တီႈမူႇၸေႊ မီးၵူၼ်းဢမ်ႇႁူႉၾၢႆႇ ဢဝ်ၵၼ်ႈၶႄႈ ထိုမ်ႈသႂ်ႇ ႁိူၼ်းၵူၼ်းဝၢၼ်ႈ ၶိုင်ဢၢင်ႈၽဝ် ၸဝ်ႈႁိူၼ်းတၼ်းႁူႉဝႆးသေ ဢမ်ႇတၼ်းပဵၼ်ၽဝ် ။

ဝၼ်းတီႈ 15/2/2021 ယၢမ်းၵၢင်ၶိုၼ်းမွၵ်ႈ 12 မူင်းၼႆႉ မီးၵူၼ်းၸုမ်းၼိုင်ႈ ဢဵၼ်ႁႅင်း မွၵ်ႈ 2 ၵေႃႉ ဢဝ်ၵၢၼ်ႈၶေႈ ထိုမ်ႈသႂ်ႇ ၼႂ်းႁိူၼ်း ၵူၼ်းဝၢၼ်ႈ လင်ၼိုင်ႈ တီႈဝၢၼ်ႈႁူဝ်ၼႃး ပွၵ်ႉၵွင်းမူးတူင်ႈ ၸႄႈဝဵင်းမူႇၸေႊ ၸိုင်ႈတႆးပွတ်းႁွင်ႇ ၶိုင်ဢၢင်ႈ ၽဝ်ႁိူၼ်း လႄႈၵူၼ်းဝၢၼ်ႈတူၵ်းၸႂ်။

ၸၢႆးႁိၼ်လဵၵ်း ၸုမ်းၶၢဝ်ႇထုင်ႉႁူၺ်ႈလီႈ မူႇၸေႊ လၢတ်ႈဝႃႈ – “မီးၵူၼ်းဢမ်ႇႁူႉ ၾၢႆႇ 2 ၵေႃႉ ၶီႇလူတ်ႉၶိူင်းမႃးလမ်းၼိုင်ႈ  ။ဢဝ်ၵၢၼ်ႈၶႄႈ ထိုမ်ႈသႂ်ႇ ၼႂ်းႁိူၼ်း။  ပဵၼ်ၵၢၼ်ၶႄႈ ဢၼ်ၸုပ်ႉၼမ်ႉမၼ်းဝႆႉ တႃႇၸုတ်ႇၽဝ်။ ၵူၺ်းပႆႇတၼ်းလႆႈၸုတ်ႇၾႆး။ ပေႃးမႃးတူၵ်းသႂ်ႇႁိူၼ်းၵေႃႈ ၸဝ်ႈႁိူၼ်းတိုၼ်ႇ ႁူႉတူဝ်သေဢွၵ်ႇတူၺ်း ။ ၵူၼ်းၶီႇရူတ်ႉၶိူင်ႈၼၼ်ႉ ႁေႃႈပၢႆႈဢွၵ်ႇၵႂႃႇ”- ဝႃႈၼႆ။

ၵဵဝ်ႇၵပ်းလွင်ႈၼႆႉ ပဵၼ်ၼမ်ႉမိုဝ်းၽႂ် ၸုမ်းလႂ်ႁဵတ်း ဢၼ်ဝႃႈၼၼ်ႉ ဢမ်ႇပႆႇႁူႉၵေႃႉမၼ်း ဝႃႈၼႆ။

ၸႄႈဝဵင်းမူႇၸေႊၼႆႉ ပဵၼ်ဝဵင်းတိတ်းၸပ်းလႅၼ်လိၼ်တႆး – ၶႄႇ ဝဵင်းၼိုင်ႈ။ ပဵၼ်ဝဵင်းၵႃႉၶၢႆပၢႆးမၢၵ်ႈ မီးၵေႃႈ ၸႂ်ႈသေ ၸဵမ်ၸုမ်းပျီႇတူႉၸိတ်ႉ ၸုမ်းယိပ်းၵွင်ႈၵၢင်ႇ သိုၵ်းမၢၼ်ႈ ၸိူဝ်းၼႆႉ ယူႇၼိုင်ယူႇသဝ်း ဝႆႉတင်းၼမ်။

ယၢမ်းလဵဝ် သမ်ႉပဵၼ်ၶၢဝ်းၵူၼ်းမိူင်းဢွၵ်ႇၼႄသၢၼ်ၶတ်းသိုၵ်းယိုတ်းဢႃႇၼႃႇဝၢၼ်ႈမိူင်း။ သိုၵ်းမၢၼ်ႈသမ်ႉတိုၵ်ႉပွႆႇတူဝ်ၵူၼ်းတူၵ်းၶွၵ်ႈၼမ်လၢႆ။ ၼႂ်းမိူင်းမၢၼ်ႈပွတ်းတႂ်ႈၸိူဝ်းၼႆႉၵေႃႈ မီးၶၢဝ်ႇဢွၵ်ႇမႃးဝႃႈ မီးၸုမ်းၵူၼ်းႁၢႆႉ ဝိုတ်ႉၵၢၼ်ႈၶႄႈၽဝ်ႁိူၼ်းၵူၼ်းဝၢၼ်ႈ၊ မီးၸုမ်းၵူၼ်းလၵ်ႉ ယႃႉတဝ်ႁိူၼ်းယေးၵူၼ်းမိူင်း ၼႆၶိူဝ်းယႂ်း။