မိူဝ်ႈဝၼ်းတီႈ 28/10/2025 ၸုမ်းၵဝ်ႉငဝ်ႈသုၼ်ႇလႆႈၵူၼ်းၸိုင်ႈတႆး (SHRF) ဢွၵ်ႇလိၵ်ႈပိုၼ်ၽၢဝ်ႇဝႆႉဝႃႈ ၶွမ်ႊပၼီႊၸိူဝ်းၶုတ်း ႁႄႈလိၼ် လႄႈ ၶမ်း ၸွမ်းၵႄးၼမ်ႉၵူၵ်း ၼႂ်းထုင်ႉမိူင်းယွၼ်း ၸႄႈဝဵင်းမိူင်းသၢတ်ႇ မိူင်းတႆးပွတ်းဢွၵ်ႇၼၼ်ႉ လူင်ပွင်ၸိုင်ႈမိူင်းၶႄႇ ယူႇၾၢႆႇလင်သေၵမ်ႉယၼ်ပၼ်ဝႆႉယူႇ ဝႃႈၼႆ။
ၶွမ်ႊပၼီႊၸိူဝ်းၶုတ်းၶမ်းယူႇၸိူဝ်းၼၼ်ႉ ၸိုဝ်ႈႁွင်ႉဝႃႈ China Investment Mining Company ၼႆသေ တိုၵ်ႉသိုပ်ႇႁဵတ်းၵၢၼ်ၶုတ်းႁႄႈလိၼ်ယူႇ ၼႂ်းမိူင်းတႆးပွတ်းဢွၵ်ႇ ၸွမ်းၼႃႈတီႈသိုၵ်းဝႃႉ (UWSA) ၵုမ်းၵမ်ၼၼ်ႉယူႇ -ဝႃႈၼႆဝႆႉ။
Shanghai Chijin Xiawu Metal Resources Co.Ltd.,ၼႆႉႁူမ်ႈလူင်းတိုၼ်းလၢင်းဝႆႉၸွမ်း ၶွမ်ႊပၼီႊ China Investment Mining Company ၸဵမ်မိူဝ်ႈပီ 2022 ၼၼ်ႉသေ လူင်းတိုၼ်းလၢင်းၼမ်လိူဝ်ပိူၼ်ႈသုတ်းလႄႈ မိူၼ်ၵၼ်တင်း ပဵၼ်ၸဝ်ႈၶွင်ၶွမ်ႊပၼီႊ တႃႇ 90% ယဝ်ႉ ဝႃႈၼႆ။
Shanghai Chijin Xiawu Metal Resources Co.Ltd.ၼႆႉ ပဵၼ်ၸုမ်းႁူမ်ႈသၢင်ႈၵၼ်တင်း Xiamen Tungsten Corporation (ဢၼ်ႁဵတ်းၵၢၼ်ၵဵဝ်ႇၸွမ်း ႁႄႈလိၼ်ၵမ်းသိုဝ်ႈ) လႄႈ Chifeng Gold (ဢၼ်ႁဵတ်းၵၢၼ်သူၺ်းၶမ်းၼမ်လိူဝ်ပိူၼ်ႈသုတ်း) SHRF ႁၢႆးငၢၼ်းဝႆႉၼင်ႇၼႆ။
ၶွမ်ႊပၼီႊၼႆႉ ႁဵတ်းၵၢၼ်ၶုတ်းႁႄႈလိၼ် လႄႈ ၶုတ်းၶမ်း ၼႂ်းမိူင်းတႆးပွတ်းဢွၵ်ႇၵူၺ်းဢမ်ႇၵႃး မိူၼ်ၼင်ႇ ၼႂ်းၸႄႈတွၼ်ႈ ၵဵင်းၶွင် (Xiangkhuang) ၸဵင်ႇႁွင်ႇဝၼ်းဢွၵ်ႇ ဝဵင်းမိူင်းၶမ်း တၢင်းပွတ်းႁွင်ႇမိူင်းလၢဝ်းၼၼ်ႉၵေႃႈ မီးၵၢၼ်ၶုတ်း ႁႄႈလိၼ် ဝႆႉတင်းၼမ်။
