ၶၢဝ်းတၢင်း 5-6ဝၼ်းမႃးၼႆႉ တေႃႇထိုင်ယၢမ်းလဵဝ် သိုၵ်းဝႃႉ UWSA (ပွတ်းၸၢၼ်း) တႂ်ႈၼႃႈလိၼ်သိုၵ်း 171တပ်ႉႁူၺ်ႈဢေႃႈ မိူင်းတူၼ် တင်း ၸုမ်းသိုၵ်း ပျီႇတူႉၸိတ်ႉလႃးႁူႇ တပ်ႉပႂ်ႉလႅၼ်လိၼ် 1007ၶဵင်ႈၶႅင်ၵၢၼ် သိုၵ်းတေႃႇၵၼ်။

ဝၼ်းတီႈ 14/02/2026ယၢမ်းၵၢင်ၼႂ်ၸဝ်ႉ မွၵ်ႈ 3-4မူင်းၼၼ်ႉ သိုၵ်းဝႃႉ ႁႄႉၵႃး ပျီႇတူႉၸိတ်ႉလႃးႁူႇ ။ ယွၼ်းသွၵ်ႈၵႃး ဝႃႈၼႆလႄႈ ပျီႇတူႉၸိတ်ႉၵေႃႉၼၼ်ႉ ဢမ်ႇႁူႉၸိုဝ်ႈ လၢၵ်ႈၵွင်ႈပွတ်းယိုဝ်းသႂ်ႇသိုၵ်းဝႃႉ ႁူမ်ႈႁႅင်း 3ၵေႃႉ ။ ၶၢဝ်ႇဢမ်ႇယိုၼ်ႈယၼ်တႄႉႉဝႃႈ ၽူႈမီးၸၼ်ႉဢွၼ်ႇ ၾၢႆႇသိုၵ်းဝႃႉ UWSA တၢႆထင်တီႈၵေႃႉ ၼိုင်ႈ ၵႂႃႇတၢႆၼႂ်းတပ်ႉ ႁူၺ်ႈဢေႃႈၵေႃႉၼိုင်ႈဝႃႈၼႆ။

ၵူၼ်းပုင်ႇပႃႇၶႅမ်ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ –  “ တူဝ်တၢႆသိုၵ်းဝႃႉၼၼ်ႉတႄႉ မီးတီႈၼႃႈၵျွင်းလူင် ၼႃးၵွင်းမူး ၼၼ်ႉဢေႃႈ။ ၶဝ်လွင်းသေ ထဵင်မေႃးၵၼ် ထိုင်တီႈယိုဝ်းၵၼ်ၼၼ်ႉၵႂႃႈ။ ဢၼ်တၢႆၼႆႉ ငိၼ်းဝႃႈ ၽူႈမီး ၸၼ်ႉ ၼႂ်းသိုၵ်းဝႃႉ။ ၵမ်ႈၽွင်ႈၵေႃႈ ငိၼ်းဝႃႈ တၢႆ သွင်ၵေႃႉ သၢမ်ၵေႃႉၼႆယူႇ ၵူၺ်းၵႃႈဢၼ်ႁူႉတႅတ်ႈ တေႃးတႄႉ ၽူႈမီးၸၼ်ႉသိုၵ်းဝႃႉတၢႆၵေႃႉၼိုင်ႈလႄႈ သိုၵ်းဝႃႉ ၸင်ႇပႂ်ႉလူင်ၵႂႃႇၵူႈငွၼ်ႈယဝ်ႉ ” – ဝႃႈၼႆ။

ယွၼ်ႉၸုမ်းသိုၵ်းပျီႇတူႉၸိတ်ႉလႃးႁူႇ တင်း သိုၵ်းဝႃႉ တွၵ်ႉတႅၵ်ႉၵၼ်ၼႂ်းပၢင်လွင်း ၼႃးၵွင်းမူးၼၼ်ႉသေ ယၢမ်းလဵဝ် သိုၵ်းဝႃႉ ၼပ်ႉႁူဝ်ပၢၵ်ႇ ထႅမ်ႁႅင်းသိုၵ်း ဝႅတ်ႉတပ်ႉလႃးႁူႇဝႆႉလၢႆတီႈ။

တီႈၶဝ်တင်ႈတပ်ႉၵူတ်ႇထတ်း ၸွမ်းတၢင်းတႄႉ တီႈ ၼမ်ႉႁူးၶုၼ်ႇ ၶွၵ်ႈဝူဝ်း ဝၢၼ်ႈမႂ်ႇလီးသေႃး တၢင်းၽႄတႃႈၵႂၢင်ႈ တၢင်းၶိုၼ်ႈၵႂႃႇလွႆပႃၶီး တၢင်းၶဝ်ႈဢွၵ်ႇ ဝဵင်းပုင်ႇပႃႇၶႅမ် ၸိူဝ်းၼႆႉ။

