ၼႂ်းႁူဝ်ပီ 2026 ၼႆႉ ပိဝ်ႇႁႃႇမူး ၵေႃႉၼင်ႈဝႆႉတီႈတပ်ႉမၢၼ်ႈထုင်ႉၼမ်ႉလၼ်ႈ ၸႄႈဝဵင်းသီႇပေႃႉ ၸတ်းဢဝ်ႁႅင်းသိုၵ်း မွၵ်ႈ 100 ပၢႆသေ ၵႂႃႇတီႉၺွပ်းဢဝ် ရူတ်ႉၵႃးတၢင်ႇၵုၼ်ႇ မိူင်း ၶႄႇ ဢၼ်တိုၵ်ႉပႂ်ႉၶီႇပူင်ႈ (ပလူင်ႈ /ႁိူဝ်း) ၶၢမ်ႈၼမ်ႉတူႈ တီႈဝၢၼ်ႈတႃႈလူင် ၸႄႈဝဵင်းၵျွၵ်ႉမႄး မိူင်းတႆးပွတ်းႁွင်ႇ ၼႆယဝ်ႉ။

သိုၵ်းမၢၼ်ႈဢၼ်ပၵ်းတပ်ႉဝႆႉတီႈၼမ်ႉလၼ်ႈၼႆႉ ဢမ်ႇပွင်ႇၶၢဝ်ႇ၊ ဢမ်ႇငူပ်ႉငီႉသင်တင်း ၸဝ်ႈၼႃႈတီႈၽူႈမီး ပုၼ်ႈၽွၼ်းၼႂ်းပိုၼ်ႉတီႈသေ ၵိုင်ႉၵၢင်ႉႁွင်ႉဢဝ်ႁႅင်းသိုၵ်း ၶဝ်ႈၵႂႃႇၵူတ်ႇထတ်းတီႉၺွပ်းဢဝ် ရူတ်ႉၵႃးတၢင်ႇၵုၼ်ႇ မိူင်းၶႄႇ တႃႇ 77 လမ်းၼႆ ၵူၼ်းမိူင်းပိုၼ်ႉတီႈ ၵေႃႉႁူႉႁၼ်ၸွမ်း လွင်ႈၼႆႉလၢတ်ႈၼင်ႇၼႆ။

“ၼႆႉပဵၼ်ၵႂႃႇမိူဝ်ႈႁူဝ်လိူၼ်(ၵျႅၼ်ႊၼိဝ်ႊရီႊ)ၼႆႉဢေႃႈ။ တေပဵၼ်မွၵ်ႈ ဝၼ်းတီႈ 4 ဝၼ်းတီႈ 5 ၸိူဝ်းၼႆႉယဝ်ႉၶႃႈ။ သိုၵ်းမၢၼ်ႈၶဝ် ဢဝ်ႁႅင်းသိုၵ်းမွၵ်ႈ 100 ပၢႆ၊ ၵႃးမွၵ်ႈ 6 လမ်းႁႄၶဝ်ႈမႃးၺွပ်းရူတ်ႉၵႃး တႄႇတီႈဝၢၼ်ႈႁူဝ်ၼႃး ၼၼ်ႉ။ ၶဝ်ပႃး စရဖ မႃးၸွမ်းႁႄ။ တၢမ်တူဝ်ပိဝ်ႇႁႃႇမူးတီႈၼမ်ႉလၼ်ႈ ၵေႃႉဢွၼ်မႃးၼႆဢေႃႈ။ ၵႃးၸိူဝ်းၺႃးၺွပ်းၼၼ်ႉ ၶဝ်ႁွင်ႉဢဝ်ၵႂႃႇဝႆႉတၢင်း တပ်ႉၶဝ် တီႈၼမ်ႉလၼ်ႈဝႃႈၼႆဢေႃႈ” ၼႆယဝ်ႉ။

လႆႈႁူႉဝႃႈ လွင်ႈသိုၵ်းမၢၼ်ႈၸတ်းဢဝ်ႁႅင်းၵူၼ်းသိုၵ်းသေ ၵိုင်ႉၵၢင်ႉၶဝ်ႈၵႂႃႇၵူတ်ႇထတ်း တီႉၺွပ်းဢဝ်ရူတ်ႉ ၵႃးၸိူဝ်းတၢင်ႇၵုၼ်ႇမိူင်းၶႄႇၼၼ်ႉ ၾၢႆႇၸဝ်ႈၼႃႈတီႈၼႂ်းပိုၼ်ႉတီႈ ဢမ်ႇတၼ်းလႆႈႁူႉဝႆႉလူင်ႈၼႃႈ။ တႃႈၼမ်ႉ ဢၼ်ဢဝ်ပလူင်ႈ (ႁိူဝ်း) တၢင်ႇၵႃးသေၶၢမ်ႈ တီႈဝၢၼ်ႈတႃႈလူင် ၸႄႈဝဵင်းၵျွၵ်ႉမႄးၼၼ်ႉ ၸဝ်ႈၼႃႈတီႈ ၽူႈမီးပုၼ်ႈၽွၼ်း ၾၢႆႇပႃႇတီႇမႂ်ႇသုင် ၸိုင်ႈတႆး ၊ တပ်ႉသိုၵ်းၸိုင်ႈတႆး (SSPP/SSA) ဢဝ်ပုၼ်ႈၽွၼ်း ၵုမ်းထိင်းဝႆႉလႄႈ ၽွင်းၼၼ်ႉ တင်းသိုၵ်းမၢၼ်ႈသေ တင်းသွင်ၾၢႆႇ လႆႈတွၵ်ႉတႅၵ်ႉၵၼ် ယူႇၽွင်ႈၼႆ ၵူၼ်းမိူင်းၵေႃႉ ႁူႉႁၼ်ၸွမ်း ပိူင်ပဵၼ်ၼႆႉ လၢတ်ႈၼင်ႇၼႆ။