ၸွမ်းထုင်ႉၸိူဝ်းမီးၵၢၼ်ၶုတ်းႁႄႈလိၼ်ၼၼ်ႉ လႆႈႁၼ်ထိူၼ်ႇပႃႇသၽႃႇဝလူႉၵွႆဝႆႉၵႂၢင်ႈၶႂၢင်ႈႁႅင်း။ လႆႈႁူႉဝႃႈ ၼမ်ႉၵွင်ႉသၢၼ် ၶႅမ်ႊမီႊၶိူဝ်ႊလ် ဢၼ်ဢွၵ်ႇမႃးၸွမ်းၵၢၼ်ၶုတ်း လႄႈ ထွင်ႁႄႈလိၼ် ၼႂ်းမိူင်းလၢဝ်းၼၼ်ႉ လႆၶဝ်ႈၵႂႃႇၸွမ်းၼႂ်း ၵႄးၼမ်ႉၶၢဝ် လႄႈ မႄႈၼမ်ႉၶၢၼ်းသေ သိုပ်ႇလႆၶဝ်ႈၵႂႃႇၸူး မႄႈၼမ်ႉၶွင်ထႅင်ႈ – ဝႃႈၼႆ။
ၵၢၼ်ၶုတ်းဢွၵ်ႇႁႄႈလိၼ်ၼႂ်းမိူင်းႁူမ်ႈတုမ်ၼႆႉ မီးၼႂ်းၸႄႈမိူင်းၶၢင် လႄႈ မိူင်းတႆးပွတ်းဢွၵ်ႇ ၼႂ်းၼႃႈတီႈၸုမ်းသိုၵ်းဝႃႉ (UWSA) လႄႈ ၸုမ်းသိုၵ်းမိူင်းလႃး (NDAA) ၸိူဝ်းၼႆႉသေ သၽႃႇဝၾိင်ႈတိုၼ်း ၼႂ်းၸႄႈမိူင်းၶၢင် လူႉၵွႆၼမ်လိူဝ်ပိူၼ်ႈသုတ်း ။
မိူဝ်ႈပူၼ်ႉမႃး ဝၼ်းတီႈ 15 လိူၼ်မေႊ 2025 ၼႆႉ ၵဝ်ႉငဝ်ႈသုၼ်ႇလႆႈၵူၼ်းၸိုင်ႈတႆး (SHRF) ပိုၼ်ၽၢဝ်ႇဢွၵ်ႇယိုၼ်ယၼ်ဝႆႉဝႃႈ ၼႂ်းမိူင်းတႆးပွတ်းဢွၵ်ႇၼႆႉ ၾၢႆႇၸၢၼ်းထုင်ႉမိူင်းယွၼ်း ဝဵင်းမိူင်းသၢတ်ႇၼၼ်ႉ လႆႈႁၼ်မီးၶူင်းၵၢၼ်ၶုတ်းႁႄႈလိၼ်ဝႆႉ 2 တီႈ။
ပိုၼ်ႉတီႈမီးၵၢၼ်ၶုတ်းဢွၵ်ႇႁႄႈလိၼ်ၼႆႉ မီးဝႆႉတီႈလႅၼ်လိၼ် မိူင်းတႆး- မိူင်းထႆးသေ ယၢၼ်ၵႆၵၼ်တင်းလႅၼ်လိၼ်ထႆး တႃႇ 25 ၵီႊလူဝ်ႊမီႊတိူဝ်ႊၵူၺ်း ။
လိူဝ်ၼၼ်ႉ တၢင်းဝဵင်းမိူင်းပွၵ်ႉၼၼ်ႉၵေႃႈ ၵၢၼ်ၶုတ်းႁႄႈလိၼ် ၼမ်ၶိုၼ်ႈမႃးႁႅင်းတေႉတေႉဝႃႈဝႃႈသေ တႄႇပီ 2025 ၼႆႉမႃး ဢွင်ႈတီႈၵၢၼ်ၶုတ်းႁႄႈလိၼ်မီးဢမ်ႇယွမ်း 26 တီႈ ဝႃႈၼႆဝႆႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