ႁူဝ်ပီ 2025 ၼႆႉ ပၢင်ပွႆးဝၼ်းၵိူတ်ႇ ၸဝ်ႈသိလ်ထမ်း ၶူးဝႃးဝုၼ်းၸုမ်ႉ တေၸတ်းႁဵတ်းတီႈမိူင်းၽူင်း ဝဵင်းတႃႈၶီႈလဵၵ်း တႃႇၶၢဝ်းတၢင်း 5 ဝၼ်း။

ပေႃးထိုင်မႃး ဝၼ်းတီႈ 01-05/01/2025 ယူႇတီႈ သင်ၶၸဝ်ႈလႄႈ တၵ်ႉၵႃႇသတ်ႉထႃး တေႁူမ်ႈၵၼ် ၸတ်းႁဵတ်းပၢင်ပွႆးဝၼ်းၵိူတ်ႇ ၸဝ်ႈသိလ်ထမ်း ၶူးဝႃးဝုၼ်းၸုမ်ႉ ဢႃယု ၶွပ်ႈတဵမ် 61 ပီ တီႈဝတ်ႉၽရႃႉထၢတ်ႈသီၻွၼ်ႊရိူင်း ဢိူင်ႇမိူင်းၽူင်း (ၵ) ၸႄႈဝဵင်းတႃႈၶီႈလဵၵ်း ၸိုင်ႈတႆးပွတ်းဢွၵ်ႇၶူင်း ၼႆယဝ်ႉ။

ၶပ်ႉမၢႆ ပၢင်ပွႆးဝၼ်းၵိူတ်ႇၼႆႉသမ်ႉ တႄႇဢဝ် ဝၼ်းတီႈ 01-04/01/2025 ယၢမ်းၵၢင်ၼႂ် 4 မူင်း ၶူးဝႃးဝုၼ်းၸုမ်ႉ တေ ဢွၼ်တၵ်ႉၵႃႇသတ်ႉထႃး ဝႆႈၽြႃးတၢင်ႇသွမ်း။ ယၢမ်းၵၢင်ၼႂ် 10 မူင်း ႁေႃးတြႃး ပၼ်ပီႈၼွင်ႉ တၵ်ႉၵႃႇသတ်ႉထႃး ၸိူဝ်းမႃးၶဝ်ႈႁူမ်ႈပၢင်ပွႆး။ ယၢမ်းဝၢႆးဝၼ်း 3 မူင်း ႁေႃးတြႃးထႅင်ႈ ၵမ်းၼိုင်ႈ၊ ယၢမ်းၵၢင် ၶမ်ႈ 6 မူင်း တေဝႆႈၽြႃးႁေႃးတြႃးထႅင်ႈ ၵမ်းၼိုင်ႈ။

ၸဝ်ႈၶူးလူင် ၺႃႇၼသီႇရိ (ၸဝ်ႈမၢၼ်ႇတႃဢွၼ်ႇ) ႁူဝ်ပဝ်ႈငဝ်ႈငုၼ်းမုၵ်ႉၸုမ်းလူင် သင်ႇၶႃႇၸိုင်ႈတႆး ပွတ်းဢွၵ်ႇၶူင်း လၢတ်ႈၽူႈတွႆႇႁွၵ်ႈဝႃႈ – “ပွႆးဝၼ်းၵိူတ်ႇ ၶူးဝႃးဝုၼ်းၸုမ်ႉ ပီၼႆႉ ပေႃးထိုင်မႃး ဝၼ်းတီႈ 03/01/2025 ယၢမ်းၵၢင်ၼႂ် 10 မူင်း တေတၢင်ႇထီးၵွင်းမူးလူင် ပူႇတႃႇဢူဝ်ႇ ဢၼ်ႁဵတ်းဝႆႉတီႈမိူင်းၽူင်းၼႆႉ တႃႇမၢႆတွင်း ဝၼ်းၵိူတ်ႇၶူးဝႃးဝုၼ်းၸုမ်ႉ ဢႃယုထူၼ်ႈထိုင် 70 ပီ တေတၢင်ႇထီးဝႆႉလူင်ႈၼႃႈ။ ၼႂ်းဝၼ်းၵိူတ်ႇၸဝ်ႈ ဝၼ်းတီႈ 5 သမ်ႉ ၶူးဝႃးပေႃႈ တေဢတိတ်ႉထၢၼ်ႇ ဢမ်ႇလၢတ်ႈၵႂၢမ်းတင်းဝၼ်း မိူၼ်ၵူႈပီ ပူၼ်ႉမႃးၼၼ်ႉ” – ဝႃႈၼႆ။

ၼႂ်းဝၼ်းတီႈ 5 ၼၼ်ႉသမ်ႉ ယၢမ်းဝၢႆးဝၼ်း 2 မူင်း တေပဵၼ်ပၢင်မင်ႇၵလႃႇ သွၼ်းၼမ်ႉ ပၼ်ၸဝ်ႈသိလ်ထမ်း ၶူးဝႃးဝုၼ်းၸုမ်ႉ (သွၼ်းၼမ်ႉမင်ႇၵလႃႇ ဝၼ်းၵိူတ်ႇ) ၼႆယဝ်ႉ။

