ပေႃးထိုင်မႃး လိူၼ်ထူၼ်ႈၼိုင်ႈ ဝၼ်းတီႈ 5 ပီလႂ်ပီၼၼ်ႉၸိုင် ၸိူဝ်းပဵၼ်ၸၢဝ်းပုတ်ႉထၼႂ်းမိူင်းတႆး လႄႈ တၢင်ႇတီႈသီႇလႅၼ် တေၶုၵ်းထူပ်းဝူၼ်ႉႁၼ်ထိုင် ဝၼ်းၵိူတ်ႇၸဝ်ႈသိလ်ထမ်းၶူးဝႃးဝုၼ်းၸုမ်ႉ ပဵၼ်ၸဝ်ႈဢၼ်တိုဝ်းၵမ်သိလ်မၼ်ႈမႃးၸဵမ်မိူဝ်ႈယင်းလဵၵ်ႉတေႃႇယႂ်ႇမႃးထိုင်ႁၢၼ်ႉၼႆႉ ။ ပီ 2026 ၼႆႉၵေႃႈ လုၵ်ႈၼွင်ႉပွင်ႈပၢႆမၼ်းၸဝ်ႈလႄႈ တၵ်ႉၵႃႇသတ်ႉထႃးမၼ်းၸဝ်ႈ ဢွၼ်ၼမ်းၸတ်းပၢင် ႁူမ်ၸူမ်းဝၼ်းၵိူတ်ႇမၼ်းၸဝ်ႈၵိုၼ်းၶွၼ်ႈ ။ ပီၼႆႉ ငဝ်းလၢႆးပၢင်ဝၼ်းၵိူတ်ႇၸဝ်ႈသိလ်ထမ်း ၶူးဝႃးဝုၼ်းၸုမ်ႉ ပဵၼ်ႁိုဝ်မီးႁိုဝ်ၼႆၼၼ်ႉ ၸၢႆးသႂ်ၸိုၼ်ႈမိူင်း တေႁၢႆးငၢၼ်းၼႄပၼ်ၵႂႃႇၶႃႈဢေႃႈ။

ၶူၼ်တႃၵေႃႈႁွၵ်ႇ ၊ ၶဵဝ်ႈၵေႃႈမၢင်ႈသွင်သိၵ်ႈယဝ်ႉ ၊ ၸဵပ်းၵႅၼ်းမႃးထႅင်ႈသိၵ်ႈၼိုင်ႈယဝ်ႉ ၶဵဝ်တေမၢင်ႈထႅင်ႈသိၵ်ႈယဝ်ႉ ။ ထႅင်ႈႁႃႈပီ သိပ်းပီၵေႃႈ ၸမ်ပႃႇႁဵဝ်ႈသၢင်းၶႅင်းမႃးလွႆးလွႆးယဝ်ႉ ။ သမ်ႉပေႃးႁၢင်ႈႁႅၼ်းဝႆႉပႃႇႁဵဝ်ႈသၢင်းၶႅင်းယဝ်ႉ ၼႆသေ ၶူးဝႃးၸဝ်ႈသိလ်ထမ်းဝုၼ်းၸုမ်ႉ ဢဝ်တူဝ်ၸႂ်ၸဝ်ႈၵဝ်ႇပဵၼ်တူဝ်ယၢင်ႇသေ လၢတ်ႈသွၼ် ပွၼ်ႈပၼ် ပိူင်ပဵၼ်ပဵၼ်လူႉလူႉၵႂႃႇ ၼႂ်းပၢင်တြႃး မၢႆတွင်းဝၼ်းၵိူတ်ႇမၼ်းၸဝ်ႈၼင်ႇၼႆ။

