သင်ႁၼ်ဝႃႈ ၵူၼ်းၼုမ်ႇသႅၼ်းႁုၼ်ႈမႂ်ႇ မေႃႁႃၶတ်းၸႂ်ႁဵတ်းၵၢၼ်ၼႆႉ ဢမ်ႇဝႃႈ ၼႂ်းၼႃႈႁိူၼ်းလႄႈတူင်ႇၵူၼ်း ဢွၼ်ႁပ်ႉႁၼ်လီ ဢဝ်ၵုင်ႇမုၼ်ၸွမ်း ။ ၵူၺ်းၵႃႈ ၵွမ်ႉၵူၺ်း မေႃႁၼ်ဝႃႈ ႁဵတ်းၵၢၼ်လႆႈငိုၼ်းၼႆသေ ဢမ်ႇထတ်းသၢင်တူၺ်း ၵၢၼ်လီၵၢၼ်ႁၢႆႉသင်ၼၼ်ႉတႄႉ ၵႆႉၸၢင်ႈပိူင်ႈႁွႆးမၼ်း ။ ၵၢပ်ႈယၢမ်ႈ လဵဝ်တႄႉ ၵၢၼ်သမ်ႉမီးၸေး ပေႃးႁဵတ်းဢမ်ႇမႅၼ်ႈၸွမ်းပိူင်ၵေႃႈမီးၽေး ။ မိူၼ်ၼင်ႇ ယိင်းဢွၼ်ႇ ပွတ်းတၢင်းလႃႈသဵဝ်ႈၼႆႉ ၵႂႃႇႁႃႁဵတ်းၵၢၼ် ပွတ်းတၢင်းမိူင်းပွၵ်ႉ မိူင်းၽႅၼ်ၼၼ်ႉ ၵႂႃႇႁဵတ်းၵၢၼ်လူၺ်ႈဢမ်ႇႁူႉငိူၼ်ႈႁူႉႁၢၵ်ႈသင်သေ ၺႃးပလိၵ်ႈဝႃႉတီႉၺွပ်းသႂ်ႇၶွၵ်ႇဝႆႉ ။

ၸဵမ်မိူဝ်ႈ ၵၢၼ်ၵျႃႊၽျႅၼ်ႉ ၵၢၼ်လႅၼ်ငိုၼ်းၼိူဝ်ဢွၼ်ႊလၢႆး တႄႇၽႄႈမႃးသေ ၵႆႉမီးပၼ်ႁႃၵူၼ်းၵႃႉၶၢႆၵူၼ်း ၊ ၵူၼ်းႁၢႆလူၺ်ႈဢမ်ႇႁူႉငိူၼ်ႈၶႆ ၊ ၵပ်းသိုပ်ႇၸူးၵၼ်ယၢပ်ႇၸိူဝ်းၼႆႉ တေပႃး မိူင်းပွၵ်ႉ ၊ မိူင်းၽႅၼ် ဢၼ်ယူႇၼႂ်းၶဵတ်ႇၸႄႈဝဵင်းမိူင်းယၢင်း ၸိုင်ႈတႆးပွတ်းဢွၵ်ႇၶူင်းၼႆႉ။

