မိူင်းတႆးပွတ်းႁွင်ႇ တီႈဝဵင်းမူႇၸေႊ ၼၼ်ႉ ၼၢင်းယိင်း သႅၼ်း ဢႃယု 40 ပၢႆ ၵူၼ်းႁပ်ႉလႅၵ်ႈငိုၼ်း ၵေႃႉၼိုင်ႈၼၼ်ႉ ၺႃးၵူၼ်းႁၢႆႉ ၽၼ်းတႅင်းသေ ၸူၼ်ဢဝ် ငိုၼ်းၵႂႃႇ ။
မိူဝ်ႈၼႆႉ ဝၼ်းတီႈ 25/8/2021 ယၢမ်းၵၢင်ၼႂ် မွၵ်ႈ 10 မူင်း ၼၢင်းယိင်း ၵေႃႉၼိုင်ႈ ဢႃယု မွၵ်ႈ 40 ပၢႆ ၺႃးၵူၼ်းၸူၼ် ၽၼ်း မိုဝ်းၾၢႆႇၶႂႃ၊ ႁိမ်းႁူင်းႁႅမ်း သူၺ်ႇၼၵႃး ဝၢၼ်ႈၵွင်းမူးလွႆ ပွၵ်ႉၵွင်းမူးတူင်ႈ ၸႄႈဝဵင်းမူႇၸေႊ ၼၼ်ႉ ၺႃးၸူၼ်ဢဝ်ငိုၼ်းၵႂႃႇ၊ မၼ်းၼၢင်းၵေႃႈ မၢတ်ႇၸဵပ်း ႁၢဝ်ႈႁႅင်း။
ၵူၼ်းမူႇၸေႊ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ၺႃးၸူၼ်ဢဝ်ငိုၼ်းၵႂႃႇၵႃႈႁိုဝ် ပႆႇလႆႈႁူႉႁူဝ် ယွႆႈမၼ်း ၶႃႈ ။ ယၢမ်းလဵဝ် တူဝ်မၼ်းၼၢင်းတႄႉ လႆႈသူင်ႇယူတ်းယႃဝႆႉတီႈႁူင်းယႃမူႇၸေႊ လႆႈယဵပ်ႉ 8 ႁွႆး၊ လိူတ်ႇဢွၵ်ႇႁႅင်းလႆႈထႅမ် လိူတ်ႈ 3 တဝ်ႈ ၶႃႈဢေႃႈ”- ဝႃႈၼႆ။
ၼၢင်းယိင်း ၵေႃႉထုၵ်ႇၽၼ်းၼၼ်ႉ ပဵၼ်ၵူၼ်းဝၢၼ်ႈၵွင်းမူးလွႆ ၊ တီႈၺႃးၸူၼ်ၼၼ်ႉ ပဵၼ်တီႈႁိမ်းႁိူၼ်းမၼ်းၼၢင်း၊ ဢၼ်မီးႁိမ်းႁူင်းႁႅမ်း သူၺ်ႇၼၵႃး။
“တၢင်းပဵၼ်ၵေႃႈၽႄႈ၊ ဝၢၼ်ႈမိူင်းၵေႃႈသုၵ်ႉ၊ သမ်ႉတိုၵ်ႉပိုတ်ႇႁပ်ႉလႅၵ်ႈငိုၼ်းယူႇ။ ၵွပ်ႈဝႆႉမဝ်မၢင်ၵေႃႈပဵၼ် လႆႈ ႁူႉယူႇဝႃႈ ၼႂ်းဝဵင်းမူႇၸေႊၼႆႉ ဢမ်ႇမီးလွင်ႈႁူမ်ႇလူမ်ႈၼႆ။ တီႈတႄႉလီၾၢင်ႉ ဢမ်ႇပေႃးလူဝ်ႇဢွၵ်ႇ ႁိူၼ်း ၵႃႈႁိုဝ်ယဝ်ႉ”- ၽူႈ တူင်ႉၼိုင်ၼႂ်းတူင်ႇဝူင်းၵူၼ်း မူႇၸေႊ ၵေႃႉၼိုင်ႈလၢတ်ႈၼႄ ၽူႈတွႆႇႁွၵ်ႈၼင်ႇၼႆ။
ဝၢႆးသေ ၶွင်ႇသီႇသိုၵ်းမၢၼ်ႈ ယိုတ်းမိူင်းမႃးၼႆႉ ၼႂ်းၸႄႈဝဵင်းမူႇၸေႊ ဢမ်ႇမီးလွင်ႈ ၼိမ်သဝ်း ဢမ်ႇမီးလွင်ႈႁူမ်ႇလူမ်ႈသင် တၢင်းပဵၼ်ၶူဝ်ႊဝိတ်ႉၵေႃႈၽႄႈလၢမ်းႁၢဝ်ႈႁႅင်း မၢင်ပွၵ်ႉမၢင်ဢိူင်ႇ ထုၵ်ႇပိၵ်ႉဢိုတ်းဝႆႉၵေႃႈမီးတင်းၼမ်။ ၵူၼ်းတေႃႇတူဝ် ႁႃၵိၼ်လဵင်ႉတွင်ႉၵေႃႈ ထူပ်းတၢင်းယၢပ်ႇၽိုတ်ႇ ၽူႈလၵ်ႉၵူၼ်းၸူၼ်ၵေႃႈလိူင်ႇၼမ်မႃး။
မိူဝ်ႈဝၼ်းတီႈ 26/2/2020 ၼၼ်ႉ ၼၢင်းဢေမီး ၵူၼ်းလႅၵ်ႈငိုၼ်းၶႄႇ-မၢၼ်ႈ ဢွင်ႈတီႈလႅၵ်ႈ ပွၵ်ႉၵၢတ်ႇ ၸႄႈဝဵင်းမူႇၸေႊ ၸိုင်ႈတႆးပွတ်းႁွင်ႇၼၼ်ႉ ၺႃးၽူႈၸၢႆး 4 ၵေႃႉ ဢဝ်မိတ်ႈငႃသေ ၸူၼ်ဢဝ် ငိုၼ်းၵႂႃႇ 100 သႅၼ်ပၢႆ ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