ဝၼ်းၵိူတ်ႇၸဝ်ႈသိလ်ထမ်းၶူးဝႃးဝုၼ်းၸုမ်ႉ ၸတ်းမႃးပီလႂ်ၵေႃႈ ၵူႈၸၢဝ်းၶိူဝ်းၼႂ်းမိူင်းတႆး ၸိူဝ်းပဵၼ်ၸၢဝ်းပုတ်ႉထၵမ်ႈၼမ် ဢွၼ်ၵၼ်ဝႆႉၸႂ်သတ်ႉထႃႇယုမ်ႇယမ်ၼပ်ႉထိုဝ်သေ ဝႆႉၵၢၼ်ဝႆႉငၢၼ်းၸဝ်ႈၵဝ်ႇ ဢွၵ်ႇတႃႈဢွၵ်ႇတၢင်းလတ်းၸူး မိူင်းၽူင်း တီႈလိၼ်ၵိူတ်ႇၸဝ်ႈၶူးဝႃးဝုၼ်ႉၸုမ်ႉလူၺ်ႈၸႂ်သိလ်ၸႂ်မုၼ် ။

တႄႇဢဝ်ဝၼ်းတီႈ 1 ထိုင် ဝၼ်းတီႈ 6 ၼႆႉ ၵေႃႇမတီႇၾၢႆႇၸတ်းပၢင်ပွႆး မၵ်းမၼ်ႈပဵၼ်ဝၼ်းႁူမ်ၸူမ်းဝၼ်းၵိူတ်ႇၸဝ်ႈၶူးဝႃးဝုၼ်းၸုမ်ႉၼႆလႄႈ ၵူၼ်းတီႈၸမ်တီႈၵႆ ၼႂ်းမိူင်းၼွၵ်ႈမိူင်း တေဢွၼ်ၵၼ် မႃးၽွမ်ႉၼႃႈၽွမ်ႉတႃၵၼ် ၼႂ်းဢွင်ႈတီႈၸတ်းပၢင်ဝၼ်းၵိူတ်ႇၼၼ်ႉၵိုၼ်းၶွၼ်ႈ သမ်ႉပေႃးမိူၼ်ၼင်ႇၶၢပ်ႈတေႃႇၶၢပ်ႈတႅၼ် ။

ၶၢဝ်းတၢင်း 4 – 5 ဝၼ်းၼႆႉၵေႃႈ တႃႈၶီႈလဵၵ်းလႄႈမိူင်းၽူင်း မႅၼ်ႈၽွင်းၵူၼ်းၵိုၼ်းၶွၼ်ႈ ရူတ်ႉၵႃးၶႅၵ်ႇတၢင်ႇတီႈသီႇလႅၼ်ႈ ပူၵ်းတုင်းသႃသၼႃသေ ၶပ်ႉယႆၶဝ်ႈဢွၵ်ႇၵႂႃႇမႃးပေႃးပဵၼ်သဵၼ်ႈပဵၼ်သၢႆ ။
ဢဝ်တိုဝ်ႉတၢင်းၼႆႉသေ ၸိူဝ်းပဵၼ်သၢႆပီႈသၢႆၼွင်ႉၵၼ် ဢမ်ႇလႆႈႁၼ်ၵၼ်မႃးပီယၢဝ်းၶၢဝ်းႁိုင်ၼၼ်ႉ လႆႈမႃးထူပ်းမႃးၺႃးၵၼ် ၼႂ်းပၢင်ႁူမ်ၸူမ်းဝၼ်းၵိူတ်ႇၸဝ်ႈသိလ်ထမ်းၼႆႉၵေႃႈ မီး ၊ လႆႈဝႃႈ ပဵၼ်မင်ႇၵလႃႇလူင်ဢၼ်ၼိုင်ႈယဝ်ႉၼႆ – ၵူၼ်းတႃႈၶီႈလဵၵ်းၵေႃႉၼိုင်ႈလၢတ်ႈ။

ဢိင်ၼိူဝ် ၵူၼ်းမႃးၶွၼ်ႈၵၼ်ၼမ် ၼင်ႇမူတ်ႉၼင်ႇပူၵ်ႇၼႆႉသေ ၼင်ႇႁိုဝ် တၢင်းယိူင်းဢၢၼ်းဢၼ်လႆႈမႃးပေႃးတေဢမ်ႇၸၢႆႉဢမ်ႇၵိူင်းၼၼ်ႉ ယူႇတီႈၸဝ်ႈၶူးၺႃႇၼသီႇရိ ၸင်ႇလၢတ်ႇပၢဝ်ႇပၼ်ၾၢင်ႉၼႂ်းပၢင်ၼႆႉဝႃႈ –

