သိုၵ်း TNLA တင်း သိုၵ်း RCSS ပိုတ်ႇၼႃႈသိုၵ်း တိုၵ်းတေႃးၵၼ် မၢၵ်ႇၵွင်ႈ မၢၵ်ႇလူင် တူၵ်းသႂ်ႇ တိူဝ်ႉသႂ်ႇ ႁိူၼ်း ယေးၵူၼ်းဝၢၼ်ႈ တေႃႇသၢင်ႇ ၼႂ်းၸႄႈဝဵင်းၵျွၵ်ႉမႄး ဢမ်ႇယွၼ်း 50 လင် ဝႃႈၼႆ။
တႄႇဢဝ် ဝၼ်းတီႈ 25/12/2020 ၼၼ်ႉမႃး သိုၵ်း TNLA တင်း သိုၵ်း RCSS တိုၵ်းတေႃးၵၼ် ႁၢဝ်ႈႁႅင်း၊ မၢၵ်ႇဢွၼ်ႇ၊ မၢၵ်ႇလူင် တူၵ်းသႂ်ႇႁိူၼ်းယေး ၵူၼ်းဝၢၼ်ႈ 55 လင်၊ တႃႇ 5 လင် လူႉၵွႆႁႅင်း၊ တိူဝ်ႉပႃး ဝတ်ႉဝႃးၽႃသိူဝ်ႇ ၸေႇတီႇ ၵွင်းမူး ၼႂ်းဝၢၼ်ႈတေႃႇသၢင်ႇ ဢၼ်မီးၸဵင်ႇႁွင်ႇဝၼ်းတူၵ်း ဝဵင်းၵျွၵ်ႉမႄး ၸိုင်ႈတႆးပွတ်းႁွင်ႇ။
ၵူၼ်းပိုၼ်ႉတီႈ တေႃႉသၢင်ႇ လၢတ်ႈဝႃႈ – “ၸွမ်းၽႃႁိူၼ်း လဵၵ်းမုင်ႈႁိူၼ်း ၸိူဝ်းၼႆႉ ပဵၼ်ၵႃႈမၢၵ်ႇၵွင်ႈတိူဝ်ႉသႂ်ႇ ၵမ်ႈၼမ်ၶႃႈ ယဝ်ႉ။ ယဝ်ႉၵေႃႈ မၢၵ်ႇပီၵူၺ်ႈ ၸိူဝ်းၼႆႉ ၵေႃႈ တူၵ်းသႂ်ႇၵေႃႈမီး တင်းမူတ်းတုမ်ႉတိူဝ်ႉ 55 လင်၊ တႃႇ 5 လင်ၼၼ်ႉ တိူဝ်ႉ ႁႅင်းဝႆႉၶႃႈဢေႃႈ။ လိူဝ်ၼၼ်ႉ ၵူၼ်းဝၢၼ်ႈပၢင်ၵၢင် ၺႃးၸၢၵ်ႇမၢၵ်ႇၸွမ်းၵေႃႉၼိုင်ႈ ၵူၺ်းၵႃႈ ဢမ်ႇတိူဝ်ႉမၢတ်ႇၸဵပ်း ႁၢဝ်ႈ ႁႅင်းသင်ၶႃႈ” – ဝႃႈၼႆ။
ဝၢၼ်ႈတေႃႇသၢင်ႇၼႆႉ မီးၸဵင်ႇႁွင်ႇဝၼ်းတူၵ်း ဝဵင်းၵျွၵ်ႉမႄး၊ လင် ႁိူၼ်း 170 လင်။ ဢိင်ၼိူဝ် သိုၵ်းသွင်ၾၢႆႇ ယိုဝ်းၵၼ်သေ ၵူၼ်းဝၢၼ်ႈ ၼႂ်းၸႄႈဝဵင်းၵျွၵ်ႉမႄး ၺႃးၸၢၵ်ႇသိုၵ်းသိူဝ် ႁိမ်း 1500 ၵေႃႉ လႆႈပၢႆႈယၢၼ်ႁိူၼ်းယေးတီႈယူႇ။ ယၢမ်းလဵဝ်ၵေႃႈ ၼႂ်းၸႄႈဝဵင်းၼမ်ႉတူႈ ၵျွၵ်ႉမႄး သိုၵ်းတင်းသွင်ၾၢႆႇ တိုၵ်ႉၶဵင်ႈ ငႃၵၼ်ဝႆႉယူႇလၢႆတီႈ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