ဝၼ်းၵိူတ်ႇၸဝ်ႈသိလ်ထမ်းၶူးဝႃးဝုၼ်းၸုမ်ႉ တဵမ် 57 ပီၼႆႉ လုၵ်ႈၼွင်ႉတပႄး လုၵ်ႈသိတ်ႇ တၵ်ႉၵႃႇသတ်ႉထႃး သင်ၶၸဝ်ႈ တေၸတ်းႁဵတ်းၵႂႃႇ ဢွင်ႈတီႈၽႂ်မၼ်း ယွၼ်ႉတၢင်းပဵၼ်ၶူဝ်ႊဝိတ်ႉ 19 ၽႄႈလၢမ်းႁၢဝ်ႈႁႅင်းသေ တေဢမ်ႇၶွၼ်ႈတုမ် ၵၼ် တီႈလဵဝ်သေ ၸတ်းႁဵတ်းယဝ်ႉ ဝႃႈၼႆ။

  ဝၼ်းတီႈ 5/1/2021 ၼႆႉ   ပဵၼ်ဝၼ်းၵိူတ်ႇၸဝ်ႈသိလ်ထမ်းၶူးဝႃးဝုၼ်းၸုမ်ႉ ဢႃယု ထူၼ်ႈထိုင် 57 ပီ သေ ပီၼႆႉ ယွၼ်ႉဝႃႈ တၢင်းပဵၼ်ၶူဝ်ႊဝိတ်ႉ 19 ၽႄႈလၢမ်းႁၢဝ်ႈႁႅင်းလႄႈ  တေဢမ်ႇၵႂႃႇၶွၼ်ႈတုမ်တီႈလဵဝ်သေ ၸတ်းႁဵတ်း တီႈမိူင်းၽူင်း၊ မိူင်းၵႅတ်ႇ ၸိူဝ်းၼႆႉယဝ်ႉ။ တၵ်ႉၵႃႇသတ်ႉထႃး  လုၵ်ႈၼွင်ႉတပႄးလုၵ်ႈသိတ်ႇလႄႈ သင်ၶၸဝ်ႈ တေယူႇတီႈ    ဝဵင်းၽႂ်မၼ်းသေလူႇတၢၼ်းၵႂႃႇၵူၺ်းယဝ်ႉ ဝႃႈၼႆ။

ၸဝ်ႈၶူးၵုလိသ ၾၢႆႇယိပ်းငိုၼ်း လုမ်းသင်ႇၶႃႇၸိုင်းတႆး ပွတ်းဢွၵ်ႇၶူင်း လၢတ်ႈတီႈၽူႈတွႆႇႁွၵ်ႈဝႃႈ – “မိူဝ်ႈၽုၵ်ႈၼႆႉ ပဵၼ် ဝၼ်းၵိူတ်ႇၸဝ်ႈၶူးဝႃးဝုၼ်းၸုမ်ႉလႄႈ ၼႂ်းမိူင်းတႆး ၵူႈတီႈတီႈၵေႃႈ တေၸတ်းႁဵတ်းပၢင်သုတ်ႇမုၼ်းဝၢၼ်းပရိတ်ႈ ပၼ် ၸဝ်ႈႁဝ်း။ တီႈၵဵင်းတုင်ၼႆႉၵေႃႈ ယူႇတီႈသင်ၶတႆးႁဝ်း တေမႃးၶွၼ်ႈၵၼ်တီႈဝတ်ႉမွၵ်ႇမႆႇ (ၵွင်းမူးၶမ်း) သေသုတ်ႇမုၼ်း ဝၢၼ်းပရိတ်ႈ သိုပ်ႇၸႆးတႃ ပၼ်ၸဝ်ႈၶူးဝုၼ်းၸုမ်ႉ တႄႇယၢမ်းၵၢင်ၼႂ် 8 မူင်းၵႂႃႇ ယွၼ်ႉတၢင်းပဵၼ်ၶူဝ်ႊဝိတ်ႉ 19 သေ တေ ႁႂ်ႈယူႇႁၢင်ႇၵႆၵၼ် ၸွမ်းၼင်ႇ ပိူင်ပၢႆးယူႇလီၶဝ် တမ်းဝၢင်းဝႆႉၼၼ်ႉ”- ဝႃႈၼႆ။