“ဝၼ်းၼၼ်ႉ သိုၵ်းမၢၼ်ႈ တင်း သိုၵ်းတႆး လႆႈထဵင်မေႃးၵၼ် ပဵၼ်သူပ်းပဵၼ်ၵႂၢမ်းၵၼ်ၵႂႃႇယူႇၵမ်းၼိုင်ႈဢေႃႈ။ သိုၵ်းမၢၼ်ႈၵေႃႈဢမ်ႇပွင်ႇၶၢဝ်ႇသင်ဝႆႉလူင်ႈၼႃႈ၊ ၾၢႆႇသိုၵ်းတႆးၵေႃႈ ဢမ်ႇလႆႈႁူႉဝႆႉၶၢဝ်ႇလူင်ႈၼႃႈၼႆၼၼ်ႉၼႃႇ။ မၢၼ်ႈသမ်ႉဝႃႈ ႁႂ်ႈဢိုတ်းပႅတ်ႈ ၵၢၼ်တေႃႉဢဝ်ၵႃးတၢင်ႇၵုၼ်ႇ ၶၢမ်ႈၽင်ႇၼမ်ႉ၊ ယဝ်ႉၵေႃႈ ႁႂ်ႈသိုၵ်းတႆး ယႃႉပႅတ်ႈၸၢၵ်ႈႁိူဝ်းပလူင်ႈ ၼၼ်ႉၶႃႈၼႃႇ။ ၸင်ႇဝႃႈ ၶဝ်မေႃးၵၼ် ပေႃးၶႂ်ႈၽိတ်းၵၼ်ယူႇၵႅပ်ႉၼိုင်ႈဢေႃႈ။”

တင်ႈတႄႇပဵၼ်ပၼ်ႁႃထဵင်မေႃးၵၼ်မႃးသေတေႃႇထိုင်ယၢမ်းလဵဝ်တႄႉ တႃႈၼမ်ႉၼၼ်ႉလႆႈၵိုတ်းယင်ႉဝႆႉဢမ်ႇပၼ်ၽႂ်လတ်းၶၢမ်ႈၵႂႃႇမႃး။ ရူတ်ႉၵႃးၵူၼ်းမိူင်းၵေႃႈလႆႈဝႄႈသဵၼ်ႈ တၢင်းၼၼ်ႉ ၸႂ်ႉသဵၼ်ႈတၢင်းတၢင်ႇဢၼ်ဢဝ် ဝႃႈၼႆ။

ရူတ်ႉၵႃးတၢင်ႇၵုၼ်ႇၸိူဝ်းၺႃးသိုၵ်းမၢၼ်ႈ တီႉၺွပ်းဢဝ်ၵႂႃႇၼၼ်ႉ ယၢမ်းလဵဝ် မီးဝႆႉယူႇၼႂ်းတပ်ႉမၢၼ်ႈ ၶလရ 506 တီႈၼမ်ႉလၼ်ႈ ၸႄႈဝဵင်းသီႇပေႃႉ ၼႆယဝ်ႉ။

ၵူၼ်းမိူင်းပိုၼ်ႉတီႈ ၵေႃႉယူႇဝႆႉဝဵင်းၼမ်ႉလၼ်ႈလၢတ်ႈဝႃႈ “ၵႃးၸိူဝ်းဢၼ်ၶဝ်ၵႂႃႇၺွပ်းဢဝ်မႃးတၢင်း တႃႈလူင်ၼၼ်ႉ ႁၼ်မီးယူႇဝႆႉၼႂ်းတပ်ႉ 506 ၶဝ်ၼၼ်ႉ။ မၢင်လမ်းၵေႃႈ ၶဝ်ၵူတ်ႇထတ်းယဝ်ႉႁႄ လႆႈဢွၵ်ႇၵႂႃႇၶိုၼ်းယဝ်ႉ။ ဢၼ်ၵိုတ်းဝႆႉၼႆႉ တိုၵ်ႉၼမ်တၢၼ်ႇတၢၼ်ႇမၼ်းယူႇ” ဝႃႈၼႆ။

လိူဝ်ၼၼ်ႉ သိုၵ်းမၢၼ်ႈၼႆႉ ၸွမ်းတၢင်းၶဝ်ႈဢွၵ်ႇဝဵင်းၵျွၵ်ႉမႄး လႄႈ ဝဵင်းသီႇပေႃႉ တင်ႈၵဵတ်ႉလၢၼ်ႇဝႆႉသေ ပႂ်ႉၵူတ်ႇထတ်း၊ ယွၼ်းငိုၼ်းတီႈ ရူတ်ႉၵႃးၸိူဝ်းလတ်းၵႂႃႇမႃးၼၼ်ႉႁၢဝ်ႈ ႁႅင်းယူႇ ၼႆယဝ်ႉ။