သိုၵ်း RCSS တင်း TNLA ပိုတ်းယိုဝ်းတိုၵ်းတေႃးၵၼ်ႁၢဝ်ႈႁႅင်း ၼႂ်းၸႄႈဝဵင်းၼမ်ႉတူႈ ၵူၼ်းမိူင်း ဢမ်ႇယွမ်း 200 ၵေႃႉ လႆႈဢွၼ်ၵၼ်ပၢႆႈယၢၼ်ႁိူၼ်းယေး ၵႂႃႇသွၼ်ႈဝႆႉၸွမ်းဝတ်ႉဝႃးၽႃသိူဝ်ႇ ဝႃႈၼႆ။
ဝၼ်းတီႈ 14/2/2021 ၵူၼ်းမိူင်းပိုၼ်ႉတီႈ တၢင်းဢိူင်ႇပၢင်ၶႅမ်လႄႈ ဢိူင်ႇလွႆတေး ႁူဝ်ၵူၼ်း ဢမ်ႇယွမ်း 200 ၵေႃႉ ဢွၼ် ၵၼ်ပႆႈယၢၼ်ႁိူၼ်းယေးၵႂႃႇသွၼ်ႈဝႆႉ ဝတ်ႉပူပ်ႉပႃႇရူင်ႇ ႁူဝ်ၵူၼ်း 50 ပၢႆလႄႈ တီႈၵျွင်းႁွင်ႇ မၢၼ်ႈၸၢမ် 150 ပၢႆ ၼႂ်းၸႄႈ ဝဵင်းၼမ်ႉတူႈ ၸိုင်ႈတႆးပွတ်းႁွင်ႇ ၼႆယဝ်ႉ။
လုင်းပႃႉၺၢၼ်ႇ ၵႅမ်ႁူဝ်ပဝ်ႈ ၶွမ်ႊမတီႊၸွႆႈထႅမ် ၵူၼ်းပၢႆႈၽေးသိုၵ်း တီႈၼမ်ႉတူႈ လၢတ်ႈဝႃႈ – “ယၢမ်းလဵဝ် ၵူၼ်းပၢႆႈၽေး မႃးသွၼ်ႈဝႆႉတီႈ ဝတ်ႉပူပ်ႉပႃႇရူင်ႇၼႆႉ တေမီး 55 ၵေႃႉ၊ တီႈၵျွင်းႁွင်ႇ မၢၼ်ႈၸၢမ်သမ်ႉ မီး 155 ၵေႃႉ။ လွင်ႈၶဝ်ႈၼမ်ႉတၢင်း ၵိၼ်တႄႉ ဢမ်ႇလႆႈမႆႈၸႂ်ၶႃႈ” – ဝႃႈၼႆ။
ၵူၼ်းပၢႆႈၽေးသိုၵ်း ဢၼ်ပႆႈမႃးသွၼ်ႈဝႆႉ တီႈဝတ်ႉပူပ်ႉပႃႇရူင်ႇၼႆႉ ပဵၼ်ၵူၼ်းဝၢၼ်ႈဝႃႈ၊ တီႈၵျွင်းႁွင်ႇမၢၼ်ႈၸၢမ်သမ်ႉ ပဵၼ် ၵူၼ်းၼႂ်းဝၢၼ်ႈပဵင်းလူင်၊ ၵုၼ်ၵျွင်းလႄႈ ၼႃးၵေး ၊ၼႃးၵႅင်း ၼႂ်းဢိူင်ႇပၢင်ၶႅမ် ၸိူဝ်းၼႆႉ။
“ပၢင်တိုၵ်းၼႆႉ တႄႇပဵၼ်မိူဝ်ႈဝႃး ယၢမ်းၵၢင်ၼႂ်ၸဝ်ႉၶႃႈ။ လႆႈႁူႉဝႃႈ သိုၵ်းလွႆ ၵၢၼ်းယိုဝ်း ၶူဝ်းလၢႆးလႄႈ ပၢင်တိုၵ်း ၸင်ႇတႅၵ်ႇ မႃးႁႅင်းၶႃဢေႃႈ”- ၵူၼ်းပိုၼ်ႉတီႈ ပွတ်းမၢၼ်ႈ ၸၢမ် လၢတ်ႈၼႄၼင်ႇၼႆ။
ယၢမ်းလဵဝ် သိုၵ်းတင်းသွင်ၾၢႆႇ ပႆႇထွႆထွၼ် တိုၵ်ႉၶဵင်ႈၶႅင်ၵၼ်ဝႆႉယူႇႁၢဝ်ႈႁႅင်း ၵူၼ်းမိူင်းပိုၼ်ႉတီႈ မႆႈၸႂ် ၵူဝ်ပဵၼ်ပၢင်တိုၵ်း ႁၢဝ်ႈႁႅင်းထႅင်ႈ ဝႃႈၼႆ။
သိုၵ်း TNLA တင်း RCSS ၼႆႉ ပဵၼ်ၸုမ်းပိုၼ်ၽၢဝ်ႇၵိုတ်းတိုၵ်းဝႆႉၼင်ႇၵၼ် ၾၢႆႇၼိုင်ႈပဵၼ်ၸုမ်းယိပ်းၵွင်ႈၵၢင်ႇ ၸၢဝ်းၶိူဝ်း ၼႂ်းမိူင်းတႆး ၼင်ႇၵၼ်ထႅင်ႈ ။