ဢိူင်ႇမိူင်းပွၵ်ႉ၊ မိူင်းၽႅၼ်လႄႈ ႁူဝ်တဝ်း ၸိူဝ်းၼႆႉတႄႉ ယူႇဝႆႉၼႂ်းၸႄႈဝဵင်းမိူင်းယၢင်း ၸိုင်ႈတႆးပွတ်းဢွၵ်ႇၶူင်း။ ပဵၼ်တီႈသိုၵ်းဝႃႉယူႇသဝ်းတူင်ႉၼိုင်ၵုမ်းၵမ်။
ၼႂ်းပိူင်ငဝ်ႈပိုင်းမိူင်း 2008 တႄႉ သိုၵ်းမၢၼ်ႈဢမ်ႇထၢမ်ၵၢင်ၸႂ်ၵူၼ်းမိူင်းတႆးသေတႅမ်ႈဝႆႉဝႃႈ ၸႄႈဝဵင်းႁူဝ်ပၢင်ႇ၊ ပၢင်ဝၢႆ၊ ၼႃးၽၢၼ်း၊ မိူင်းမႂ်ႇ၊ ပၢင်သၢင်း(ပၢင်ၶမ်း) တင်း မၢၵ်ႇမၢင် 6 ၸႄႈဝဵင်းၼႆႉပဵၼ်ၼႃႈလိၼ်ၽွင်းငမ်းတူဝ်ၵဝ်ႇဝႃႉ – ဝႃႈၼႆဝႆႉ။
ၵွပ်ႈၼႆလႄႈပဵၼ်ၵူၼ်းမိူင်းတႆးၵေႃႈယဝ်ႉ ပွတ်းတၢင်းမိူင်းပွၵ်ႉမိူင်းၽႅၼ်ၼႆႉ ဢၼ်ႇၸၢင်ႈၶဝ်ႈဢွၵ်ႇၵႂႃႇမႃးလႆႈလီလီ။ သင်ဢမ်ႇလႆႈၶႂၢင်ႉတီႈသိုၵ်းဝႃႉသေၼႆတႄႉ ဢမ်ႇမီးသုၼ်ႇလတ်းၵႂႃႇမႃးလႆႈ ။ မီးလွင်ႈလၢၵ်ႇလၢႆးသင်မႃးၵေႃႈ ၶၢဝ်ႇငၢဝ်းၼႂ်းပိုၼ်ႉတီႈ ဢမ်ႇသူႈႁူဝ်ႈဢွၵ်ႇ ။ ၵူၼ်းၸိူဝ်းယူႇၾၢႆႇၼွၵ်ႈ ဢမ်ႇသူႈႁူႉၸွမ်း- ၼႆ ၵူၼ်းၸိူဝ်းယၢမ်ႈယူႇၼႂ်းပိုၼ်ႉတီႈလၢတ်ႈၼင်ႇၼႆ။

ၼႂ်းၶၢဝ်းတၢင်း သိုၵ်းမၢၼ်ႈယိုတ်းမိူင်းမႃး 4-5 ပီ ၼႆႉ သမ်ႉၶႅၼ်းၼႃႇ ၵူၼ်းၼုမ်ႇၸိူဝ်းသူင်ႁဵတ်းၵၢၼ် ဢွင်ႈတီႈလပ်ႉလပ်ႉ ယိင်ႈၶႅၼ်းၵပ်းသိုပ်ႇၸူးယၢပ်ႇ ။ သင်လႆႈလီလႆႈပဵၼ်တႄႉၵေႃႈတင်းၶႅၼ်း ၸိူဝ်းဢၼ်ၵႂႃႇၺႃးတီႉၺွပ်းသေ ဢမ်ႇႁူႉၶၢဝ်ႇႁူႉငၢဝ်းၼၼ်ႉ လီလႆႈမႆႈၸႂ်တႄႉတႄႉ။

ငဝ်လၢႆးဝၢၼ်ႈမိူင်းတိုၵ်ႉယုင်ႈၼႆႉ ၵူၼ်းၼုမ်ႇၸိူဝ်းလၢတ်ႈဝႃႈ ၵႂႃႇႁႃႁဵတ်းၵၢၼ်ၼႆသေ ဢမ်ႇၵပ်းသိုပ်ႇလႆႈမီးလၢႆၵေႃႉ။ မိူဝ်ႈပၢႆပီ 2025 လိူၼ်ထူၼ်ႈ 11 ဝၼ်းတီႈ 29 ၼႆႉ ၼၢင်းဢေးယိင်း ၼုမ်ႇယိင်း ၵူၼ်းဝၢၼ်ႈသၢႆးလႅင် ဢႃယု 19 ဢၼ်ယူႇၸမ်တႃႈႁိူဝ်းၾင်ႇၶူင်း တႃႈပၢင်ယူၵ်ႇ ၾၢႆႇဢွၵ်ႇဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇ ၼၼ်ႉ ၵႂႃႇႁႃႁဵတ်းၵၢၼ် ပွတ်းတၢင်းမိူင်းပွၵ်ႉသေ ၵူၼ်းတင်းႁိူၼ်းဢမ်ႇၵပ်းသိုပ်ႇလႆႈ။