“ ၵူႈၵေႃႉဢၼ်ၶဝ်ႈမႃးပၢင်ႁူမ်ၸူမ်းဝၼ်းၵိူတ်ႇၼႆႉ ဢမ်ႇၸႂ်ႈဝႃႈ ၵူၼ်းၵိုၼ်းၼႆသေလႄႈမႃး ဢမ်ႇၸႂ်ႈဝႃႈမႃးမူၼ်ႈမႃးၵျေႃႇၵူၺ်း ၊ ဢၼ်မႃး ၸူႉလုမ်းတုမ်ၵၼ်သေ ၼိမ်တူဝ်ၼိမ်ၸႂ်တုင်းထွမ်ႇဢဝ် ၶေႃႈသင်ႇသွၼ်ဢွၼ်လီ ၶူးဝႃးပေႃႈသိလ်ထမ်းဝုၼ်ႉၸုမ်ႉၼႆႉယဝ်ႉ ပဵၼ်လွၼ်ႉၵႅၼ် ဢၼ်လႆႈမႃးၶဝ်ႈႁူမ်ႈပၢင်ဝၼ်းၵိူတ်ႇၸဝ်ႈၶူးဝႃးဝုၼ်ႉၸုမ်ႉ ” – ဝႃႈၼႆ။

ဝႃႈၼၼ်သေတႃႉ ၼႂ်းပၢင်ႁူမ်ၸူမ်းဝၼ်းၵိူတ်ႇၸဝ်ႈၶူးဝႃးပီၼႆႉ မီးၶေႃႈႁႄႉႁၢမ်ဢမ်ႇႁႂ်ႈႁဵတ်းၵၢၼ်တုၸရိူၵ်ႈ ဢၼ်မိူၵ်ႈဢၼ်လိူင်းၼႆသေတႃႉ ယင်းတိုၵ်ႉမီးၵူၼ်းလၵ်ႉၸၵ်ႉၶုတ်ႈယူႇၼႆ ၽူႈတူင်ႉၼိုင်ၸုမ်းၸွႆႈထႅမ်ၼႂ်းပၢင်ပွႆးၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈၼင်ႇၼႆ ။

ဢၼ်ၺႃးၸၵ်ႉ လၵ်ႉထူင်ၶူဝ်းၵႂႃႇၼႆႉ ပဵၼ်ပီႈၼွင်ႉလၢဝ်း ဢၼ်မႃးၶဝ်ႈႁူမ်ႈဝႆႈသႃ ၊ ပႆႇႁူႉၸွမ်းလွင်ႈလူႉလွင်ႈသုမ်းသေတႃႉ မၼ်းယႃႉပိူင်ၾၢင် ပၢင်ထမ်းတြႃးၸဝ်ႈသိလ်ထမ်း ဢမ်ႇၵိုင်ႇလီပဵၼ်သေဢိတ်းၼႆ ၵူၼ်းၼုမ်ႇဢၼ်ၶဝ်ႈႁူမ်ႈပၢင်ပွႆးၵေႃႉၼိုင်ႈသိုပ်ႇလၢတ်ႈ ။
ပၢင်ႁူမ်ၸူမ်းဝၼ်းၵိူတ်ႇၸဝ်ႈၶူးဝႃးၼႆႉ ပေႃးမေႃဝႆႉၵႃႈၶၼ်ၵေႃႈ လီတႃႇသႃႇသၼႃႇ လႄႈ ၸိူဝ်ႉၶိူဝ်း ၊ ဝၢၼ်မိူင်း ။ မၼ်းၸၢင်ႈ ႁဵတ်းႁႂ်ႈၵူၼ်းမိူင်းမီးၸႂ်ဢွမ်ႇလွမ်ႈၽွမ်ႉသဵင်ပဵင်းပၢၵ်ႇၵၼ်လႄႈ မီးၸႂ်ၵတ်းၸႂ်ယဵၼ်ယွၼ်ႉထမ်းတြႃး ။ ၵူၺ်းၵႃႈ ယႃႇဢဝ်ပၢင်ႁူမ်ၸူမ်းဝၼ်းၵိူတ်ႇၼႆႉပဵၼ်ၶေႃႈဢၢင်ႈသေ ႁဵတ်းႁႂ်ႈၸိုဝ်ႈတႆးၼဝ်ႈၼႆ ၸဝ်ႈၶူးၺႃႇၼသီႇရိလၢတ်ႈၼႄဝႇႉၼင်ႇၼႆ –

