈၵၢၼ်ၾၢႆႇၼွၵ်ႈမိူင်း ၶွင်ႇသီႇဢဝ်ၶိုၼ်းၸိုင်ႈတႆးတပ်ႉသိုၵ်းၸိုင်ႈတႆး RCSS/SSA သေ တူဝ်ၽူႈၵွၼ်းႁွင်ႈၵၢၼ်ၾၢႆႇၼွၵ်ႈမိူင်း  ၸဝ်ႈယွတ်ႈမိူင်း(Philip) လူင်းလၢႆးမိုဝ်းဝႆႉ။

 ၵူၼ်းၸမ်ၸႂ် ၸွမ်သိုၵ်းလူင်ယွတ်ႈသိုၵ်း ၸဝ်ႈၼိုင်ႈ ယိုၼ်ယၼ်လၢတ်ႈတီႈၽူႈတွႆႇႁွၵ်ႈဝႃႈ – ၸဝ်ႈႁူဝ်ပဝ်ႈလူင်လၢတ်ႈဝႃႈ မၼ်းၸဝ်ႈဢမ်ႇလႆႈၸီႉသင်ႇ။ ၵဵဝ်ႇၵပ်းၽိုၼ်လိၵ်ႈၼႆႉၵေႃႈမၼ်းၸဝ်ႈဢမ်ႇလႆႈႁူႉၸွမ်းၼႆဝႃႇ။ပေႃးတေႁဵတ်း ၵၢၼ်လမ်ႇလွင်ႈ ၸိူင်ႉၼႆတႄႉ တၵ်းလႆႈဢဝ်ၶေႃႈတႅပ်းတတ်းငဝ်ႈငုၼ်း။ ၵဵဝ်ႇၵပ်းလွင်ႈ CRPH ၼႆႉႁဝ်းၵေႃႈယင်းပႆႇလႆႈဢုပ်ႇၵၼ်တင်းတီႈ PPST လူး- ဝႃႈၼႆ။

ၵွပ်ႈၼႆလႄႈလိၵ်ႈၽိုၼ်ၼၼ်ႉၸၢင်ႈပဵၼ် 1- ဢၼ်ပွမ်၊ 2- ယူႇတီႈသုၼ်ႇတူဝ်သေတႅမ်ႈၸူး ။ ယၢမ်းလဵဝ် တိုၵ်ႉတေၵူတ်ႇထတ်းတူၺ်းၵႂႃႇပဵၼ်ၶၵ်ႉပဵၼ်တွၼ်ႈယူႇ – မၼ်းၸဝ်ႈသိုပ်ႇလၢတ်ႈၽူႈတွႆႇႁွၵ်ႈၼင်ႇၼႆ။  

 ၵဵဝ်ႇၵပ်းလွင်ႈၼႆႉ ၽူႈတွႆႇႁွၵ်ႈလႆႈၵပ်းသိုပ်ႇၸူး ၽူႈၶၢၼ်ပၢၵ်ႇ RCSS ၊ လႆႈၵပ်းသိုပ်ႇၸူး ၽူႈၵွၼ်းႁွင်ႈၵၢၼ်ၾၢႆႇၼွၵ်ႈမိူင်း  RCSS လၢႆလၢႆၵမ်းၵေႃႈ ၶဝ်ၸဝ်ႈပိၵ်ႉၾူၼ်းဝႆႉလႄႈ ဢမ်ႇလႆႈလၢတ်ႈတေႃႇ။

ယူႇတီႈ PPST (ဢၼ်ပႃး RCSS )ဝႆႉၼၼ်ႉတႄႉ တိုၵ်ႉလႆႈဢွၵ်ႇလိၵ်ႈ လွင်ႈဝႃႈၵမ်ႉထႅမ် ၶႃႈႁၢပ်ႇၵၢၼ်ၶုၼ် ၶဝ်ႈႁူမ်ႈ CDM ၼၼ်ႉၽိုၼ်လဵဝ်မိူဝ်ႈဝၼ်းတီႈ 20/2/2021။ ၵဵဝ်ႇၵပ်းလွင်ႈ CRPH သေတႄႉ  PPST ယင်းပႆႇလႆႈဢွၵ်ႇၽိုၼ်လိၵ်ႈသေဢၼ်။

 ၵူၺ်းၵႃႈၼႂ်းၶၢဝ်းတၢင်း ဢမ်ႇႁိုင်ဢမ်ႇၼၢၼ်းၼႆႉတႄႉ PPST ၽူႈၼမ်းၸုမ်းယိပ်းၵွင်ႈၵၢင်ႇၸၢဝ်းၶိူဝ်းၸိူဝ်းၵိုတ်းတိုၵ်း တေႁူပ်ႉထူပ်းဢုပ်ႇဢူဝ်းၵၼ်ထႅင်ႈ၊ ၽွင်းၼၼ်ႉတေၸၢင်ႈဢုပ်ႇဢူဝ်းလွင်ႈ CRPH ယူႇ လႆႈႁူႉၼင်ႇၼႆ။