ၵူၼ်းယူႇၼႃးၵွင်းမူး ဢမ်ႇၶႂ်ႈဢွၵ်ႇၸိုဝ်ႈၵေႃႉၼိုင်ႈ လၢတ်ႈဝႃႈ – “သိုၵ်းဝႃႉၼႆႉ ၶဝ်ဝႅတ်ႉ ဝၢၼ်ႈပႃၶီးလီးသေႃး ဝႆႉတေႃႇထိုင်ဝၼ်းမိူဝ်ႈၼႆႉ။ တပ်ႉလႃးႁူႇ မီးတီႈၼၼ်ႈတီႈ ၼိုင်ႈ တီႈမိူင်းႁၢင်တီႈၼိုင်ႈ ။ ငိၼ်းၶၢဝ်ႇဝႃႈ သိုၵ်းမၢၼ်ႈ ဢမ်ႇပၼ်ဝႃႉ ယိုဝ်းလႃးႁူႇ ဢၼ်ဢဝ်ႁႅင်းသိုၵ်း ဢွၵ်ႇမႃးပိၵ်ႉတၢင်းၵေႃႈ ၼႂ်းၶၢဝ်းတၢင်း 7ဝၼ်းၼႆႉ ႁႂ်ႈထွၼ်ပၼ်ဝႃႇ”  – ဝႃႈၼႆ။

မိူဝ်ႈႁူဝ်လိူၼ်ၼႆႉ သိုၵ်းလႃးႁူႇ ဢွၵ်ႇတၢင်းၵႂႃႇ ၸွမ်းလႅၼ်လိၼ် ဢၼ်မုင်ႈၸူးတၢင်းမိူင်းထႆး ၺႃးသိုၵ်းဝႃႉ ပႂ်ႉၵူတ်ႇထတ်း လႄႈ သွင်ၾၢႆႇလႆႈတွၵ်ႉတႅၵ်ႉၵၼ်မႃး ။ ၶၢဝ်ႇဢမ်ႇယိုၼ်ယၼ်တေႉဝႃႈ ၾၢႆႇသိုၵ်းဝႃႉ မီးလွင်ႈ တိူဝ်ႉမၢတ်ႇလူႉတၢႆလႄႈ လမ်းၵူတ်ႇထတ်း သွၵ်ႈႁႃ ၽူႈပူၼ်ႉပႅၼ် လႄႈ မိူဝ်ႈဝၼ်းတီႈ 14ပူၼ်ႉမႃးၼႆႉ ၸင်ႇဝၢင်းၽႅၼ် ၶိုင်တီႉၼႂ်းပၢင်လွင်းထႅင်ႈၵမ်းၼႆႉ။

ပိုၼ်ႉတီႈ ဢၼ်သိုၵ်းဝႃႉ တင်း ပျီႇတူႉၸိတ်ႉလႃးႁူႇ မီးပၼ်ႁႃၵၼ်ၼႆႉ မိူဝ်ႈလိူၼ် တီႊသႅမ်ပိူဝ်ႊ ပီ 2025ပူၼ်ႉမႃးၼႆႉၵေႃႈ သိုၵ်းဝႃႉ ယိုဝ်းၵူၼ်းမိူင်းပုင်ႇပႃႇၶႅမ် တၢႆၼိုင်ႈၵေႃႉ မၢတ်ႇၸဵပ်း 1ၵေႃႉ။

ယၢမ်းလဵဝ်ၵူၼ်းၵေႃႉဢၼ်ထၢင်ႇထိူမ်ဝႃႈ ယိုဝ်းသိုၵ်းဝႃႉ ၼႂ်းပၢင်တေႃႇလွင်း ၼႃးၵွင်းမူးၼၼ်ႉ ၸိုဝ်ႈဢႃးတီ ။ ၾၢႆႇသိုၵ်းဝႃႉ တီႉဝႆႉ တူဝ်မၼ်းၸၢႆး လႄႈ မေးမၼ်းၸၢႆး ဢဝ်ၵႂႃႇၵုမ်းၶင်ဝႆႉ ၼႂ်းတပ်ႉဝႃႉႁူၺ်ႈဢေႃႈ။ လိူဝ်ၼၼ်ႉ မိူဝ်ႈႁူဝ်လိူၼ်ၼႆႉၵေႃႈ သိုၵ်းဝႃႉ UWSA ၼႄး ၵူၼ်းပုင်ႇပႃႇၶႅမ်ၵေႃႉၼိုင်ႈ ၸူဝ်းၼၢင်းယိင်းဝႃႉ ၵေႃႉၼိုင်ႈၵႂႃႇမိူင်းထႆး ၼႆ တီႉၺွပ်းဝႆႉၵူၼ်းတင်းလူတ်ႉၶိူင်ႈ ယင်း ပႆႇပွႆႇပၼ်ၶိုၼ်း တေႃႇထိုင်ဝၼ်းမိူဝ်ႈၼႆႉ။

တပ်ႉပိဝ်ႇႁႃႇမၢၼ်ႈ မိူင်းတူၼ်တႄႉ ပူင်ၵႂၢမ်းၼၵ်းဝႆႉတီႈ သိုၵ်းဝႃႉ UWSA ႁႂ်ႈထွႆဢွၵ်ႇ ၼႂ်းပိုၼ်ႉတီႈ ဢၼ်ထႅမ်ႁႅင်းသိုၵ်း ပၵ်းပႂ်ႉ တီႈမႂ်ႇၸိူဝ်းၼႆႉ သဵင်ႈသဵင်ႈ ပေႃးဢမ်ႇထွၼ် တေသူင်ႇႁႅင်းၵႂၢတ်ႇလၢင်ႉၵႂႃႇဝႃႈၼႆ။