ပိူင်လူင်မၼ်း ဢၼ်ၵႂႃႇဢၼ်မႃးၼႆႉ ယႃႇဢဝ်ဝၼ်းၵိူတ်ႇၸဝ်ႈၶူးဝႃး ပဵၼ်လွင်ႈတၢင်းမၼ်းသေလႄႈ ၊ ပိူင်လူင်မၼ်းယႃႇပေဝူၼ်ႉလွင်ႈလၢႆးသုၼ်ႇတူဝ်ပဵၼ်ယႂ်ႇ ။ ယႃႇပေဝႃႈ ဢဝ်လွင်ႈတၢင်း ၸဝ်ႈသိလ်ထမ်းဝုၼ်းၸုမ်ႉသေလႄႈ ႁဝ်းႁဵတ်းၵၢၼ်ၼႂ်းၵႄႈမၼ်း ယူဝ်မၼ်းၵျႃႉယူဝ်ႉၼႆသေ တႄႇၵႂႃႇၸိူဝ်းၼၼ်ႉ ဢမ်ႇၶႂ်ႈမၼ်းသုၵ်ႉယုင်ႈၼႂ်းၵႄႈမၼ်း။ ႁႂ်ႈပဵၼ်လွင်ႈမူတ်းမူတ်းသႂ်သႂ်။ပေႃးၸိူင်ႉၼၼ် ပွင်ႇဝႃႈ ႁဝ်းမႃးၵေႃႈသိူဝ်း ႁဝ်းမိူဝ်းၵေႃႈသႃႇ မၼ်းတေလီၵႂႃႇ
ၸင်ႇၼၼ်လႄႈ ဢၼ်လီတီႈသုတ်းတႄႉ ၼႂ်းတႆးႁဝ်းၼႆႉ သင်မီးဝႆႉ ပိူင်ၾၢင်ဢၼ်ၵူၼ်းၼမ် ၼပ်ႉယမ်ဝႆႉထၢၼ်ႈသုင်ၼၼ်ႉ လူဝ်ႇႁၵ်ႉသႃသိမ်းပႅင်းဝႆႉ ။ ဢမ်ႇဝႃႈ တေပဵၼ်ၵူၼ်းၵိုၵ်းပိုၼ်း ၊ ပဵၼ်ၶူဝ်းပူၺ်ႈၼႂ်းပၢႆးမွၼ်း ၼႂ်းတွၼ်ႈၵၢၼ်ပၢႆးပၺ်ႇၺႃႇ ၊ ၼႂ်းသႃသၼႃ ၸိူဝ်းၼႆႉ တၵ်းလူဝ်ႇမေႃဝႆႉၵႃႈၶၼ် ။ မၼ်းပဵၼ်ႁႅင်းဢီး တႃႇတႆးႁဝ်းယူႇလွတ်ႈၵၢင်းၶဵၼ်ဢၼ်ၼိုင်ႈၼႆ – ၵူၼ်းၼုမ်ႇလုၵ်ႈႁဵၼ်းၸၼ်ႉၸွမ်ၵေႃႉၼိုင်ႈလၢတ်ႈ ။

