ဝဵင်းမိူင်းပွၵ်ႉ ဢၼ်မီးၼႂ်းၼႃႈလိၼ်ၽွင်းငမ်းတူဝ်ၵဝ်ႇဝႃႉ UWSA မၢႆ 2 (ဢၼ်ပိူင်ငဝ်ႈပိုင်းမိူင်း 2008 တႅမ်ႈဝႆႉ) ၼၼ်ႉ ၵူတ်ႇထတ်းထူပ်းႁၼ် ၵူၼ်းတိတ်းၸပ်းၸိူဝ်ႉမႅင်းၶူဝ်ႊဝိတ်ႉ 19 မႂ်ႇထႅင်ႈ 100 ပၢႆ လႄႈ ယၢမ်းလဵဝ်ၵူၼ်းၸပ်းၶူဝ်ႊဝိတ်ႉ-19 ၼႂ်းၼႃႈလိၼ်ဝႃႉ မီး 300 ပၢႆယဝ်ႉ။
ဝၼ်းတီႈ 17/1/2021 ၾၢႆႇပၢႆးယူႇလီ ၼႂ်းၼႃႈလိၼ်ၽွင်းငမ်းတူဝ်ၵဝ်ႇဝႃႉ UWSA ပိုၼ်ၽၢဝ်ႇဝႃႈ ၼႂ်းၸႄႈတွၼ်ႈမိူင်းပွၵ်ႉ ၵူတ်ႇထတ်းထူပ်းႁၼ် ၵူၼ်း တိတ်းၸပ်းၸိူဝ်ႉမႅင်းၶူဝ်ႊဝိတ်ႉ 19 မႂ်ႇထႅင်ႈ တင်းမူတ်း 164 ၵေႃႉ ။ ပေႃးႁူမ်ႈၵၼ်တင်း ၵူၼ်းပဵၼ် မီးဝႆႉၵဝ်ႇၵဝ်ႇ 153 ၵေႃႉ ၊ ယၢမ်းလဵဝ်တင်းမူတ်း ၵူၼ်းပဵၼ်ၶူဝ်ႊဝိတ်ႉၼႂ်းၼႃႈလိၼ်ဝႃႉမီးထိုင် 302 ၵေႃႉ။ တီႈပၢင်သၢင်းတႄႉမီး 35 ၵေႃႉမိူၼ်ၵဝ်ႇၵူၺ်း။ဢမ်ႇမီးၵူၼ်းပဵၼ်ၼမ်မႃး ။ တီႈမိူင်းပွၵ်ႉၵူၼ်းပဵၼ်ၶူဝ်ႊဝိတ်ႉၼမ်မႃးထႅင်ႈ 135 ၵေႃႉတင်းမူတ်းမီး 238၊ တီႈႁူဝ်တဝ်း ၼမ်မႃးထႅင်ႈ 1 ၵေႃႉ ႁူမ်ႈပဵၼ် 8 ၵေႃႉလႄႈ မိူင်းၽႅၼ် ၼမ်မႃးထႅင်ႈ 13 ၵေႃႉႁူမ်ႈ ပဵၼ် 21 ၵေႃႉ။
ၵွပ်ႈၼႆလႄႈယၢမ်းလဵဝ် ၼႂ်းၼႃႈလိၼ်ၽွင်းငမ်းတူဝ်ၵဝ်ႇဝႃႉၼႆႉ ၵူတ်ႇထတ်းထူပ်းႁၼ် ၵူၼ်းတိတ်းၸပ်းၸိူဝ်ႉ မႅင်းၶူဝ်ႊဝိတ်ႉ 19 တင်းမူတ်းမီး 302 ၵေႃႉယဝ်ႉ။ ယႃၶႅၼ်း 47 ၵေႃႉ။ 255 ၵေႃႉတႄႉ တိုၵ်ႉသိုပ်ႇယူတ်းယႃ ဝႆႉတီႈႁူင်းယႃယူႇ ဝႃႈၼႆ။
တီႈဝဵင်းပၢင်သၢင်း တီႈငဝ်ႈဝဵင်း UWSA တူင်ႉၼိုင်ၵုမ်းၵမ် ၼၼ်ႉၵေႃႈ ၸီႉသင်ႇ Lockdown ပိၵ်ႉဢိုတ်းဝဵင်း တႄႇဢဝ် ဝၼ်းတီႈ 6/1/2021 ယၢမ်းၵၢင်ၶိုၼ်း 12 မူင်း တေႃႇထိုင် 31/1/2021 ၼႆႉသဵင်ႈ ဝႆႉ။
တွၼ်ႈတႃႇ တေၵႅတ်ႇၶႄႁႄႉၵင်ႈလႆႈတၢင်းပဵၼ်ၶူဝ်ႊဝိတ်ႉ 19 ၼင်ႇႁိုဝ် ပေႃးတေ ဢမ်ႇၽႄႈလၢမ်းႁၢဝ်ႈႁႅင်းၼၼ်ႉ ယူႇတီႈ ၸုမ်းၶႂၢႆႇၶႂႃပေလႅင် မိူင်းၶႄႇ မႃးႁူမ်ႈၸွႆႈ ၾၢႆႇပၢႆးယူႇလီ ဝႃႉ ဝႆႉ။
ယွၼ်ႉဝႃႈ ထႅင်ႈၾၢႆႇၼိုင်ႈၵေႃႈ ၼႂ်းၼႃႈလိၼ်ၽွင်းငမ်းတူဝ်ၵဝ်ႇဝႃႉ UWSA ၵုမ်းၵမ်ၼႆႉ မီးၵူၼ်းတိတ်းၸပ်းၸိူဝ်ႉမႅင်း တိူဝ်းၶိုၼ်ႈၼမ်မႃးလႄႈ လႅၼ်လိၼ်ဝႃႉတင်းမိူင်းလႃးၼၼ်ႉ ယူႇတီႈတၢင်းၾၢႆႇမိူင်းလႃႈ မၢႆ 4 လႆႈၵႅတ်ႇၶႄႁႄႉၵင်ႈ ဢမ်ႇပၼ်ၵူၼ်းၶဝ်ႈဢွၵ်ႇၵႂႃႇမႃး ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