Friday, March 29, 2024

TNLA ပိုၼ်ၽၢဝ်ႇ တူဝ်ႈတၼ်းတႃႇသေႇ တႃႇဢုပ်ႇဢူဝ်း RCSS တင်း သိုၵ်းလူင်ပွင်ၸိုင်ႈမၢၼ်ႈ

Must read

TNLA ႁၢင်ႈႁႅၼ်းတူဝ်ႈတၼ်းတႃႇတေဢုပ်ႇဢူဝ်းၵၼ်တင်း RCSS လႄႈ တပ်ႉသိုၵ်းလူင်ပွင်ၸိုင်ႈ မၢၼ်ႈ ၼင်ႇႁိုဝ် ပေႃးတေႁႃလႆႈၵႂၢမ်းတွပ်ႇ  တႃႇၵိုတ်းတိုၵ်းၵၼ်လႄႈ လွင်ႈငမ်းယဵၼ်  ဝႃႈၼႆ။

လိၵ်ႈပိုၼ်ၽၢဝ်ႇ TNLA

ဝၼ်းတီႈ 18/1/2021 TNLA ဢွၵ်ႇၶေႃႈ ပိုၼ်ၽၢဝ်ႇဝႃႈ ၸွမ်းၼင်ႇ ၵၢင်ၸႂ်ၵူၼ်းမိူင်းမုင်ႈမွင်း ၶႂ်ႈႁႂ်ႈၵိုတ်းတိုၵ်းလႄႈ ငမ်းယဵၼ်ၼၼ်ႉ ယူႇတီႈငဝ်ႈငုၼ်း TNLA ႁၢင်ႈႁႅၼ်း တူဝ်တၼ်းဝႆႉတႃႇသေႇ  တႃႇဢုပ်ႇဢူဝ်းၵၼ်တင်း RCSS လႄႈ တပ်ႉသိုၵ်းလူင်ပွင်ၸိုင်ႈမၢၼ်ႈ  တႃႇၵိုတ်းတိုၵ်းၵၼ်ဝႃႈၼႆ ။

- Subscription -

ၸဝ်ႈသိုၵ်း ဢုမ်ႈၶိူဝ် ၽူႈၶၢၼ်ပၢၵ်ႇ RCSS လၢတ်ႈဝႃႈ – “တၢင်းႁဝ်းၶႃႈတႄႉ ၽၵ်းတူ တႃႇဢုပ်ႇဢူဝ်းၶဝ်ၼၼ်ႉ မုၵ်ႉၸုမ်း ႁဝ်းၶႃႈ ပိုတ်ႇဝႆႉပၼ်ယူႇတႃႇသေ ဢမ်ႇပိၵ်ႉၽၵ်းတူဝႆႉၶႃႈ။ သွၼ်ႇႁႂ်ႈၶဝ်ၶႂ်ႈဢုပ်ႇတႄႉတႄႉၵူၺ်း။ မိူဝ်ႈလႂ်သေဢမ်ႇဝႃႈ မုၵ်ႉ ၸုမ်းႁဝ်းၶႃႈတႄႉ ၸူမ်းတွၼ်ႈသေ ပိုတ်ႇၽၵ်းတူႁပ်ႉဢုပ်ႇတႃႇသေႇယဝ်ႉ”- ဝႃႈၼႆ။

ဢိင်ၼိူဝ်လွင်ႈၶေႃႈပိုၼ်ၽၢဝ်ႇ TNLA ၼႆႉသေ ယူႇတီႈၸုမ်းၶၢဝ်ႇၽူႈတွႆႇႁွၵ်ႈ ၶတ်းၸႂ် ၵပ်းသိုပ်ႇတွင်ႈထၢမ်တၢင်းၾၢႆႇ TNLA လၢႆၵမ်းၵေႃႈ တိတ်းတေႃႇဢမ်ႇလႆႈ။

ပၢင်ၵုမ် ႁူဝ်ႁုပ်ႈပီ ငဝ်ႈငုၼ်း TNLA ၸတ်းႁဵတ်း ၼႂ်းဝၼ်းတီႈ 5-6/1/2021 ပူၼ်ႉမႃး သေ ဢုပ်ႇဢူဝ်းတူၵ်းလူင်း လႆႈၸႂ်ၵၼ် ဢွၵ်ႇၶေႃႈပိုၼ်ၽၢဝ်ႇ  ၽိုၼ်ၼႆႉၼႂ်းဝၼ်းတီႈ 18 မိူဝ်ႈဝႃးၼႆႉ။

TNLA တင်း RCSS ၼႆႉ တႄႇဢဝ် ပီ 2015-2016  မႃး သွင်ၾၢႆႇ ပဵၼ်ပၢင်တိုၵ်းၵၼ် ႁၢဝ်ႈႁႅင်း ၼႂ်းၸိုင်ႈတႆး ပွတ်းႁွင်ႇ တေႃႇထိုင်ယၢမ်းလဵဝ် သွင်ၾၢႆႇ တိုၵ်ႉၶဵင်ႈၶႅင်ၵၢၼ်သိုၵ်းတေႃႇၵၼ်ဝႆႉယူႇ တၢင်းပွတ်းၵျွၵ်ႉမႄး – ၼမ်ႉတူႈ ၸိူဝ်း ၼႆႉ။

မိူဝ်ႈႁၢင်လိူၼ်ၻီႊသႅမ်ႊၿိူဝ်ႊ 2020 ပူၼ်းမႃးၼၼ်ႉၵေႃႈ TNLA တင်း RCSS ပိုတ်ႇပၢင်တိုၵ်း တေႃႇၵၼ်မႃးႁၢဝ်ႈႁႅင်း ၼႂ်း ၸႄႈဝဵင်းၵျွၵ်ႉမႄး လိူဝ်ၼၼ်ႉ ၼႂ်းၸႄႈဝဵင်းၼမ်ႉတူႈ ၸိူဝ်းၼႆႉသေ ႁဵတ်းႁႂ်ႈ ၵူၼ်းမိူင်းၼပ်ႉႁူဝ်ႁဵင် လႆႈပၢႆႈယၢၼ်ႁိူၼ်း ယေးၵၼ်၊ မၢၵ်ႇလူင်တူၵ်းသႂ်ႇႁိူၼ်းၵူၼ်းဝၢၼ်ႈပၢင်မၢၵ်ႇမိုဝ်း 55 လင် လႆႈလူႉၵွႆၸွမ်းၵမ်ႈၽွင်ႈလႄႈ ၵူၼ်းမိူင်းလႆႈတိူဝ်ႉ ၸၢၵ်ႇမၢၵ်ႇၸွမ်းၵမ်ႈၽွင်ႈ။ တေႃႇထိုင်ယၢမ်းလဵဝ် ၵူၼ်းပၢႆႈၽေးသိုၵ်းႁဵင်ပၢႆ ဢၼ်ပၢႆႈမႃးသွၼ်ႈဝႆႉတီႈၼႂ်းဝဵင်းၵျွၵ်ႉမႄးၼႆႉ ပႆႇႁတ်းပွၵ်ႈႁိူၼ်းယေးၵၼ် ယွၼ်ႉသိုၵ်းတင်းသွင်ၾၢႆႇ တိုၵ်ႉၶဵင်ႈၶႅင်ၵၢၼ်သိုၵ်းတေႃႇၵၼ်ဝႆႉယူႇ ဝႃႈၼႆ။

ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ

- Subscription -
- SHAN's Apps -spot_img

ၶၢဝ်ႇလိုၼ်းသုတ်း