ၼႂ်းပၢင်ႁူမ်ၸူမ်းဝၼ်းၵိူတ်ႇ ၸဝ်ႈၶူးဝႃး ပီ 2026 ၼႆႉ မီး ၸဝ်ႈတူၼ်ၶူးၸိုဝ်ႈယႂ်ႇၼႂ်းမိူင်းၼွၵ်ႈမိူင်း မႃးၶဝ်ႈႁူမ်ႈလၢႆတူၼ်လၢႆပႃး မိူၼ်ၼင်ႇ ၸဝ်ႈသြႃႇသုၶမ်း ၊ ၸဝ်ႈတူၼ်ၶူးလူင်ထမ်ႇမသႃႇမိ ၸိူဝ်းၼႆႉၵေႃႈ တိုၼ်းဝႆႉၵႃႈၶၼ်သေ ၶဝ်ႈႁူမ်ႈၸွမ်းယူႇၵူႈပီပီ ။
ၸဝ်ႈသိလ်ထမ်းၶူးဝႃးဝုၼ်းၸုမ်ႉၼႆႉ ၵွၼ်ႇၼႃႈဝၼ်းၵိူတ်ႇမၼ်းၸဝ်ႈၼၼ်ႉ ၶဝ်ႈထမ်ႈ တိုဝ်းၵမ်သိလ်ယူႇၼႂ်းထမ်ႈတီႈမိူင်းလႃး ။ ဝၼ်းတီႈ 02/01/2026 ၼႆႉ ၸင်ႇ လုၵ်ႉတီႈမိူင်းလႃးၼၼ်ႉသေ ယေႃးမုၼ်ထိုင် ၵဵင်းတုင် – တႃႈၶီႈလဵၵ်း – မိူင်းၽူင်း ။ မႅတ်ႉတႃႇတြႃးပၼ် ၵူၼ်းဝၢၼ်ႈၵူၼ်းမိူင်းတီႈၸမ်တီႈၵႆ ၸိူဝ်းမႃးပႂ်ႉႁပ်ႉတွၼ်ႈ ဝိၸႃႇတမင်ၵလႃႇဝၼ်းၵိူတ်ႇၸဝ်ႈ။

ၸွမ်းၼင်ႇ ၵေႃႇမတီႇပၢင်ပွႆး တမ်းဝၢင်း ၶပ်ႉမၢႆဝႆႉတႄႉ ဝၼ်းတီႈ 1 ထိုင် 6 ၼႆႉ ၸဝ်ႈသိလ်ထမ်းၶူးဝႃးဝုၼ်းၸုမ်ႉ တေမႅတ်ႉတႃႇတြႃးပၼ် ၶႅၵ်ႇၼႂ်းမိူင်းၼွၵ်ႈမိူင်း ၸိူဝ်းမႃးၶဝ်ႈႁူမ်ႈၼႂ်းပၢင်ဝၼ်းၵိူတ်ႇ ၸဵမ်ၵၢင်ဝၼ်းလႄႈၵၢင်ၶမ်ႈ ။
လိူဝ်ၼၼ်ႉ ၼႂ်းဝၼ်းတီႈ 05/01/2026 ဢၼ်မႅၼ်ႈဝၼ်းၵိူတ်ႇ ၸဝ်ႈၶူးဝႃးဝုၼ်းၸုမ်ႉၼၼ်ႉ လုၵ်ႈၼွင်ႉပွင်ႈပၢႆမၼ်းၸဝ်ႈ ပၢင်းယေႃးၶူးဝႃးပေႃႈ မႃးသွၼ်းၼမ်ႉတီႈၼႂ်းသူၼ်မွၵ်ႇ ။

ပီၼႆႉ ၸဝ်ႈၶူးဝႃးဝုၼ်းၸုမ်ႉ ဢႃယုထူၼ်ႈထိုင် 62 ပီ ( မၢင်တီႈၵေႃႈ ၼပ်ႉပီတႆး ပီႈထႆး ဢမ်ႇသွၼ်ႇမႅၼ်ႈယၢမ်းလဵဝ်ၵၼ်သေ ဢႃယုမၼ်းၸဝ်ႈ ထူၼ်ႈထိုင် 63 ယဵပ်ႇၶဝ်ႈ 64 ယဝ်ႉၼႆၵေႃႈမီး ) – ၼႆ ၸဝ်ႈၶူးၺႃႇၼသီႇရိ (ၸဝ်ႈမၢၼ်ႇတႃဢွၼ်ႇ) လၢတ်ႈၼင်ႇၼႆ။

ဝၢႆးပၢင်ဝၼ်းၵိူတ်ႇမၼ်းၸဝ်ႈယဝ်ႉၼၼ်ႉ မၼ်းၸဝ်ႈတေယႃးမုၼ် မႅတ်ႉတႃႇတြႃး ထိုင် လၢႆလၢႆဝဵင်း မိူင်းတႆးပွတ်းဢွၵ်ႇပွတ်းၸၢၼ်းပွတ်းႁွင်ႇထႅင်ႈ ဝႃႈၼႆ။