ၼႂ်း 2-3 ဝၼ်းမႃးၼႆႉ ပၢင်တိုၵ်းၼႂ်းၸိုင်ႈတႆးပွတ်းႁွင်ႇ ယဵၼ်ဝႆႉသေတႃႉ ၵူၼ်းပၢႆႈၽေးသိုၵ်းတီႈၵျွၵ်ႉမႄး တင်းၼမ်ႉတူႈ  ပႆႇႁတ်းပွၵ်ႈႁိူၼ်းယေးၵၼ် ယွၼ်ႉသိုၵ်းတင်းသွင်ၾၢႆႇ တိုၵ်ႉၶဵင်ႈၶႅင်ၵၢၼ်သိုၵ်းတေႃႇၵၼ်ဝႆႉ   ။

တႄႇဢဝ် ဝၼ်းတီႈ 25 လိူၼ်ၻီႊသႅမ်ႊၿိူဝ်ႊ 2020 မႃးတေႃႇထိုင် ႁူဝ်လိူၼ်ၵျႅၼ်ႊၼိဝ်ႊရီႊ 2021 ၼႆႉ သိုၵ်း TNLA တင်း RCSS ပိုတ်ႇၼႃႈသိုၵ်းတေႃႇၵၼ် ႁၢဝ်ႈႁႅင်း တၢင်းပွတ်းၸႄႈဝဵင်းၵျွၵ်ႉမႄးလႄႈ ၼမ်ႉတူႈ ၸိုင်ႈတႆးပွတ်းႁွင်ႇ၊    ၵူၼ်းမိူင်း  ပၢႆႈၽေးသိုၵ်းမီး 3,700 ပၢႆ လႆႈၵႂႃႇသွၼ်ႈဝႆႉၸွမ်းဝတ်ႉဝႃးၽႃသိူဝ်ႇ ၊ၸိူဝ်းၶဝ်ပႆႇၸၢင်ႈပွၵ်ႈၶိုၼ်းႁိူၼ်းတေႃႇထိုင်ဝၼ်းမိူဝ်ႈၼႆႉ ။

လုင်းပႃႉၺၢၼ်ႇ ၵႅမ်ႁူဝ်ပဝ်ႈ ၶွမ်ႊမတီႊၸွႆႈထႅမ်ၵူၼ်းပၢႆႈၽေးသိုၵ်း တီႈၼမ်ႉတူႈ လၢတ်ႈဝႃႈ – “ယၢမ်းလဵဝ် တၢင်းၼမ်ႉတူႈ ၼႆႉ ပၢင်တိုၵ်းတင်းသွင်ၾၢႆႇ ယဵၼ်လူင်းယဝ်ႉ။ ၵူၺ်းၵႃႈ ၶဝ်တိုၵ်ႉထႅမ်ႁႅင်းသိုၵ်း ၶဵင်ႈၶႅင်ၵၼ်ဝႆႉယူႇ။ ၵူၼ်းပၢႆႈၽေးတီႈၼမ်ႉ တူႈ ပႆႇႁတ်းပွၵ်ႈႁိူၼ်းၽႂ်မၼ်းၶိုၼ်း။ မိူဝ်ႈဝႃးၼႆႉ ၵူၼ်းႁိမ်းႁွမ်းမၢၼ်ႈၸၢမ် ပၢႆႈမႃးထႅင်ႈတီႈၵျွင်းမၢၼ်ႈၸၢမ် မွၵ်ႈႁူဝ်ၵူၼ်း 20 ပၢႆၼႆႉ” – ဝႃႈၼႆ။

ယၢမ်းလဵဝ် ၵူၼ်းပၢႆႈၽေးသိုၵ်းတီႈၵျွင်းမုၼ်ၸဝ်ႈမၢၼ်ႈၸၢမ် ဢိူင်ႇမၢၼ်ႈၸၢမ် တင်း ၵျွင်းမုၼ်ၸဝ်ႈ ၼႃးသၢႆး  ဢၼ်မီးၼႂ်းဢိူင်ႇၼႃႈသၢႆး ၸႄႈဝဵင်းၼမ်ႉတူႈၼႆႉ မီးႁူဝ်ၵူၼ်း ႁိမ်း 900 ၼႆယဝ်ႉ။  