ၸဵမ်ဢဝ် မၢႆၾူၼ်းမၼ်းၼၢင်း ၾဵတ်ႉသ် ၊ လၢႆႊမၼ်းၼၢင်းၸိူဝ်းၼႆႉ ၵပ်းသိုပ်ႇၸူးဢမ်ႇလႆႈ ႁဵတ်းႁႂ်ႈၵူၼ်းတၢင်းလင်မႆႈၸႂ် ယူႇဢမ်ႇသႃႇ ၼွၼ်းဢမ်ႇလပ်း – ၼႆ ၵူၼ်းၸမ်ၸႂ်ၵေႃႉဢၼ်ႁၢႆၵႂႃႇၼၼ်ႉလၢတ်ႈ ။

မိူဝ်ႈတႄႇဢွၵ်ႇႁိူၼ်းၵႂႃႇတႄႉ ၵူၼ်းတီႈႁိူၼ်းႁူႉၸွမ်းဝႃႈ ၵႂႃႇႁဵတ်းၵၢၼ်လုမ်းလႃးၼႂ်းႁိူၼ်းပေႃႈလဵင်ႉမႄႈလဵင်ႉတီႈမိူင်းပွၵ်ႉၼႆၵူၺ်း ။ ဢွၵ်ႇႁိူၼ်းၵႂႃႇ မိူဝ်ႈလိူၼ်ထူၼ်ႈ 9 ပီ 2025 ။ တၼ်းၵႂႃႇႁဵတ်းၵၢၼ်တီႈမိူင်းပွၵ်ႉၼၼ်ႉ 3 လိူၼ်ပၢႆ။

ဝၢႆးၼၼ်ႉ ၵၢၼ်ဢမ်ႇပေႃးထုၵ်ႇၸႂ်လႄႈ ၸင်ႇၶၢႆႉလၢႆႈၵၢၼ် ၵႂႃႇႁႃႁဵတ်းၵၢၼ် ပွတ်းတၢင်းမိူင်းၽႅၼ် ။ တၼ်းလႆႈ 7 ဝၼ်းၵူၺ်း ၺႃးပလိၵ်ႈဝႃႉတီႉၺွပ်းသေ ဢဝ်ၵႂႃႇၵုမ်းၶင်ၶွၵ်ႈဝႆႉတီႈႁူင်းပလိၵ်ႈပၢင်သၢင်း ။ လွင်ႈဝႃႈ မၼ်းၼၢင်းၵႂႃႇႁဵတ်းၵၢၼ်မိူင်းၽႅၼ် သေ ၺႃးတီႉၺွပ်း ဢၼ်ဝႃႈၼၼ်ႉၵေႃႈ တီႈႁိူၼ်းဢမ်ႇႁူႉၸွမ်း။

ဢိင်ၼိူဝ် ဢေးယိင်းၺႃးတီႉၺွပ်းၼႆႉတႄႉ ၼၢင်းၶမ်းမူဝ် ဢူၺ်းၵေႃႉမၼ်းၼၢင်းလၢတ်ႈတီႈၽူႈတွႆႇႁွၵ်ႈၼင်ႇၼႆ –

မၼ်းလုၵ်ႉတီႈမိူင်းပွၵ်ႉၼႆႉသေ ၶိုၼ်းၵႂႃႇမိူင်းၽႅၼ် ။ ၵႂႃႇႁဵတ်းတၼ်းလႆႈ 7 ဝၼ်းၵူၺ်း ။ ဢၼ်ပဵၼ်ပေႃႈလဵင်ႉမႄႈလဵင်ႉၶဝ်ၼၼ်ႉသမ်ႉ ႁဵတ်းၵၢၼ်ၽိတ်းပၵ်းပိူင်လႄႈ ယႄး(ပလိၵ်ႈ)ၶဝ်မႃးၺွပ်းၶဝ်။ၵႂႃႇတူၵ်းထွင်ႇဝႆႉ

