ၵူၼ်းပၢႆႈၽေးသိုၵ်း ဢၼ်ပၢႆႈမႃးသွၼ်ႈဝႆႉတီႈၼႂ်းဝဵင်းၵျွၵ်ႉမႄး ႁူဝ်ၵူၼ်း ႁဵင်ပၢႆၼႆႉ ထိုင်ယၢမ်းလဵဝ် ပႆႇၸၢင်ႈပွၵ်ႈႁိူၼ်းယေး ယွၼ်ႉ TNLA တင်း RCSS တိုၵ်ႉၶဵင်ႈၶႅင်ၵၢၼ်သိုၵ်းတေႃႇၵၼ်ယူႇ ဝႃႈၼႆ။
တႄႇဢဝ် ႁၢင်လိူၼ်ၻီႊသႅမ်ႊၿိူဝ်ႊ 2020 မႃး တေႃႇထိုင်ယၢမ်းလဵဝ်ၼႆႉ ၵူၼ်းပၢႆႈၽေးသိုၵ်း တၢင်းဝၢၼ်ႈလွႆဢၢၼ်၊ ၵွင်းၶႃး၊ ပၢင်ႇလေႃႉ၊ ၵုင်းသႃႇလႄႈ ပၢင်မၢၵ်ႇၶၢမ် ၸိူဝ်းပၢႆႈမႃးသွၼ်ႈဝႆႉ ၼႂ်းဝဵင်းၵျွၵ်ႉမႄး ၸိုင်ႈတႆးပွတ်းႁွင်ႇ ႁူဝ်ၵူၼ်းႁဵင်ပၢႆ ပႆႇၸၢင်ႈပွၵ်ႈႁိူၼ်းယေး တေမီးၶၢဝ်းတၢင်း 20 ဝၼ်းပၢႆ မွၵ်ႈ 3 ဝူင်ႈ ၼႆႉယဝ်ႉ။
ၼၢင်းဢိမုၼ်ႇဢွင်ႇ ၽူႈတႅၼ်းသၽႃးၸႄႈမိူင်းၶဵတ်ႇလိူၵ်ႈတင်ႈမၢႆ 1 ၸႄႈဝဵင်းၵျွၵ်ႉမႄး လၢတ်ႈဝႃႈ -“ယွၼ်ႉငဝ်းလၢႆး ၼႂ်း ပိုၼ်ႉတီႈ သိုၵ်းတိုၵ်ႉၶဵင်ႈၶႅင်ၵၼ်ယူႇလႄႈ ၵူၼ်းပၢႆႈၽေးသိုၵ်း ႁဵင်ပၢႆ ပႆႇႁတ်းပွၵ်ႈမိူဝ်းႁိူၼ်း။ သိုၵ်းသွင်ၸုမ်းၼႆႉ ဢမ်ႇပေႃးယူႇၵႆယၢၼ်ၵၼ် ပၢင်တိုၵ်းတေၸၢင်ႈပဵၼ်လႆႈၵူႈၶၢဝ်းယၢမ်းၼႆသေ ၵူၼ်းဝၢၼ်ႈ ပႆႇႁတ်းပွၵ်ႈ မိူဝ်းႁိူၼ်း”- ဝႃႈၼႆ။
သင်ဝႃႈ သိုၵ်းတင်းသွင်ၾၢႆႇတိုၵ်ႉၶဵင်ႈၶႅင်ၵၢၼ်သိုၵ်းတေႃႇၵၼ် ၸိူင်ႉၼႆ ႁိုင်ထႅင်ႈၸိုင် ၵူၼ်းပၢႆႈၽေးသိုၵ်းဢၼ်မီးၼႂ်းဝဵင်း တေၸၢင်ႈထူပ်းတၢင်းယၢပ်ႇၽိုတ်ႇ လွင်ႈၶဝ်ႈၼမ်ႉတၢင်းၵိၼ် ႁၢဝ်ႈႁႅင်း မႃး ၸုမ်းၸွႆႈထႅမ်ၵူၼ်းပၢႆႈၽေးသိုၵ်းလၢတ်ႈၼင်ႇၼႆ။
“ၼႂ်းဝူင်ႈၼႆႉ လွင်ႈတၢင်းၸွႆႈထႅမ်ၵူၼ်းပၢႆႈၽေးတႄႉ တေဢမ်ႇပေႃးၵုမ်ႇထူၼ်ႈ မိူၼ်ၸိူင်ႉၼင်ႇမိူဝ်ႈပၢင်တိုၵ်းဢၼ်ပဵၼ် ပူၼ်ႉမႃးၼၼ်ႉ၊ ၽူႈၸွႆႇထႅမ် တူင်ႉၼိုင်ၵေႃႈ တေဢမ်ႇပေႃးမီးၼမ်ယဝ်ႉၶႃႈ။ ယၢမ်းလဵဝ်တႄႉ တေမီးၾၢႆႇ NGO ၶဝ်၊ ၸုမ်း ပရႁိတၶဝ် ၸိူဝ်းၼႆႉၶႃႈ ဢၼ်တိုၵ်ႉမႃးၸွႆႈထႅမ်”- ၼၢင်းဢိမုၼ်ႇဢွင်ႇ သိုပ်ႇလၢတ်ႈ ၼႄၼင်ႇၼႆ။
သိုၵ်း TNLA တင်း RCSS ပဵၼ်ၸုမ်းယိပ်းၵွင်ႈၵၢင်ႇၸၢဝ်းၶိူဝ်းၼင်ႇၵၼ် ၼႂ်းမိူင်းတႆး ၵေႃႈၸႂ်ႈ ယဝ်ႉၵေႃႈပဵၼ်ၸုမ်း ပိုၼ် ၽၢဝ်ႇၵိုတ်းတိုၵ်းၼင်ႇၵၼ် တင်းသွင်ၸုမ်း။ TNLA ၼႆႉ ပိုၼ်ၽၢဝ်ႇၵိုတ်းတိုၵ်းပၢင်တိုၵ်း တႄႇဢဝ် ဝၼ်းတီႈ 1/1/2021 တေႃႇထိုင် ဝၼ်းတီႈ 28/2/2021 တႃႇၶၢဝ်းတၢင်း 2 လိူၼ်။
လိူဝ်ၼၼ်ႉ RCSS ၵေႃႉ ပဵၼ်ၸုမ်းဢၼ်လူင်းလၢႆးမိုဝ်းၵိုတ်းတိုၵ်းပတ်းပိုၼ်ႉတူဝ်ႈ မိူင်း NCA ၸုမ်းၼိုင်ႈ ၼႆယဝ်ႉ။
ယွၼ်ႉသိုၵ်းသွင်ၸုမ်းၼႆႉသေ မၢၵ်ႇလူင် မၢၵ်ႇၵွင်ႈ တိူဝ်ႉသႂ်ႇႁိူၼ်းၵူၼ်းဝၢၼ်ႈ ၼႂ်းဝၢၼ်ႈတေႃႉသၢင်ႇ လင်ႁိူၼ်းၵူၼ်း ဝၢၼ်ႈလႆႈၺႃးၸၢၵ်ႇၸွမ်း တင်းမူတ်း 55 လင်။ ၼႂ်းၼၼ်ႉ တႃႇ 5 လင် တုမ်ႉၸိူဝ်ႉႁၢဝ်ႈႁႅင်း ၼႆယဝ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