လိူဝ်ၼၼ်ႉ ၼႂ်းမိူင်းတႆး ၵူႈတီႈၵေႃႈ တေၸတ်းႁဵတ်းပၢင်သုတ်ႇမုၼ်း ဝၢၼ်းပရိတ်ႈၵႂႃႇ ဢွင်ႈတီႈၽႂ်မၼ်း ၸွမ်းၼင်ႇငဝ်းလၢႆးၼႂ်းပိုၼ်ႉတီႈ မီးဝႆႉၼၼ်ႉဝႃႈၼႆ။

ယၢမ်းလဵဝ် ၸဝ်ႈသိလ်ထမ်းၶူးဝႃးဝုၼ်းၸုမ်ႉ တိုၵ်ႉၶဝ်ႈတိုဝ်းၵမ်သိလ် တီႈထမ်ႈမိူင်းၵႅတ်ႇ ဢိူင်ႇမိူင်းၵႅတ်ႇ ၸႄႈဝဵင်း မိူင်း တူၼ် ၸႄႈတွၼ်ႈမိူင်းသၢတ်ႇ ၸိုင်ႈတႆးပွတ်းဢွၵ်ႇၶူင်း တႃႇၶၢဝ်းတၢင်း 3 ပီ 3 လိူၼ် 3 ဝၼ်း။ ၸဝ်ႈတႄႇ ၶဝ်ႈထမ်ႈမိူင်း ၵႅတ်ႇ  မိူဝ်ႈဝၼ်းတီႈ 28/04/2019 မႃးတေႃႇထိုင်ယၢမ်းလဵဝ် မီးၶၢဝ်းတၢင်းပီပၢႆ ၸမ် 2 ပီယဝ်ႉ ဝႃႈၼႆ။

ၸဝ်ႈၶူးဝႃးဝုၼ်းၸုမ်ႉၼႆႉ ၸႃတိတီႈၵိူတ်ႇပဵၼ်ဝၢၼ်ႈမႄႈၶမ်းၼွင်မူဝ် ဢိူင်ႇမႄႈၶမ်း ၸႄႈဝဵင်း မႄႈၸၼ်း ၸႄႈ တွၼ်ႈ ၵဵင်းႁၢႆး။ ပဵၼ်လုၵ်ႈပေႃႈ သႅင်လႃႈလႄႈ မႄႈၶမ်းလႃႈ။ ၽွင်းဢႃယုၸဝ်ႈ 4 ပီ ထိုင် 10 ပီၼၼ်ႉ လႆႈၶဝ်ႈႁူင်း ႁဵၼ်းထႆး။ ထိုင်မႃးဢႃယု 11 ပီ ၼၼ်ႉ ၶိုၼ်ႈပဵၼ် ၸဝ်ႈသၢင်ႇ၊ ဢႃယု 12 ပီ တၵ်ႉၵႃႇသတ်ႉထႃး ဢိူင်ႇမိူင်းၽူင်း ၸႄႈ ဝဵင်းတႃႈၶီႈလဵၵ်း ၸင်ႇၵႂႃႇ ယိုၼ်ႈမွၵ်ႇ ယေႃးၸဝ်ႈ မႃးပူၵ်းပွင် သႃသၼႃတီႈဝတ်ႉၽရႃႉထၢတ်ႈသီႊတွၼ်ႊရိူင်း (သီရိ တွၼ်းႁိူင်း) ၸႄႈဝဵင်းတႃႈ ၶီႈလဵၵ်း ၸိုင်ႈတႆးပွတ်းဢွၵ်ႇၶူင်း တေႃႇထိုင်ဝၼ်းမိူဝ်ႈၼႆႉ။