မိူဝ်ႈၼႆႉ ဝၼ်းတီႈ 15/2/2021 ယၢမ်းၵၢင်ၼႂ် 5 မူင်း   RCSS တင်း   SSPP သွင်ၾၢႆႇပဵၼ်ပၢင်တိုၵ်းၵၼ် ႁၢဝ်ႈႁႅင်း ႁိမ်းဝၢၼ်ႈၵဵတ်းၽူၼ် ဢိူင်ႇၼႃးမၢၵ်ႇၶေႃ ၸႄႈဝဵင်းသီႇပေႃႉ ၸႄႈတွၼ်ႈၵျွၵ်ႉမႄး ၸိုင်ႈတႆးပွတ်းႁွင်ႇ တေႃႇထိုင်ယၢမ်းလဵဝ် သဵင်ၵွင်ႈတိုၵ်ႉတႅၵ်ႇယူႇ ပႆႇယဵၼ် ။

ၸဝ်ႈၼႃႈတီႈ ၼႂ်းၼႃႈလိၼ်သိုၵ်း  SSPP လၢတ်ႈဝႃႈ – “မိူဝ်ႈၼႆႉ ၵၢင်ၼႂ်ၸဵမ်ၸဝ်ႉ 5 မူင်း ပၢႆၼႆႉ SSPP တင်း RCSS ပဵၼ်ပၢင် တိုၵ်းၵၼ် တေႃႇထိုင်ယၢမ်းလဵဝ် သဵင်ၵွင်ႈ ပႆႇ ယဵၼ်။ ယွၼ်ႉသိုၵ်းတၢင်း RCSS ၽႃႇၺႃးသိုၵ်းႁဝ်းၶႃႈလႄႈ လႆႈပဵၼ် ပၢင်တိုၵ်း ၵၼ်ၶႃႈဢေႃႈ။ သၢႆၼၼ်ႉသမ်ႉ ပဵၼ်သိုၵ်းႁဝ်းၶႃႈ SSPP တူင်ႉၼိုင်ဝႆႉ  ၶႃႈဢေႃႈ”- ဝႃႈၼႆ။

ယၢမ်းလဵဝ်သမ်ႉ ပဵၼ်ၽွင်းၵူၼ်းမိူင်းပတ်းပိုၼ်ႉ (မိူင်းမၢၼ်ႈ မိူင်းတႆး) ဢွၼ်ၵၼ်လုၵ်ႉႁိုၼ်ႇသၢၼ်ၶတ်းသိုၵ်းမၢၼ်ႈယိုတ်းဢႃႇၼႃႇၸိုင်ႈမိူင်း လႆႈမႃး 15 ဝၼ်း ဝၼ်းမိူဝ်ႈၼႆႉ။ ၶၢဝ်းယၢမ်းၵၢင်ၶမ်ႈၵၢင်ၶိုၼ်း ၵူၼ်းမိူင်း လႆႈၾၢင်ႉၽေးပလိၵ်ႈမၢၼ်ႈလႄႈသိုၵ်းမၢၼ်ႈၶဝ်ႈဝၢၼ်ႈလမ်းလိုပ်ႈတီႉၺွပ်း ထိုင်တီႈၵူၼ်းၼုမ်ႇၵမ်ႈၽွင်ႈ ဢမ်ႇလႆႈယူႇႁိူၼ်းယေး၊ လႆႈငိူင်ႉဝႄႈၽေးသိုၵ်းမၢၼ်ႈလႄႈ ပလိၵ်ႈမၢၼ်ႈဝႆႉ။

ၵူၼ်းၼုမ်ႇၵႃလိ ၵုၼ်ႁဵင် ၶူဝ်လမ် ၼမ်ႉၸၢင် မိူင်းၼၢႆး မိူင်းပၼ်ႇ လႃႈသဵဝ်ႈ မူႇၸေႊ ၵမ်ႈၽွင်ႈၺႃးသိုၵ်းမၢၼ်ႈတီႉၺွပ်းဢဝ်ၵႂႃႇၶင်ဝႆႉတီႈလႂ်  ၽႂ်ယင်းဢမ်ႇႁူႉတီႈ။

ဝၼ်းမိူဝ်ႈၼႆႉ သိုၵ်းမၢၼ်ႈပလိၵ်ႈမၢၼ်ႈဢဝ်ႁႅင်းသိုၵ်းၶဝ်ႈဝဵင်းယႂ်ႇဝဵင်းလူင်လၢႆလၢႆတီႈ ပႂ်ႉတီႉၺွပ်း ၶႃႈႁၢပ်ႇၵၢၼ်ၶုၼ် ၸိူဝ်းဢမ်ႇလူင်းႁဵတ်းၵၢၼ်သေ ၶဝ်ႈႁူမ်ႈၼႄၵၢင်ၸႂ် ၊ ၶဝ်ႈႁူမ်ႈ CDM  သၢၼ်ၶတ်းသိုၵ်းယိုတ်းဢႃႇၼႃႇယူႇၸိူဝ်းၼၼ်ႉ။

ၸဝ်ႈႁၢၼ် ၶမ်းၸၢမ်ႇ ၽူႈၶၢၼ်ပၢၵ်ႇ RCSS လၢတ်ႈဝႃႈ – “ၸႂ်ႈဢေႃႈ သိုၵ်း RCSS တင်း SSPP လႆႈပဵၼ်ပၢင်တိုၵ်းၵၼ် တီႈဝၢၼ်ႈၵဵတ်းၽူၼ် ယၢမ်းၵၢင်ၼႂ် 5 မူင်းၼႆႉ ထိုင်မိူဝ်ႈလဵဝ် သဵင်ၵွင်ႈပႆႇယဵၼ်”- ဝႃႈၼႆ။

တေႃႇထိုင်ယၢမ်းလဵဝ် သဵင်သိုၵ်းတင်းသွင်ၾၢႆႇ RCSS တင်း SSPP တိုၵ်ႉယိုဝ်းၵၼ် ႁၢဝ်ႈႁႅင်း တင်းၾၢႆႇလႂ်ၵေႃႈ ပႆႇထွႆ  ။ လွင်ႈၵူၼ်းပၢႆႈၽေးသိုၵ်းၵေႃႈ ပႆႇငိၼ်းၶၢဝ်ႇဝႃႈမီး ။

RCSS တင်း SSPP ၼႆႉ ပဵၼ်ၸုမ်းယိပ်းၵွင်ႈၵၢင်ႇ ၸၢဝ်းၶိူဝ်းၼႂ်းမိူင်းတႆး ၼင်ႇၵၼ် ။ တင်းသွင်ၸုမ်းၼႆႉ ပဵၼ်ၸုမ်းလူင်းလၢႆးမိုဝ်းၵိုတ်းတိုၵ်းဝႆႉတင်းသိုၵ်းမၢၼ်ႈ ၸဵမ်ပၢၼ်လူင်ပွင်ၸိုင်ႈတဵင်းၸဵင်ႇ။ ၵူၺ်းၵႃႈ တင်းသွင်ၾၢႆႇၼႆႉ ၵႆႉၵႆႉပိုတ်းယိုဝ်းၵၼ်တေႃႇထိုင်ဝၼ်းမိူဝ်ႈၼႆႉ။