ၵူႈပီ ၼႂ်းတိုဝ်ႉတၢင်းပွႆးဝၼ်းၵိူတ်ႇ ၸဝ်ႈသိလ်ထမ်း ၶူးဝႃးဝုၼ်းၸုမ်ႉၼႆႉသေ တီႈဝဵင်းတႃႈၶီႈလဵၵ်း လႅၼ်လိၼ်တႆး – ထႆးၼႆႉ ၵူၼ်းမိူင်းတႆး ၵူႈတီႈၵူႈလႅၼ်လႄႈ တၢင်းထုင်ႉပဵင်း ၸိူဝ်းၼၼ်ႉသေ ႁူမ်ႈၵၼ် မႃးလူႇတၢၼ်းဝႆႈသႃ ၵူၼ်းပေႃး ၵိုၼ်းၶွၼ်ႈ သတ်ႉၼႅၼ်ႈ။ ဝၢႆးပွႆးယဝ်ႉ ဢွၼ်ၵၼ်ပူၼ်ႉၵႂႃႇဢႅဝ်ႈလႄႇ တၢင်းၾင်ႇမႄႈသၢႆ ၸိုင်ႈထႆး ၸိူဝ်းၼၼ်ႉထႅင်ႈ ဝႃႈၼႆ။

ၵူၼ်းတႃႈၶီႈလဵၵ်း ၽူႈယိင်း ဢႃယု 40 ပၢႆ ၵေႃႉၼိုင်ႈ လၢတ်ႈၽူႈတွႆႇႁွၵ်ႈဝႃႈ – “ပီၼႆႉ ႁဝ်းၶႃႈ ႁၢင်ႈႁႅၼ်းဝႆႉ တေမိူဝ်း ၸႃႇၵလဵင်ႉလူ ၼႂ်းပွႆးဝၼ်းၵိူတ်ႇ ၶူးဝႃးပေႃႈ မိူၼ်ၼင်ႇ – ၼမ်ႉသူမ်ႈ၊ ၼမ်ႉဝၢၼ်၊ ၼမ်ႉၼူမ်း၊ ၼမ်ႉၵိၼ် ၸိူဝ်းၼႆႉ။ ၵူၺ်းၵႃႈ ပီၼႆႉ ယွၼ်ႉငဝ်းလၢႆး ၼႂ်းမိူင်းတႆး ဢၼ်ပဵၼ်ယူႇယၢမ်းလဵဝ်ၼႆႉသေ ထၢင်ႇတႄႉ တေဢမ်ႇပေႃးမႃးၼမ် မိူၼ်ၵူႈပီၶႃႈယူဝ်ႉ”- ဝႃႈၼႆ။

ၼႂ်းပီ 2024 ၼႆႉ ၸဝ်ႈသိလ်ထမ်း ၶူးဝႃးဝုၼ်းၸုမ်ႉ ယေႃးၶိင်း မိူဝ်းဢဝ်ဝႃႇသႃ တီႈမိူင်းပူႊတၢၼ်ႊ တႃႇၶၢဝ်းတၢင်း 9 လိူၼ်သေ ၸဝ်ႈတိုၵ်ႉယေႃႉၶိင်းၽႅဝ်မႃး တီႈဝတ်ႉၽရႃႉထၢတ်ႈ သီႊၻွၼ်ႊရိူင်း (သီရိတွၼ်းႁိူင်း) ဢိူင်ႇမိူင်းၽူင်း (ၵ) ဝဵင်းတႃႈၶီႈလဵၵ်း ၼႆယဝ်ႉ။

ၸဝ်ႈသိလ်ထမ်း ၶူးဝႃးဝုၼ်းၸုမ်ႉၼႆႉ ၸႃတိတီႈၵိူတ်ႇ ပဵၼ်ဝၢၼ်ႈမႄႈၶမ်းၼွင်မူဝ် ဢိူင်ႇမႄႈၶမ်း ၸႄႈဝဵင်းမႄႈၸၼ်း ၸႄႈတွၼ်ႈၵဵင်းႁၢႆး။ ပဵၼ်လုၵ်ႈပေႃႈ သႅင်လႃႈလႄႈ မႄႈၶမ်းလႃႈ။ ၽွင်းဢႃယုၸဝ်ႈ 4 ပီ ထိုင် 10 ပီၼၼ်ႉ လႆႈၶဝ်ႈႁူင်းႁဵၼ်းထႆး။ ထိုင်မႃးဢႃယု 11 ပီၼၼ်ႉ ၶိုၼ်ႈပဵၼ် ၸဝ်ႈသၢင်ႇ။ ဢႃယု 12 ပီ တၵ်ႉၵႃႇသတ်ႉထႃး ဢိူင်ႇမိူင်းၽူင်း ၸႄႈဝဵင်းတႃႈၶီႈလဵၵ်း ၸင်ႇၵႂႃႇယိုၼ်ႈမွၵ်ႇ ယေႃးၸဝ်ႈ မႃးပူၵ်းပွင် သႃသ ၼႃ တီႈဝတ်ႉၽရႃႉထၢတ်ႈသီႊတွၼ်ႊရိူင်း (သီရိတွၼ်းႁိူင်း) ၸႄႈဝဵင်းတႃႈၶီႈလဵၵ်း ၸိုင်ႈတႆး ပွတ်းဢွၵ်ႇၶူင်း တေႃႇထိုင်ဝၼ်းမိူဝ်ႈၼႆႉ။