ဢၼ်ၼၢင်းဢေးယိင်း ၵႂႃႇႁဵတ်းၵၢၼ်မိူင်းၽႅၼ်ၼႆႉသမ်ႉ ပိူင်လူင်ၵေႃႈ မၼ်းၼၢင်းႁူႉဝႃႈ တေလႆႈလုမ်းလႃးႁိူၼ်းယေးလႄႈလဵင်ႉလုၵ်ႈဢွၼ်ႇ မွၵ်ႈၼၼ်ႉၵူၺ်း။ ၽိူဝ်ႇဝႃႈ ၵႂႃႇႁဵတ်းတႄႉတႄႉသမ်ႉ ႁိူၼ်းလင်ၼၼ်ႉ ၵဵဝ်ႇၶွင်ႈၸွမ်းၸုမ်းၵျႃႊၽျႅၼ်ႉၼႆသေ ထိုင်တီႈပလိၵ်ႈမႃးၵူတ်ႇထတ်းတီႉၺွပ်းၵႂႃပႃး ၼႆ ဢူၺ်းၵေႃႉဢေးယိင်းၼၼ်ႉလၢတ်ႈၼႄၼင်ႇၼႆ။

ဢိင်ၼိူဝ် ႁဵတ်းၵၢၼ်ၽိတ်းပိူင်ၼႆသေ ဢေးယိင်းတေလႆႈတူၵ်းၶွၵ်ႈတႃႇ 3 လိူၼ် ၊ သင်ဝႃႈ ပီႈၼွင်ႉၶႂ်ႈထႆႇတူဝ်ဢွၵ်ႇမႃးၶိုၼ်းၼႆ တေလႆႈၸၢႆႇငိုၼ်း 4 မိုၼ်ႇယႂၼ်ႇ ငိုၼ်းၶႄႇ ။ သင်ဝႃႈ ႁႂ်ႈယူႇၼႂ်းၶွၵ်ႈ တေႃႇပေႃးတဵမ် 3 လိူၼ်တႄႉ တေလႆႈပၼ်ၵႃႈၵိၼ်ယမ်ႉၼႂ်းၶွၵ်ႈၼၼ်ႉ တႃႇ 3 ႁဵင်ယႂၼ်ႇ ဝႃႈၼႆ။

ဢူၺ်းၵေႃႉၼၢင်းဢေးယိင်းၼၼ်ႉ သိုပ်ႇလၢတ်ႈၼႄဝႃႈ –

ၶႃႈႁဝ်းၶဝ်ၵေႃႈ လၢတ်ႈဢိူဝ်ႈၼေႃႈ မၼ်းတမ်ႉဢမ်ႇမေႃလိၵ်ႈမေႃလၢႆး။ မၼ်းတေႁဵတ်းႁိုဝ် ၵႂႃႇပဵၼ်လႆႈဝႃႈ မၼ်းၵႂႃႇႁဵတ်းၵျႃႊၽျႅၼ်ႉ မိူၼ်ၸိူင်ႉၼင်ႇ ၵႂႃႇလႅၼ်ငိုၼ်းပိူၼ်ႈၸိူင်ႉၼၼ်။ ပိူၼ်ႈၵေႃႈၶိုၼ်းဝႃႈ ပိူၼ်ႈၵျေႃးမၼ်းယူဝ်ႉ ။မၼ်းမီးဢၼ် ၶဝ်ၼဵၵ်ႉလၢႆးမိုဝ်းဝႆႉဢိူဝ်ႈ ။ မၼ်းတေဢမ်ႇႁူႉတီႈပွင်ႇမၼ်းလႄႈ ပိူၼ်ႈၸႂ်ႉမၼ်းၼဵၵ်းၼၼ်ႉၵႂႃႈ ဢေးၼွင်ႉၼႆႉ ။ယွၼ်ႉပိူဝ်ႈၸိူင်ႉၼၼ် ၸင်ႇဝႃႈမၼ်းၺႃး။ မိူဝ်ႈလဵဝ်ၼႆႉ တေမီးလိူၼ်ပၢႆယဝ်ႉ။ ပေႃးလိူၼ်ၼႆႉ 29 ဝၼ်းၵေႃႈ လႅပ်ႈတေ 2 လိူၼ်ယဝ်ႉၶႃႈ

