သိုၵ်း TNLA တင်း RCSS ပဵၼ်ပၢင်တိုၵ်းၵၼ် ႁၢဝ်ႈႁႅင်း တင်းပွတ်းၸႄႈဝဵင်းၼမ်ႉတူႈ ၵူၼ်းမိူင်း ၵေႃႉၼိုင်ႈ ၺႃး ၸၢၵ်ႇမၢၵ်ႇၸွမ်း လႆႈသူင်ႇယူတ်းယႃတူဝ်တီႈလႃႈသဵဝ်ႈ။
ဝၼ်းတီႈ 14/2/2021 ယၢမ်းၵၢင်ၼႂ် 6 မူင်း ၸၢႆးၼၼ်ႇတေႃး ဢႃယု 33 ပီ ၵူၼ်းဝၢၼ်ႈပဵင်းလူင် ဢိူင်ႇဝၢၼ်ႈၸၢမ် ၸႄႈဝဵင်း ၼမ်ႉတူႈ ၸႄႈတွၼ်ႈၵျွၵ်ႉမႄး ၸိုင်ႈတႆး ပွတ်းႁွင်ႇ ၺႃးၸၢၵ်ႇမၢၵ်ႇၸွမ်း ၼႂ်းပၢင်တိုၵ်း TNLA တင်း RCSS ပိုတ်းယိုဝ်ၵၼ်။
ၵူၼ်းၼမ်ႉတူႈ လၢတ်ႈဝႃႈ – “ ၵူၼ်းမိူင်းၵေႃႉၼိုင်ႈ မၢတ်ႇၸဵပ်းၸၢၵ်ႇမၢၵ်ႇၶႃႈဢေႃႈ။ ဢၼ်တၢႆတႄႉဢမ်ႇမီးၶႃႈ။ ၵူၼ်းမၢတ်ႇၸဵပ်းၼၼ်ႉ ၸိုဝ်ႈႁွင်ႉ ၸၢႆးၼၼ်ႇတေႃး ဢႃယု 33 ပီၶႃႈ။ ယၢမ်းလဵဝ် လႆႈသူင်ႇယူတ်းယႃတူဝ်ဝႆႉ တီႈႁူင်းယႃ လူင် လႃႈသဵဝ်ႈၶႃႈဢေႃႈ”- ဝႃႈၼႆ။
ၸၢႆးၼၼ်ႇတေႃးၼႆႉ တိူဝ်ႉၺႃးမၢၵ်ႇၵွင်ႈတီႈၵုမ်ႇၵူၼ်ႈလႄႈ မၢတ်ႇၸဵပ်း ဢမ်ႇၸၢင်ႈပႆ လႆႈႁၢမ်သူင်ႇႁူင်းယႃလႃႈသဵဝ်ႈလႆႈႁူႉၼင်ႇၼႆ။
ၵူၼ်းၼမ်ႉတူႈလၢတ်ႈတီႈၽူႈတွႆႇႁွၵ်ႈဝႃႈ ပၢင်တိုၵ်းၼႂ်းၵႄႈသိုၵ်း RCSS လႄႈ TNLA ၼႆႉ တႄႉပဵၼ်မႃးၸဵမ်မိူဝ်ႈဝၼ်းသဝ်။ RCSS တူင်ႉၼိုင်တၢင်းဝၢၼ်ႈၼႃးၵႅင်း TNLA သမ်ႉတူင်ႉၼိုင်ၼႂ်းဝၢၼ်ႈပဵင်းလူင်။ သွင်ၾၢႆႇယိုဝ်းထွင်ႉထႅင်ႉ ယိုဝ်းယိုဝ်းၵိုတ်းၵိုတ်းတေႃႇထိုင်မိူဝ်ႈဝႃးယၢမ်းဝၢႆးဝၼ်း ။ သွင်ၾၢႆႇသွင်ၸုမ်းမီးလွင်ႈၵဵပ်းၶဝ်ႈၼမ်ႉတၢင်းၵိၼ်ပွတ်းဝၢၼ်ႈၼႃးတူင်ႈ။ တေႃႇထိုင်ၼႂ်ၼႆႉ ၵူၼ်းဝၢၼ်ႈပၢႆႈၽေးသိုၵ်း မီးႁိမ်း 200 ၵေႃႉ – ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