ၼွၵ်ႈလိူဝ်ၼၼ်ႉ တီႈၸႄႈဝဵင်းၵျွၵ်ႉမႄးၵေႃႈ ၵူၼ်းဝၢၼ်ႈပွတ်းတေႃႉသၢင်ႇပၢႆႈမႃးသွၼ်ႈယူႇၸွမ်းဝတ်ႉဝႃးလႄႈ ႁိူၼ်းပီႈၼွင်ႉမီးမွၵ်ႈ  2,850 ပၢႆ ပႆႇၸၢင်ႈပွၵ်ႈၶိုၼ်းႁိူၼ်းယေး ၽႂ်မၼ်း ယွၼ်ႉသိုၵ်းတင်း သွင်ၾၢႆႇ တိုၵ်ႉၶဵင်ႈၶႅင် ၵၢၼ်သိုၵ်းတေႃႇၵၼ်ဝႆႉယူႇ ဝႃႈၼႆ။

ၸၢႆးဢွင်ႇမိၼ်ႉ ၽူႈတႅၼ်းသၽႃးၵူၼ်းမိူင်း ဢၼ်ဢွင်ႇပေႉပၢင်လိူၵ်ႈတင်ႈပီ 2020 တီႈၵျွၵ်ႉမႄး လၢတ်ႈဝႃႈ – “ပၢင်တိုၵ်း တႄႉ ယဵၼ်လူင်းၵႂႃႇယဝ်ႉ  ။ ၵူၺ်းၵႃႈ တၢင်းၾၢႆႇတေႃႉသၢင်ႇတႄႉ တေႃႇထိုင်မိူဝ်ႈ ဝႃး သဵင်ၵွင်တိုၵ်ႉလႆႈယိၼ်း ထႅင်ႈယူႇ”-  ဝႃႈၼႆ။

ပၢင်တိုၵ်း ဢၼ်ပဵၼ်ယူႇတၢင်းၸိုင်ႈတႆးပွတ်းႁွင်ႇဝၼ်းမိူဝ်ႈၼႆႉ ပဵၼ်ၸုမ်း ယိပ်းၵွင်ႈၵၢင်ႇၸၢဝ်းၶိူဝ်း ၼႂ်းမိူင်းတႆး ၼင်ႇၵၼ် ပိုတ်းယိုဝ်းၵၼ်။ ယၢမ်းလဵဝ် ၵူၼ်းပၢႆႈၽေးသိုၵ်းပႆႇၸၢင်ႈမိူဝ်းၶိုၼ်းႁိူၼ်း၊ ၾၢႆႇၼိုင်ႈ ပဵၼ်ၽွင်းၶၢဝ်း ၵူၼ်းမိူင်းလူဝ်ႇတီႇႁႆႈတီႇသူၼ်လႄႈ တိုၵ်ႉလူဝ်ႇဢဝ်ၶဝ်ႈ  ၵေႃႈ ယင်းတိုၵ်ႉမီးတင်းၼမ်  ။

ၸဝ်ႈသိုၵ်း ဢုမ်ႈၶိူဝ်း ၽူႈၶၢၼ်ပၢၵ်ႇ RCSS လၢတ်ႈဝႃႈ – “ပၢင်တိုၵ်းတႄႉ ယဵၼ်ယဝ်ႉ။ ၵၢၼ်ၶဵင်ႈၶႅင်ဝိရိယသိုၵ်းတႄႉ တိုၵ်ႉမီးယူႇ လွင်ႈထႅမ်ႁႅင်းသိုၵ်းတႄႉ ဢမ်ႇမီး ယဝ်ႉ”- ဝႃႈၼႆ။

ၼွၵ်ႈလိူဝ်ၼၼ်ႉ တီႈႁွင်ႈၵၢၼ်ၾၢႆႇပိုၼ်ၽၢဝ်ႇ TNLA တႄႉ ဢွၵ်ႇဝႆႉဝႃႈ ယွၼ်ႉသိုၵ်း RCSS ပူၼ်ႉပႅၼ်ၶဝ်ႈၼႂ်းပိုၼ်ႉတီႈ TNLA လႄႈ လႆႈပဵၼ်ပၢင်တိုၵ်း။ ယွၼ်ႉပၢင်တိုၵ်းသေ ႁိူၼ်း 60 လင်ပၢႆတီႈဝၢၼ်ႈတေႃႉသၢင်ႇ ၺႃးၸၢၵ်ႇမၢၵ်ႇလူႉၵွႆဝႆႉဝႃႈၼႆ။    တေႃႇထိုင်ၼႂ်းလိူၼ်ၵျႅၼ်ႊၼိဝ်ႊရီႊၼႆႉ  သွင်ၾၢႆႇလႆႈပဵၼ်ပၢင်တိုၵ်းၵၼ်မီး 13 ပွၵ်ႈယဝ်ႉ ဝႃႈၼႆ။