ၵူၼ်းတၢင်းႁိူၼ်း ဢမ်ႇလႆႈလွင်ႈၵပ်းသိုပ်ႇၵၼ်တၢင်း ၼၢင်းဢေးယိင်း ၶၢဝ်းတၢင်းပေႃးၸမ် 2 လိူၼ် ။ ၽိူဝ်ႇဝႃႈ ႁူႉၵေႃႈ သမ်ႉပေႃးဝႃႈ မၼ်းၼၢင်းၵႂႃႇမီးၼႂ်းၶွၵ်ႈယဝ်ႉ ။ ဝၢႆးသေ ၽူႈတွႆႇႁွၵ်ႈ ဢွၵ်ႇၶၢဝ်ႇၵႂႃႇလွင်ႈမၼ်းၼၢင်းႁၢႆယဝ်ႉ ၸင်ႇမီးၵူၼ်းၵပ်းသိုပ်ႇမႃးၸူးသေ ႁပ်ႉႁူႉဝႃႈ မၼ်းၼၢင်းတူၵ်းၶွၵ်ႈ ၼႆ ၼၢင်းၶမ်းမူဝ် ဢူၺ်းၵေႃႉၼၢင်းဢေးယိင်းၼၼ်ႉ လၢတ်ႈၼင်ႇၼႆ။

ၼၢင်းဢေးယိင်းၼႆႉ ပဵၼ်လုၵ်ႈ ပႃႈၼၢင်းၸၢမ်ႇ ပဵၼ်ၵူၼ်းဝၢၼ်ႈသၢႆးလႅင် ဢၼ်ယူႇၸမ်တႃႈႁိူဝ်းၾင်ႇၶူင်း တႃႈပၢင်ယူၵ်ႇ ၾၢႆႇဢွၵ်ႇဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇ ။
မၼ်းၼၢင်း ဢွၵ်ႇႁိူၼ်းၵႂႃႇ ၸဵမ်မိူဝ်ႈ လိူၼ်ထူၼ်ႈ 9 ပီ 2025 ၼၼ်ႉသေ ၵႂႃႇႁဵတ်းၵၢၼ်မိူင်းပွၵ်ႉ ၸႄႈတွၼ်ႈမိူင်းယၢင်း ၼႃႈလိၼ်သိုၵ်းဝႃႉၵုမ်းၵမ်။

ဢၼ်ႁၢႆၵႂႃႇၸွမ်းမၼ်းၼၢင်းၼႆႉ မီးထႅင်ႈၼုမ်ႇယိင်းၵေႃႉၼိုင်ႈ ဢႃယု တေပဵင်းၵၼ် ၸိုဝ်ႈလဵၼ်ႈႁွင်ႉဢၢင်းဢၢင်း ပဵၼ်ၵူၼ်းမိူင်းလႂ် လုၵ်ႈၽႂ်ၼႆတႄႉ ပႆႇႁူႉၸွမ်းၼႆ ဢူၺ်းၵေႃႉ ၼၢင်းဢေးယိင်းလၢတ်ႈၼင်ႇၼႆ။
ၵၢၼ်ႁႃငိုၼ်း ၵၢပ်ႈယၢမ်းလဵဝ် ဢမ်ႇၵိုင်ႇလီယုမ်ႇၽႂ်ငၢႆႈငၢႆႈ ။ သင်ပႆႇႁူႉၸၵ်းၽႂ် ပႆႇလူင်ႉလႅၼ်ႇသဵၼ်ႈတၢင်း ၸိူဝ်းၼႆႉ ဢမ်ႇၵိုင်ႇလီၵႂႃႇၵေႃႉလဵဝ် ၸၢင်ႈတူၵ်းလွၵ်း ၵူၼ်းၸိူဝ်းၶႂ်ႈလွၵ်ႇလႅၼ်ၵိၼ်ငိုၼ်း ။ ဢမ်ႇၼၼ်ၵေႃႈ ၸၢင်ႈတူၵ်းပဵၼ်တူဝ်ယိူဝ်ႇၵူၼ်းၸိူဝ်းႁဵတ်းၵၢၼ်ၽိတ်းပၵ်းပိူင်- ၼႆ ၵူၼ်းႁဵတ်းၵၢၼ် ပွတ်းတၢင်းလႅၼ်လိၼ် တႆး- ၶႄႇ ၵေႃႉၼိုင်ႈလၢတ်ႈသင်ႇၼင်ႇၼႆ။